1 Utor 19 - ICIGHAN BIBILO

¹ Tsô Ahaba ôr Yesebel kwagh u Eliya er la cii, man er a woo uprofeti cii sha sanker kpaa.

² Nahan Yesebel tindi ortyom hen Eliya er a̱ za kaa un er: Mbaaôndo ve̱ er a mo nahan shi i̱ hemba nahan kpaa, aluer kper hen shighe ne nahan mea gema uma wou una hingir er uma u mô ve ga yô.

³ Nengen nahan yô, a mough a yevese er una yima uma na, a za nyôr ken Bersheba u ken Yuda, a undu wanakiriki na her.

⁴ Kpa un iyol na a yem ken ikôngo kuma zende u iyange i môm, a za tema hen itine i kon u yuniper; a lu tômon er ma un kpe; a kaa er: Kuma hegen ne; TERE, ngohol uma wam, gadia m hemba uter av ga.

⁵ Tsô a yav inya, a gba mnyam hen itine i kon u yuniper; yô, nenge, ortyom va kpoghol un, kaa a na er: Mough sha, ya kwagh.

⁶ Tsô a gba yengen, man nenge, hen tiôn u sha ityough nagh la, akpekpa u i kaa sha awen a tseen lu her, kua isheghmnger kpaa. Nahan a ya, a ma, a shi a hide a yav her.

⁷ Ortyom u TER shi va, kuma kwa har, va kpoghol un, kaa er: Mough sha, ya kwagh, gayô, zende ngu u her je gande.

⁸ Tsô a mough, a ya, a ma; man sha agee a kwaghyan la je, a zende ayange akunduahar kua aime akunduahar, zan zan a za ar hen Horebi, uwo u Aôndo la.

⁹ A va hen bar, a nyôr a tsa ker; tsô imo i TER va her a na, va pine un er: Ka nyi u eren heene, Eliya?

¹⁰ A kaa er: Ishima tseem tsung sha kwagh u TER, Aôndo u akum a Sha; gadia Mbaiserael undu ikuryan You, ve vihi atse a Ou a nanden nagh sha mi, shi ve wua uprofeti Ou sha sanker; mo m mase shin tswen; man shi mba keren mo a ku kpaa.

¹¹ Tsô A kaa a na er: Due, tile sha uwo ne sha ishigh ki TER. Tsô nenge, TER va kar, zegeahumbe u taver za va, a pav uwo, hembe avande sha ishigh ki TER; kpa TER lu ken ahumbe ga; ahumbe la nga kar kera yô, tar tenger; kpa TER lu ken tartenger la ga;

¹² tartenger ngu kar kera yô, lu usu; kpa TER lu ken usu ga; usu la ngu kar kera yô, anihuran za va luee.

¹³ Er Eliya ungwa nahan yô, a yisa ishigh nagh sha ikondo, a due a za tile hen zwa u bar. Yô, nenge, imo va her a na, kaa er: Ka nyi u eren heene, Eliya?

¹⁴ A kaa er: Ishima tseem tsung sha kwagh u TER, Aôndo u akum a Sha; gadia ônov mba Iserael undu ikuryan You, ve vihi atse a Ou a nanden nagh sha mi, ve wua uprofeti Ou sha sanker, mo, m mase shin tswen, man mba keren mo a ku kpaa.

¹⁵ Kpa TER kaa a na er: Hide sha gbenda u u ve la, yem hen ikôngough ki Damaseku; ú za nyôr her yô, shighe Hasael mkurem a̱ lu tor u Shiria;

¹⁶ man Yehu wan u Nimshi yô, shighe un mkurem a̱ lu tor u Iserael; Elisha wan u Shafati u ken Abel-mehola yô, shighe un mkurem a̱ hingir profeti sha ityough you.

¹⁷ Nahan or u nana war sanker u Hasael yô, Yehu a̱ wua nan; man or u nana war sanker u Yehu yô, Elisha a̱ wua nan.

¹⁸ Nahan kpaa, Me shi ior dubu utaankaruhar ken Iserael, ka mba anu a ve a gur Baal inya ga la cii, man hanma zwa u u susu un kpaa ga yô.

¹⁹ Tsô a mough heregh, a za kohol Elisha wan u Shafati; lu kahan sule a ibua ihiar ihiar kwa pue kar uhar sha ishigh nagh; wen iyol na lu a ihiar kpaa, i masetyô la; tsô Eliya kar za kohol un, gema ikondo na haa un iyol.

²⁰ Nahan a undu ibua, a gba zendan Eliya ityô, a kaa er: Shi de m̱ za suse terem zwa kua ngôm, man me va dondo sha a we ye. A kaa a na er: Yô, za ase, gadia mo m er u nyi?

²¹ Tsô a de u dondon sha a na, a kôr ibua ihiar la, a sôngo, a jiir inyam i i sha ikon i ikav mbi kahan sule a mi la, a na ior, ve ya. Tsô a mough, a gba dondon sha Eliya, eren un tom.