1 Utor 11 - ICIGHAN BIBILO

¹ Kasev mba ken akuraior agen kpishi doo tor Solomon ishima, lu wan u tor Farao kua kasev mba Mbamoabi man Mbaamon man Mbaedom man Mbashidon kua Mbahiti;

² ka mba ken akuraior a TER lu kaa Mbaiserael er: De nyer nen nongo a ve ga, ve kpaa ve̱ de nyer nongo a ven ga; gadia vea gema ne ishima er né dondo mbaaôndo vev kpee je; Solomon var a ve, ve doo un ishima.

³ A lu a kasev deri utaankaruhar, ônov mba utor, man kasev mba sha uika deri utar; nahan kasev nav gema un ishima.

⁴ Er Solomon va bee iyol yô, kasev nav gema un ishima, a dondo mbaaôndo mbagenev; ishima na lu sha TER, Aôndo na, vough, er ishima i ter na Davidi nahan ga.

⁵ Solomon dondo Ashetaroti mgbianaôndo u Mbashidon man Milkom kwaghhôngorough u Mbaamon.

⁶ Nahan Solomon er kwagh u a lu u bo sha ishigh ki TER, a dondo TER jighilii, er ter na Davidi nahan ga.

⁷ Solomon maa ijiir i taven sha i civir Kemoshi kwaghhôngorough u Moabi, kua Moleki kwaghhôngorough u Mbaamon kpaa, sha uwo u u lu sha ishigh ki Yerusalem la.

⁸ Kape a er sha ci u kasev nav mba ken akur agen kpaa, mba ve nanden kwaghhumandoon ve naan mbaaôndo vev nagh la.

⁹ Nahan ishima vihi TER a Solomon, sha ci u ishima na i gem, a de u dondon TER, Aôndo u Iserael, u A ande hen a na kwa har la,

¹⁰ man A vande tan un icin sha kwagh ne er: a̱ de kera dondon mbaaôndo mbagenev ga; kpa a wa iko sha kwaghwan u TER wa un la ga.

¹¹ Nahan TER kaa a Solomon er: Er u er nahan, u we iko sha ikuryan Yam man akaawan a Am, a M we u la ga yô, mimi je, Me tsuwe tor her a we kera, Me na wanakiriki wou.

¹² Nahan kpaa sha ayange a ou yô, Me er kwagh ne ga, sha ci u teru Davidi; kpa Me tsuwe un sha ikev i wan wou.

¹³ Nahan kpaa Me ngohol tor kera cii ga, kpa me na wan wou kwe môm sha ci u wanakiriki Wam Davidi, man shi sha ci u Yerusalem u M tsough yô.

¹⁴ Tsô TER ver orhendan kwagh a Solomon, lu Hadadi Oredom; a lu tsombor u tor ken Edom.

¹⁵ Gadia zum u Davidi lu ken Edom la, man Yoabi kurutya kôndo sha u una za ii mbakpenev yô, a wua hanma nomsoor ken Edom;

¹⁶ (gadia Yoabi kua Iserael cii ve tema keregh iwer ataratar zan zan a tim hanma nomsoor ken Edom kera),

¹⁷ kpa Hadadi yevese, kua Mbaedom mbagenev mba ve lu ikpan i ter na, a na imôngo, ve yem ken Igipiti; yô, shighe la Hadadi lu wanye u kpeghee je.

¹⁸ Nahan ve mough hen Midian ve va hen Paran; ve kua a ior mbagenev hen Paran, ve va ken Igipiti hen Farao tor u Igipiti; a na un ya, shi a na un kwaghyan kua tar kpaa.

¹⁹ Tsô doo Farao a Hadadi kpishi je, a na un idyondon u kwase na, a er, ka idyondon u Tapeneshi, torkwase je la.

²⁰ Idyondon u Tapeneshi la mar un wan iti na er Genubati, kpa Tapeneshi koso un ken ya u tor Farao, nahan Genubati lu ken ya u Farao a ônov mba Farao imôngo.

²¹ Tsô zum u Hadadi ungwa ken Igipiti er Davidi yav a uter nav, man Yoabi kurutya kpaa kpe kera yô, Hadadi kaa a Farao er: Nam gbenda m̱ hide hen tar wam.

²² Nahan Farao kaa a na er: Ka nyi i ban u her a mo je man u nenge u yemen her tar wouwe? A kaa er: Ka ma kwagh ga; nahan kpaa de m̱ yem tsô.

