1 Samuel 8 - ICIGHAN BIBILO

¹ Tsô er Samuel bee iyol yô, a ver ônov nav tema mbaajiriv sha Iserael.

² Iti i wan na u iunda er Yoel; iti i idyondon na la, er Abia; ve lu mbaajiriv hen Bersheba.

³ Ônov nav yô, zaan sha gbenda na vough ga, kpa ve tsume sha inyaregh ki keren, ve ngohol inyaregh ki yamen ishô, ve vihin ijir.

⁴ Nahan mbatamen mba Iserael cii kohol va hen Samuel hen Rama.

⁵ Ve va kaa a na er: Nenge, u bee iyol, man ônov ou mba zan sha gbenda wou ga; yô, ver se tor u nana ôron se ijir yô, er akuraior agen kpaa a eren nahan.

⁶ Kwaghôron la vihi Samuel ishima u ve kaa er: Na se tor u nana ôron se ijir la. Tsô Samuel sôn TER.

⁷ TER gema kaa a Samuel er: Ver ato, ungwa hanma kwagh u ior vea kaa u cii; gadia ka we ve vende ga, kpa ka Mo ve vende er M̱ de lu tor ve ga ye.

⁸ Sha akaa a ve er cii, hii sha iyange i M due a ve ken tar u Igipiti la je zan zan nyian, er ve lu tan Mo kera civir mbaaôndo mbagenev nahan, kape we kpaa ve er a we la.

⁹ Yô, ver ato sha kwaghôron ve; nahan kpaa wa ve kwagh gbar gbar, tese ve inja i tor u nana tema tor ve la.

¹⁰ Tsô Samuel ôr mba ve ker tor her a na la akaaôron a TER la cii.

¹¹ A kaa a ve er: Ungwa nen inja i tor u nana tema tor sha a ven la: nana ngohol ônov enev mba nomso nana ver ve, vea hingir mba nan, sha u ve̱ nengen sha akeke a nan kua anyinya a nan; vea zan ayem sha hemen u akeke a nan kpaa;

¹² shi nana ver ve vea hingir nan mbahemenev mba sha ior dubu dubu man mba sha ior akunduahargber akunduahargber; nana ver mbagenev sha u kahan nan sule man u sundan nan iyiav man shi u varen nan ikav mbi utyav kua ikav mbi akekeautya a nan kpaa.

¹³ Nana ngohol ônov enev mba kasev vea hingir mbanungwan nan akaa a shighen iyol man mbayôroniwer man mbaerenbredi.

¹⁴ Nana ngohol ne ishule man ikon i wain man ikon i olev i i hembe doon la, nana na mbatomov mba nan.

¹⁵ Nana tsuwan môm-ken-upue u iyiagh yenegh man u ishule yen i wain, nana na mbaeren nan tom ken iyou i nan kua mbatomov mba nan.

¹⁶ Nana ngohol ikpan yen i nomso man i ukase man mbayevikaior enev mba hemban doon ashe kua ujaki enev, nana wa ve ken tom u nan.

¹⁷ Nana ngohol môm-ken-upue u ilev yenev; ne ayol a en kpaa né hingir mbatomov mba nan.

¹⁸ Sha iyange la né vaa sha ci u tor u ne tsough la; TER kpaa Una kera ungwa imo yen sha iyange la ga.

¹⁹ Nahan kpaa ior venda u rumun imo i Samuel; ve kaa er: Ei! Se yô, ka se pe lun a tor,

²⁰ sha u se kpaa se̱ hingir er akuraior agen cii nahan; tor wase a̱ ôron se ijir, a̱ hemen se, a̱ nôngo ityav sha ci wase.

²¹ Tsô Samuel ungwa akaaôron a ior la cii, nahan a gema a kimbir kwagh la sha ato a TER.

²² Tsô TER kaa a Samuel er: Er sha imo ve, na ve tor. Nahan Samuel kaa a ior mba Iserael er: Gba yemen nen tsô, hanma or a̱ yem hen ya u nan.