1 Utor 16 - ICIGHAN BIBILO

¹ Tsô kwaghôron u TER va hen Yehu wan u Hanani, lu teren Baasha, er:

² Er M kende u hen vuulevu sha je, M ver u orhemen u ior Av Iserael, kpa u za sha gbenda u Yerobiam, u ne ior Av Iserael ve eren isholibo ve bamem sha asorabo a ve yô,

³ nenge, Me ese Baasha kua ya na kera purututu; Me gema ya wou una hingir er ya u Yerobiam wan u Nebati nahan.

⁴ Or u Baasha u nana kpe ken gar yô, iwa ia ya nan, u nana kpe ken ikôngo yô, inyon i sha ia ya nan.

⁵ Aerenakaa a Baasha agen man akaa a a er cii kua tahav nav yô, i nger a ken ruamabera u abaver a utor mba Iserael la gaa?

⁶ Tsô Baasha yav a uter nav imôngo, i ii un ken Tirsa; wan na Ela gema tema tor sha ityough nagh.

⁷ Man shi imo i TER va hen profeti Yehu wan u Hanani, lu teren Baasha kua ya na, sha ci u aferakaa a a er sha ishigh ki TER cii er a bam Un sha tom u ave na la yô, sha ci u a er, er ya u Yerobiam nahan, man shi sha ci u a wua un kpaa yô.

⁸ Sha inyom i sha ikundu kar ataratar i Asa tor u Yuda la, Ela wan u Baasha ya tor sha Iserael ken Tirsa; a tema tor anyom ahar.

⁹ Tsô wanakiriki na Shimeri orhemen u sha kwe ugen u akekeautya a na, zua zwa a ior mbagenev sha u keren un a ku. A lu ken Tirsa, lu man akaa hunden ken ya u Arsa, or u nenge sha ya u tor ken Tirsa la;

¹⁰ tsô Shimeri va nyôr ta num sha a na, wua un, sha inyom i sha ikundu kar ataankarahar i Asa tor u Yuda la, maa a tema tor sha ityough nagh.

¹¹ Tsô zum u a hingir tor yô, er a tema sha ikônough nagh ki torough yô, a gema a tim ya u Baasha cii, a de un ma wannomso môm tsô kpaa ga; ken anmgbianev nav kpaa, ken akar a na kpaa, a de ga.

¹² Kape Shimeri a tim ya u Baasha cii, sha imo i TER, i A kaa profeti Yehu sha kwagh u Baasha la,

¹³ sha ci u asorabo a Baasha cii, kua asorabo a wan na Ela, a ve er, a ve ne Iserael u eren a kpaa la, sha u bamen TER, Aôndo u Iserael, sha akaa a ve a dang la.

¹⁴ Aerenakaa a Ela agen, man akaa a a er cii yô, i nger a ken ruamabera u abaver a utor mba Iserael la gaa?

¹⁵ Sha inyom i sha ikundu kar ataankarahar i Asa tor u Yuda la, Shimeri tema tor ayange ataankarahar ken Tirsa. Ior lu haan afo, kasen Gibeton, u a lu u Mbafiliti la.

¹⁶ Ior mba ve haa afo la, ve ungwa i lu kaan er: Shimeri zua zwa a ior, wua tor je; nahan Iserael cii gema tôô Omeri orhemen u akumautya, ve ver un tor sha Iserael hen afo sha iyange la je.

¹⁷ Tsô Omeri mough hen Gibeton a Iserael cii, ve kôndo ve va kase Tirsa sha utya.

¹⁸ Er Shimeri nenge er i ngohol gar yô, a nyôr ken iyou i taver i ken ya u tor, a nande iyou i tor la, a hia ker, a kpe,

¹⁹ sha ci u akaabo a na a a er yô, er lu eren ifer sha ishigh ki TER, lu zenden sha gbenda u Yerobiam, eren asorabo a na la, a a ne Iserael kpaa a er a la.

²⁰ Aerenakaa a Shimeri agen, man mzough u zuan zwa a ior la, i nger a ken ruamabera u abaver a utor mba Iserael la gaa?

²¹ Tsô ior mba Iserael pav iniongo ihiar, nongo ugen dondo Tibeni wan u Ginati er vea ver un tor; nongo ugen dondo Omeri.

²² Kpa ior mba ve dondo Omeri la, ve hemba taver a mba ve dondo Tibeni wan u Ginati la; nahan Tibeni kpe, Omeri maa ya tor.

²³ Sha inyom i sha ikundugber kar môm i Asa tor u Yuda la, Omeri ya tor sha Iserael, a lu tor anyom pue kar ahar; a lu tor ken Tirsa, anyom ataratar.

²⁴ A yam igungu u Samaria a Shemer sha utalenti mba azurfa uhar; a maa sha igungu la, a ii gar u a maa la, iti er Samaria, sha iti i Shemer u igungu lu u na la.

²⁵ Omeri er kwaghbo sha ishigh ki TER, a er akaabo hemba a mba ve vande lun a na cii.

²⁶ Gadia a zende sha gbenda u Yerobiam wan u Nebati cii kua asorabo a na, a a ne Iserael kpaa a er a la, sha u bamen TER, Aôndo u Iserael, sha akaa ve a dang la.

²⁷ Aerenakaa agen a Omeri er, man tahav nav mbu a er yô, i nger a ken ruamabera u abaver a utor mba Iserael la gaa?

²⁸ Tsô Omeri yav a uter nav imôngo, i ii un ken Samaria; wan na Ahaba gema tema tor sha ityough nagh.

²⁹ Sha inyom i sha ikundugber kar anigheni i Asa tor u Yuda la, Ahaba wan u Omeri ya tor sha Iserael; Ahaba wan u Omeri tema tor sha Iserael ken Samaria anyom ikundu kar ahar.

³⁰ Ahaba wan u Omeri er kwaghbo sha ishigh ki TER, hemba mba ve vande lun a na cii.

³¹ Tsô er aeren asorabo a Yerobiam wan u Nebati la, kera lu un kwagh u ikoogh ga yô, a shi a za er Yesebel, wan u Etebaal tor u Mbashidon; a za, a za civir Baal, a gure un inya kpaa.

³² A ta atse a nanden nagh sha mi ken iyou i Baal i a maa ken Samaria la.

³³ Shi Ahaba er Ashera; Ahaba shi seer sha u bamen TER, Aôndo u Iserael, hemba utor mba Iserael mba ve vande lun a na cii.

³⁴ Sha ayange na la Hiel or u Betel maa Yeriko; a tim imagh nagh sha ku u wan na u iunda Abiram, shi a wa ihinda na sha ku u wan na u masetyô Segube, sha imo i TER lu kaa Yosua wan u Nun la.