1 Timoteu 5 - ICIGHAN BIBILO

¹ De zehe a organden ga kpa wa a wa nan kwagh er ka ter nahan; er a mbayevikaior kpaa er ka anmgbianev nahan,

² kasev mba ganden kpaa er ka ungô nahan; mbayevkasev kpaa er ka anmgbianev mba kasev nahan sha mlu u wang cii.

³ Wa kasev mba côgholov iko mba ve lu kasev mba côgholov mimi yô.

⁴ Kpa aluer ma kwasecôghol nana lu a ônov shin ônov mba ônov mba nan yô, ve̱ vande henen u eren a ya ve sha mcivir u i civir Aôndo la, ve̱ gema ve̱ wasen mba ve mar ve la, gadia kwagh ne ka kwagh u doon sha ishigh ki Aôndo je.

⁵ U nan lu kwasecôghol mimi nan kera lu a or ga yô, nan ver ishima sha Aôndo, nan taver ishima sha mzamber man msen u eren tugh man atetan.

⁶ Kpa u nan lu kera ke kera yô, nan ngu kpenegh er nan lu uma ne je.

⁷ Wa kwagh sha akaa ne kpaa sha er vea lu a acôghol a wan iyol ga yô.

⁸ Aluer or nana kera nenge sha ior mba nan ga man jim je yô, ka mba ken ya u nan la, nan nyiman jighjigh u nan ve, nan hemba gban kera a or u nan ne jighjigh ga yô.

⁹ I̱ de ngeren ma kwasecôghol u nan yen anyom akunduatar ga; man i̱ lu kwase u nan er nom môm yô,

¹⁰ u i er nan shiada sha aeren a dedoo, er nan lu yesen ônov mba nan man nan lu eren a mbavannya dedoo man nan lu ôôn uicighanmbaiorov angahar, man nan lu wasen mbaatsanev man nan lu pendan ishima sha hanma ieren i dedoo cii.

¹¹ Kpa kasev mba côgholov mba ve lu a mhem iyol yô, venda, gadia zum u asaren a ve la aa urugh ve sha u ve̱ de kwagh u Kristu yô, á sar ve u eren nom,

¹² nahan ve kpela ibo sha ayol a ve gadia ve undu jighjigh ve u nan u hiihii la.

¹³ Man shi kwagh ugen kpaa, ka ve hen u lun gbilin yô, man u gbaan zenden sha uya uya tsô, man ve kera lu gbilin tseegh ga, ve eren angereke shi ve amber sha akaa, ve lamen ve teren akaa a a doo ga yô.

¹⁴ Nahan yô, sarem pe kasev mba côgholov mba ve lu a mhem iyol yô, ve̱ er noov, ve̱ mar ônov, ve̱ nengen sha uya vev, ve̱ de ne orihom ian i lamen dang ga.

¹⁵ Gadia kera je kpaa mbagenev tsume ve gema ve dondo Satan.

¹⁶ Aluer kwase u nan jighjigh nan ngu a kasev mba côgholov sha ikev yô, nana̱ wasen ve, i̱ de ze nongo u Kristu iyol ga, nahan nongo u Kristu ua wase mba ve lu kasev mba côgholov mimi yô.

¹⁷ Mbatamen mba ve nengen sha ior dedoo yô, i̱ wa ve iko kwa har je, jim yô, ka mba ve lu pasen kwaghaôndo shi ve lu tesen kpaa la.

¹⁸ Gadia icighanruamabera kaa er: Bua u shoghol iyiagh yô, i̱ de we un kper sha zwa ga, man shi orshirentom nan kuma injar i nan.

¹⁹ Sha kwagh u ortamen yô, de gbe rumun ma ibo i i ne nan ga saa sha zwa u ushiada uhar shin utar.

²⁰ Mba ve eren isholibo yô, yange ve sha ishigh ki ior cii man mbagenev kpaa vea cia ye.

²¹ M ngu wan we kwagh sha ishigh ki Aôndo man Kristu Yesu kua uicuwanmbatyomov mba Shaav mer, kura atindi angan, de gbe kuren kwagh sha mhange u i hange u la tsô ga, de eren ma kwagh sha msange u sha dooshima kpaa ga.

²² De pende or ave sha ityou gagh ga, de nyer nongo a orgen sha isholibo i nan ga, kura iyol you wang.

²³ De kera me mngerem tseegh ga, maan wain côhin côhin kpaa sha ci u iyav ou kua ukorkor mba ve kenden we ken iyol sha ashighe ashighe la.

²⁴ Ior mbagenev yô, asorabo a ve nga ken igbar je nga hemen ve u zan ken ijir, kpa mbagenev di yô, asorabo a ve gema dondo ve ijime.

²⁵ Kape aeren a dedoo kpaa ka a lu ken igbar je la, a a lu nahan ga la kpaa, u yeren a yô, á fatyô ga.