1 Timoteu 6 - ICIGHAN BIBILO

¹ Mba ve lu ikpan, i te ve igbur cii yô, ve̱ nengen uter vev er ve kom hanma ikoiwan cii, sha u i̱ de teren iti i Aôndo man ityesen Na sha dang ga yô.

² Mba ve lu a uter mba nan jighjigh yô, ve̱ de lahan ve er ve mba anmgbianev vev hegen ga, kpa ve̱ hemba eren ve tom, gadia ve mba ve zough a iwasen sha mi la yô, ka mbananjighjigh man mbadoonshima. Tesen akaa ne, shi waan kwagh sha mi kpaa.

³ Aluer or ngu tesen ityesen igen kposo nan kera rumun akaaôron a Ter wase Yesu Kristu a dedoo la shin ityesen i civir Aôndo kpaa ga yô,

⁴ nan ngu moron iyol, kpa nan fa kwagh môm ga; anyimanaikaa doo nan man shi u sendegh kwaghôron sha asemberakaa a ôron kpaa. Iwuhe ka i due ker kua ayôôso man ityuhwanev man u henen akaa a vihin sha or,

⁵ man iyongo i kuren ga hen ior mba i vihi mhen ve, man mimi ve la a saa yô. Mba henen er, u civir Aôndo yô, ka gbenda u zuan a mtsera.

⁶ U civir Aôndo man kwagh a kuman we yô, mtsera ngu sha mi vese.

⁷ Gadia se nyôr ken tar ne a ma kwagh môm ga, u duen yemen a kwagh kpaa se fatyô ga.

⁸ Kpa aluer sea lu a kwaghyan man akondo yô, i̱ kuma se.

⁹ Kpa mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe.

¹⁰ Gadia mise u hanma inja i kwaghbo cii yô, ka inyaregh ki saren. Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo.

¹¹ Kpa we, or u Aôndo yô, yevese akaa ne, gema dondo perapera ityô kua u civir Aôndo man jighjigh u nan man dooshima man ishima i wan man ishima i legh legh kpaa.

¹² Nôngo ityav mbi dedoo mbi jighjigh u nan la, naregh kôr uma u tsôron u i yila u sha mi la gbang, u u pase mpase u dedoo sha mi sha ishigh ki mbashiada kpishi la.

¹³ M ngu wan we kwagh sha ishigh ki Aôndo u A ne akaa cii uma la man shi Kristu Yesu u A er shiada sha ishigh ki Pontiu Pilatu sha mpase u dedoo la mer,

¹⁴ kura tindi ne tsembelee, acôghol a̱ de lu ga zan zan m-ande u Ter wase Yesu Kristu.

¹⁵ Kwagh ne yô, ka Un u ageegh tswen u i wuese Un la, Tor u utor man Ter u uter kpaa, Una va pase un er shighe á va kuma vough yô.

¹⁶ Ka Un tseegh A lu u kpen ga ye, A tema ken iwanger i i gande u mgbôghom her yô. Ma or ngu a nenge a Na ga, á fatyô u nengen a Na kpaa ga, icivir i̱ lu i Na kua tahav kpaa gbem sha won. Amen.

¹⁷ Mba ve lu mbanyarev ken tar u ainge ne yô, wa ve kwagh wer, ve̱ de gengese ayol a ve ga, ve̱ de veren ishima sha inyaregh ki i fe kwagh sha min ken hemen ga la ze, kpa ve̱ ver ishima sha Aôndo u A ne se akaa cii wuee sha u se̱ er kwagh a mi yô.

¹⁸ Ve̱ eren akaa a dedoo ve̱ lu mbanyarev sha aeren a dedoo, ve̱ naan iwua, ve̱ panden kwagh ve̱ naan mbagenev kpaa,

¹⁹ nahan man vea wa imagh ki dedoo sha ci ve ayol a ve ken hemen ye, sha u vea kôr ave sha uma u a lu uma jim la.

²⁰ We, Timoteu, kuran kwagh u i we u sha ikev la. Palegh ayôôso a dang a gbilinigh la man anyimanaikaa a i eren aie sha mi er ka kwaghfan la.

²¹ Mbagenev rumun akaa ne ve pase a je nahan ve tsume gbenda sha kwagh u jighjigh u nan. Mrumun u sha mhôôn a̱ lu sha a ven.