1 Utor 13 - ICIGHAN BIBILO

¹ Tsô or u Aôndo due ken Yuda sha imo i TER, va hen Betel; yô, Yerobiam tile hen atse er una nande kwaghhumandoon.

² Nahan a genger imo, a ter atse sha imo i TER, a kaa er: Atse, atse, TER ngu kaan nahan er: Nenge, iyange igen á mar wan hen ya u Davidi, iti na er, Yoshia; una nande nagh sha a we sha upristi mba sha ajiir a taven sha mba ve nanden kwaghhumandoon sha a we ne; shi á nande akuhe a ior sha a we kpaa.

³ Shi a tese ikav sha iyange la kpaa, a kaa er: ikav i TER A tese yô, nenge, atse aa pav, mtwem ma ma lu sha a kpaa maa haa inya.

⁴ Tsô, zum u tor ungwa mkaanem ma or u Aôndo, u a genger imo, a ter atse a hen Betel la yô, Yerobiam naregh uwegh nagh sha atse la, kaa er: Kôr un. Tsô uwegh nagh ku a naregh sha a na la saa nelôô, a kera fatyô u hiden a ku ga.

⁵ Atse kpaa pav, mtwem kpaa haa inya, sha ikav i or u Aôndo tese sha imo i TER la.

⁶ Tsô tor gba ôron kwagh, kaa a or u Aôndo la er: Yô, sôn ase TER, Aôndo wou, A̱ zungwem mhôônom, er msen sha ci wam er m̱ shi m̱ hide a uwegh agh her yô. Tsô or u Aôndo la zamber a TER, uwegh ku tor kpaa hide her er ku lu keke nahan.

⁷ Nahan tor kaa a or u Aôndo la er: Va, sé yem hen ya wam imôngo, va ma mngerem, shi me na u injar kpaa.

⁸ Kpa or u Aôndo la kaa a tor er: Wea nam vegher ya wou je kpaa me za a we imôngo ga, kwaghyan kpaa me ya ga, mngerem kpaa me ma hen ijiir ne ga;

⁹ gadia TER kaa a mo nahan er: De ye bredi ga, shi de me mngerem kpaa ga, mhir kpaa de hir sha gbenda u u ve min la ga.

¹⁰ Tsô a hide sha gbenda ugen, a kera hide sha gbenda u a ve min hen Betel la ga.

¹¹ Kpa tseprofeti ugen tema lu ken Betel; yô, ônov nav mba nomso va ôr un akaa a or u Aôndo a er ken Betel sha iyange la cii; akaaôron a a ôr tor la kpaa, ve ôr ter ve.

¹² Ter ve pine ve er: Ka hanma gbenda a ze? Nahan ônov nav tese un gbenda u or u Aôndo, u a due ken Yuda, yem mi la.

¹³ A gema a kaa a ônov nav er: Kangem nen jaki shidi. Tsô ve kange un jaki shidi; nahan a henda.

¹⁴ A gba zendan or u Aôndo la ityô, a za kohol un, a tema hen tinekon i terebin; a pine un er: Ka we or u Aôndo u a dugh ken Yuda nee? A rumun er: Ka mo.

¹⁵ Tsô a kaa a na er: Yô, sé hide ken ya, va ya kwagh.

¹⁶ A kaa a na er: Me fatyô u hiden a we ga, shin u nyôron hen a we kpaa ga; kwagh kpaa me ya ga, mngerem kpaa me ma a we hen ijiir ne ga;

¹⁷ gadia sha kwaghôron u TER i kaa a mo er: De ye kwagh ga, mngerem kpaa de me ker ga, man shi de kera hidi sha gbenda u u ve min kpaa ga.

¹⁸ Tsô a gema a kaa a na er: Mo kpaa, m ngu profeti er we nahan; man ortyom ôr kwagh a mo sha imo i TER, er: Hide a na hen ya wou, a̱ va ya kwagh, a̱ ma mngerem kpaa. Kpa lu tsughun un a tsugh.

¹⁹ Tsô a hide a na je, a va ya kwagh hen ya na, shi a ma mngerem kpaa.

²⁰ Kpa er ve tema ve lu yan kwagh la, imo i TER va hen profeti u a hide a na la;

²¹ a genger imo a ôr a or u Aôndo u a due ken Yuda la, a kaa er: TER ngu kaan nahan er: Er u vende imo i TER, u we kwaghôron u TER, Aôndo wou, A kaa u la iko ga,

²² kpa u hir, u va ye kwagh, u me mngerem, henpe A vende a we er: De ye kwagh ga, man de me mngerem her kpaa ga la yô, ikom you ia nyôr shin uwar u uter ou ga.

²³ Tsô er a ya kwagh man a ma mngerem kera kpaa yô, a kange jaki shidi sha ci u profeti u un hide a na la.

²⁴ Er a lu yemen yô, a za zua a begha sha gbenda, begha wua un, gbihi ikom na sha gbenda, jaki tile her; begha kpaa tile hen ikom la.

²⁵ Ior lu karen nengen ikom i i gbihi sha gbenda la man begha tile hen ikom la; nahan ve va ôr kwagh ken gar, henpe tseprofeti la lu la.

²⁶ Er profeti u a hide a na sha gbenda la ungwa kwagh la yô, a kaa er: Ka or u Aôndo, u a vende imo i Aôndo je la; ka sha ci u nahan TER A ne un sha ikev i begha u a ande un, a woo un, sha imo i TER kaa un la.

²⁷ Tsô a ôr kwagh a ônov nav, a kaa er: Kangem nen jaki shidi. Nahan ve kange i shidi.

²⁸ Tsô a za a za kohol ikom na, i i gbihi sha gbenda la, jaki kua begha ve tile hen ikom la; begha ya ikom la ga, man ande jaki kpaa ga.

²⁹ Nahan profeti la tôô ikom i or u Aôndo la, penda sha jaki, hide a mi; a va hen gar u tseprofeti la, sha u vaan ku man u iin un kpaa.

³⁰ A ii ikom la shin uwar na iyol na; ve vaa ku na, er: Kpe ahii! Anngômô!

³¹ Tsô zum u a ii un kera yô, a ôr kwagh a ônov nav, a kaa er: Zum u mea kpe yô, iim nen shin uwar, henpe i ii or u Aôndo ne; ver akuhe am a akuhe na imôngo.

³² Gadia kwaghôron u a genger imo, a ôr sha imo i TER, a ter atse a nanden nagh sha mi, a Betel, kua utempel mba sha ajiir a taven sha cii, mba ve lu ken agar a Samaria la, mimi je una kure sha mi kpee.

³³ Ken masetyô u kwagh ne kpaa Yerobiam de gbenda na u bo la ga, kpa a shi a tôô ior wue wue a ver upristi sha ajiir a taven sha, hanma or u a sar nan yô, a tsegha nan je, nan za kohol upristi mba sha ajiir a taven sha.

³⁴ Kwagh ne hingir kwaghbo sha ya u Yerobiam je sha u á hembe un kera, á tim un sha tar kera kpaa.