²³ Shi Aôndo ver orgen u hendan a na kpaa, lu Reson wan u Eliada, u a yevese ter na Hada-deser tor u Soba yô.

²⁴ Zum u Davidi lu wuan ve la, a kohol ior a hingir orhemenegh u ikumior i numun gbenda, nahan ve yem sha Damaseku, ve za tema her, ve ya tor hen Damaseku.

²⁵ A lu orihom u Iserael sha ayange a Solomon la cii, shi seer kwaghbo u Hadadi er la kpaa; a tema tor u Shiria, Iserael ndôhôr un ishima je.

²⁶ Yerobiam wan u Nebati, Oreferaim, u hen Sereda, wanakiriki u Solomon, u i yilan iti i ngô na er Serua, kwasecôghol, un kpaa a mough sha u hendan a tor.

²⁷ Kwagh u a na man a mough ahendan a tor yô, Solomon maa Milo, a kondo ihura i gar u ter na Davidi henpe a tsehe yô.

²⁸ Un Yerobiam la lu nomsoor mimi. Solomon nengen er wanye la lu ortom u mimi yô, a ver un er a̱ nengen sha mbatomov mba ken ya u Yosev cii.

²⁹ Tsô hen shighe la, er Yerobiam due ken Yerusalem yô, profeti Ahiya or u Shilo va kohol un sha gbenda; Ahiya haa riga u he iyol; ve lu ken ikôngo ve uhar tseegh.

³⁰ Tsô Ahiya kôr riga u he u a lu a mi iyol la, ande un abamber pue kar ahar.

³¹ A kaa a Yerobiam er: Tôô abamber pue sha ci wou; gadia TER, Aôndo u Iserael, ngu kaan nahan er: Nenge, Me tsuwe tor sha ikev i Solomon Me na u ikwe pue,

³² (kpa una shi a kwe môm sha ci u wanakiriki Wam Davidi man sha ci u Yerusalem gar u ken Iserael cii, u M tsough un la),

³³ sha ci u ve undum ve gur ve civir Ashetaroti, Mgbianaôndo u Mbashidon man Kemoshi aôndo u Moabi man Milkom aôndo u Mbaamon yô; ve zenden sha igbenda Yam ga, ve er kwagh u lu vough sha ashe Am kpaa ga, man ve wa iko sha akaawan a Am man ajiraôron a Am er ter na Davidi er nahan ga.

³⁴ Nahan kpaa, Me ngohol tor sha ikev na kera cii ga, kpa Me taver tor na sha ayange a a lu uma cii, sha ci u wanakiriki Wam Davidi, u M tsuwa, sha ci u a wa iko sha atindi a Am kua akaawan a AM.

³⁵ Kpa Me ngohol tor sha ikev i wan na, Me na u ikwe pue.

³⁶ Wan na yô, Me na un kwe môm, sha u wanakiriki Wam Davidi a̱ lu a imenger sha ishigh Yagh gbem ken Yerusalem, gar u M tsough sha ci Wam iyol Yam sha u Me ver iti Yam ker la.

³⁷ Me tôô u, ú tema tor sha akaa a a sar u ken ishima cii, ú lu tor u Iserael.

³⁸ Man aluer wea ver ato sha kwagh u Me wa u cii, wea zenden sha igbenda Yam, wea eren kwagh u lun vough sha ashe Am ú waan akaawan a Am man atindi a Am iko er Davidi wanakiriki Wam lu eren nahan yô, Me lu a we, Me maa u icôronya, er lu M maa Davidi nahan, Me gema Iserael Me na u.

³⁹ Ka sha ci u kwagh ne Me er tsombor u Davidi ican, kpa á lu gbem ga.

⁴⁰ Tsô Solomon gba nôngon u wuan Yerobiam; nahan Yerobiam mough yevese yem ken Igipiti, hen Shishaki, tor u Igipiti, za lu ken Igipiti zan zan Solomon kar kpen.

⁴¹ Aerenakaa a Solomon agen man akaa a a lu eren cii, kua kwaghfan na, i nger a ken ruamabera u aeren a Solomon la gaa?

⁴² Ayange a Solomon tema tor ken Yerusalem sha Iserael cii yô, kuma anyom akunduahar je.

⁴³ Tsô Solomon yav a uter nav imôngo, i ii un ken gar u ter na Davidi; wan na Rehobiam ya tor sha ityough nagh.