1 Timoteu 1 - ICIGHAN BIBILO

¹ Paulu, apostoli u Kristu Yesu sha imo i Aôndo Oryiman wase man shi Kristu Yesu, ishimaverenkeghen yase,

² ngu sughun Timoteu, ka wan wam mimi sha jighjigh u nan. Mrumun u sha mhôôn man mhôônom ma zungwen man bem mba ve dugh her Aôndo Ter man Kristu Yesu Ter wase ve̱ lu sha a we.

³ Lu ken Efese her, er m wa u kwagh zum u m moughon u yemen Masedonia la, sha u ú ta ior mbagenev icin er ve de̱ tesen ityesen igen kposo ga,

⁴ shi ve de̱ veren ishima sha ukwaghhir man icombor i ôron i lun a mkur ga la ze. Akaa ne ka a na anyiman a gbilinigh tsô, i kera lu ityesen i Aôndo i sha jighjigh u nan la ga.

⁵ Kpa ishimaveren i ityesen ne yô, ka dooshima u a dugh ken ishima i wang, man imo i dedoo i ken ishima man shi jighjigh u lun a imanger ga la.

⁶ Mbagenev undu akaa ne, mba masen ôron akaa a gbilinigh tsô.

⁷ Sar ve pe ma ve lu mbatesen atindi kpa ve fa akaa a ve lu ôron la ga man shi kwagh u ve lu pasen sha gbashima la kpaa ve fa un ga.

⁸ Se fa, atindi doo tsô, aluer or nana er tom a mi sha tindi yô.

⁹ I fa kwagh ne nahan er, i ver tindi ka sha ci u or u nan lu u perapera la ga, kpa ka sha ci u mbavendan atindi kua mbahembanato, man shi mba ve vende Aôndo kua mbaasorabo man shi mbalun wang ga kua udangmbaiorov man shi mbawuanuter kua mbawuanungô kua mbawuanior,

¹⁰ man mbaerenidya man mbayaven a nomso man mbaiin ior yemen a mi, man mbaerenaie, man mbabumun sha aie, man shi mbaeren hanma kwagh ugen cii u alu sha ityesen i dedoo la ga yô.

¹¹ Ka sha inja i Loho u Dedoo u iengem i Aôndo u i wuese Un la u i nem sha ikev la.

¹² M ngu wuese Un u A nem agee la, ka Kristu Yesu Ter wase, gadia A nenge er m ngu jighjigh, A verem sha tom,

¹³ shin er yan m lu or u ityuhwan, man or u tôvon mbagenev a ican man shi ipilaor nahan kpaa. Kpa i zungwem mhôônom gadia m lu eren sha lan man sha jighjigh u nan ga kpaa.

¹⁴ Kpa mrumun u sha mhôôn u Ter wase ngee gande man jighjigh u nan kua dooshima mba ve lu ken Kristu Yesu la.

¹⁵ Kwaghôron ne ka u jighjigh, a kuma u rumun un a ishima i môm er Kristu Yesu va shin tar sha u yiman mbaasorabo, man ken ve yô, ka mo m hembe ye.

¹⁶ Ka nahan man i zungwen mhôônom ye, ka sha u Yesu Una tese ishimawan Na cii ken mo u m hembe ne, i̱ hingir mbagenev ikav mba vea mase va nan Un jighjigh sha u zuan a uma u tsôron yô.

¹⁷ Icivir man iengem i̱ lu i Tor u tsôron u A lu u kpen ga, u i nengen a Na kpaa ga, u A lu Aôndo, Un tswen, gbem sha won. Amen.

¹⁸ Wan wam Timoteu, m ngu wan we kwaghwan ne, m ngu nan we sha ikev, ka kwagh môm a akaa a i tsengaôron sha a we sha kwaghôron u profeti la, nahan i̱ lu sha akaa ne man ú nôngo ityav mbi dedoo,

¹⁹ ú lu a jighjigh u nan man imo i dedoo i ken ishima ye. Mbagenev ta i kera, nahan sha kwagh u jighjigh u nan yô, tso ur ve.

²⁰ Himeneu man Alekesander kpaa mba ken ve. Ve yô m na ve sha ikev i Satan sha u i̱ tese ve, ve̱ de ityuhwanev.