1 Samuel 9 - ICIGHAN BIBILO

¹ Tsô orgen lu ken Benyamin, iti na er Kishi, wan u Abiel, wan u Seror, wan u Bekorati, wan u Afia, Orbenyamin, lu ornyar.

² A lu a wan, iti na er Saulu, lu kwaor, doo ashe tsung; ken Mbaiserael ma or hemba doon ashe a na ga, a tav a kar ior mbagenev cii hii sha avandeaveegh yem sha.

³ Tsô ujaki mba Kishi, ter u Saulu la, ve saa. Nahan Kishi kaa a wan na Saulu er: Yô, mough a ortom môm, za ker nen ujaki.

⁴ Tsô a mough a kar sha tar u iwoogh u Eferaim, shi a kar hen tar u Shalisha kpaa, kpa ve zua a mi ga; nahan ve kar hen tar u Shaalim, kpa ve lu heregh ga; a shi a kar ken tar u Mbabenyamin, kpa ve zua a mi ga.

⁵ Er ve za ar ken tar u Sufi yô, Saulu kaa a wanakiriki na u a lu a na imôngo la er: Sé hide, sha er terem a̱ de kera hundu ishima sha ujaki kera, ishima i̱ gema i̱ nyian un a vese ga.

⁶ Ngula gema kaa a na er: Nenge, or u Aôndo ngu ken gar ne, mba wuese un mimi; kwagh u ka una kaa yô, a er sha mi vough; nahan sé za her, alaghga una fatyô u pasen se kwagh sha zende wase ne.

⁷ Tsô Saulu kaa a wanakiriki na la er: Man aluer sé za yô, ka nyi sé za na or laa? Gadia bredi kpaa bee ken akpa ase, man ma iwua i sé za na or u Aôndo la kpaa ngi ga; ka nyi se lu a mini?

⁸ Tsô wanakiriki la gema kaa a Saulu er: Nenge, m ngu a môm sha unyiin u shekel u azurfa, ka un me na or u Aôndo la, sha u a̱ pase se kwagh sha zende wase ne ye.

⁹ (Ngise ken Iserael yô, or a za sha u za pinen Aôndo kwagh yô, nan kaa nahan er: Sé za nen hen Ornengen; gadia or u i yer nan er profeti ainge yô, i yilan nan er Ornengen.)

¹⁰ Tsô Saulu kaa a wanakiriki na er: U kaa sha mi; va, sé za. Tsô ve za hen gar u or u Aôndo lu her la.

¹¹ Er ve lu unden igungu kôndon sha gar yô, ve kohol mbayevkasev, lu duen sha u za kesen mngerem, ve pine ve er: Ornengen ngu her kpa?

¹² Ve gema ve kaa er: Ngu her; ngula sha hemen la; yô, za nen fefa, gadia ka nyian je a nyer ken gar ye; ior mba nan nagh ku sôngon sha ijiir i taven sha nyian.

¹³ Né nyôron ken gar yô, né kohol un, er a lu a unde ijiir i taven sha, sha u za yan kwagh ga yô; gadia ior vea gba yan ga, saa una za ve, gadia ka un a veren nagh ku sôngon doo doo man mba i lehe ve la ve masen yan ye. Yô, kôndo nen je, gadia ka hen shighen ne je né kohol un ye.

¹⁴ Tsô ve kôndo sha gar; mba nyer ken gar yô, Samuel due di sha u una unde sha ijiir i taven sha la, maa a zua a ve.

¹⁵ Iyange i Saulu lu a va ga la, TER vande pasen Samuel er:

¹⁶ Kper er hegen nahan, Me tindi u a or u ken tar u Benyamin, shighe un mkurem sha u a̱ lu orhemen u ior Av Iserael yô, ka wen una yima ior Av sha ikev i Mbafiliti ye; gadia M nenge ior Av, mliam vem kôndo ar her a Mo je.

¹⁷ Er Samuel nenge a Saulu yô, TER kaa a na er: Nenge, ka or u M ter u kwagh na Mer: Una tema tor sha ior Av je ne.

¹⁸ Tsô Saulu kporom hen Samuel hen hunda, a kaa er: Shi tesem henpe ya u Ornengen a lu yô.

¹⁹ Samuel gema kaa a Saulu er: Ka mo Ornengen je ne; kar hemen nen mo, sé unde nen sha ijiir i taven sha, gadia nyian né ya kwaghyan a mo imôngo; kper pepe yô, me na u gbenda, me ôr u akaa a a lu u ken ishima cii.

²⁰ Sha kwagh u ujaki ou mba ve saa i kom ayange atar nyian ne yô, ishima i̱ de kera nyian we a ve ga, gadia i zua a mi. Akaadoon a ken Iserael cii yô, ka a ana? Kera ka a ou kua a ya u teru cii kpaa gaa?

²¹ Saulu gema kaa er: Mo m ngu Orbenyamin ken ankwe u a hembe ndahar ken ikwe i Iserael cii gaa? Ipaven wam kpaa ka u hemban ndahar ken uipaven mba ken kwe u Benyamin cii gaa? Ka nyi u er imbakwagh ne a mo nahana?

²² Tsô Samuel kua a Saulu man wanakiriki na la, nyôr a ve ken iyou i mbavannya, a ver ve ve tema a mba i lehe ve la hen ijiir i i hembe lun a icivir yô, lu ior er ikundugber nahan.

²³ Tsô Samuel kaa a or u yôron iwer la er: Tôô kwar u m ne u, m kaa u mer, lu a mi la.

²⁴ Tsô oryôroniwer la tôô namegh ku atsaan, ver Saulu sha ishi. Samuel kaa er: Nenge, ka kwagh u i tsegh un, i ver sha ishigh you ye, ya; gadia i vande veren we un je er i va kuma hen shighe ne vough, zum u m kaa mer: M lôhô ior la. Tsô Saulu ya kwaghyan vea Samuel sha iyange la.

²⁵ Er ve hungwa sha ijiir i taven sha ve nyôr ken gar yô, a za ôr kwagh a Saulu sha tembeyough u sha.

²⁶ Tsô ve mough pepe; ka kom sha use nahan yô, Samuel yila Saulu sha tembeyough u sha, kaa er: Mough sha, m̱ ver u gbenda. Tsô Saulu mough; ve uhar cii, un vea Samuel ve due ken won.

²⁷ Mba ngur senen ken kpegar yô Samuel kaa a Saulu er: Kaa a wanakiriki wou a̱ kar sha hemen kpeghee (tsô a kar); kpa we yô, tile heen, m̱ ôr u mkaanem ma Aôndo.