1 Samuel 6 - ICIGHAN BIBILO

¹ Areki u TER lu ken tar u Mbafiliti iwer itiankarihiar.

² Tsô Mbafiliti yila upristi kua mbakpehenasor, ve pine ve er: Sé er a Areki u TER ne nana? Kaa nen se kwagh u sé er man sé hide a na hen ijiir na yôô?

³ Ve kaa er: Aluer nea naan areki u Aôndo u Iserael gbenda yô, de ne nen un gbenda gbilin ga; shin a lu nan nan kpaa, na nen Un nagh ku iboogh, tsô, angev mbua bee ne, man shi né fa ityôikaa i uwegh Nagh ku kar sha a ven kera ga la.

⁴ Tsô ve pine er: Ka nyi nagh ku iboogh sé na Unu? Ve kaa er: Ka imor i zenaria itian kua ihyev i zenaria kpaa itian, sha iyenge i utor mba Mbafiliti; gadia ityôuange môm kôr ne cii kua utor enev.

⁵ Ka nahan man né er ieev mbi imor yen kua ieev mbi ihyev yen i i vihin tar la, man né civir Aôndo u Iserael ye; alaghga Una tôô uwegh Nagh sha a ven kera man sha mbaaôndo enev kua sha tar wen kpaa.

⁶ Ka nyi man ne cighir asema er Mbaigipiti kua Farao lu ve cighir asema nahana? Zum u A er akaakpilighyol her a ve la, nahan ve na ior gbenda er ve̱ yem gaa?

⁷ Nahan hegen yô, nôngo, er nen ikyekye i he, kôr ibua i amben ônov, i i lu a har i igbur sha mon mayange ga yô, zer i sha ikyekye, kôr ônov mba i, hide a mi hen ya.

⁸ Yô, tôô areki u TER penda sha ikyekye; wa akaa a i er sha zenaria, a ne va na Un nagh ku iboogh a mi la, ken adudu, ver hen kpe na; tindi, i̱ yem a mi kera.

⁹ Man nenge, aluer ia yem sha gbenda u ken tar na, hen Bete-Shemeshi yô, nahan ka Wen je A er se zegekwaghbo ne ye; kpa aluer ka nahan ga yô, se fa ka uwegh Nagh ku tsaha se ga; kwagh ne gba tseren se tsô.

¹⁰ Tsô ior la er nahan; ve kôr ibua ihiar i amben ônov, ve zer i sha ikyekye, ve wuhe ônov mba i ken ya;

¹¹ ve penda areki u TER sha ikyekye kua adudu u i we ihyev i sha zenaria man ieev mbi imor ve shimi la.

¹² Ibua la kôr gbenda u zan vegher u ken Bete-Shemeshi jighilii, i lu vaan yemen sha igbudu, kaha ken uwegh ku yanegh shin ku imesegh kpaa ga; utor mba Mbafiliti kpaa dondo sha i zan zan za ar hen ape tar u Bete-Shemeshi va kighir yô.

¹³ Yô, ior mba Bete-Shemeshi lu sundan alakema ve shin pev; mba kenden ashe sha yô, ve nenge areki la, man er ve nenge a mi yô, ve ember.

¹⁴ Ikyekye la nyôr ken sule u Yosua or u Bete-Shemeshi, za tile ker, zegeiwen lu her; tsô ve ar ikon i ikyekye la, ve na TER nagh ku nanden sha ibua la.

¹⁵ Mbalevi hungwa a areki u TER, man adudu u a lu a na imôngo la, u ikav mbi zenaria lu ker la, ve penda ve sha zegeiwen la; nahan ior mba Bete-Shemeshi na TER iniav mbi nanden, kua iniav mbi sôngon sha iyange la.

¹⁶ Er utor mba Mbafiliti mba utaan mbala nenge nahan yô, ve hide ken Ekeron sha iyange la je.

¹⁷ Imor i zenaria i Mbafiliti na TER nagh ku iboogh a mi yô, ka i ne; i môm sha ci u Ashedodi, i môm sha ci u Gasa, i môm sha ci u Ashekelon, i môm sha ci u Gati, i môm sha ci u Ekeron;

¹⁸ man ihyev i zenaria, sha iyenge i agar a Mbafiliti cii a a lu sha ikev i utor mba utaan mbala la, agar a lun a ugir kua agar a kiriki a ken won kpaa. Zegeiwen u ve penda areki u TER sha mi la, ngu shiada her zan zan nyian ken sule u Yosua or u Bete-Shemeshi la.

¹⁹ Tsô A wua ior mba Bete-Shemeshi sha ci u ve kenger areki u TER yô; A wua ior akunduatargber, ior akunduahargber sha dubu; nahan ior zungwe sha ci u TER A woo ior kpishi yum yô.

²⁰ Nahan ior mba Bete-Shemeshi kaa er: Ka an nan fatyô u tilen sha ishigh ki TER, Aôndo u wang, nee? Una mough hen a vese heen yô, Una kôndo Una za sha unô?

²¹ Tsô ve tindi mbatyomov hen mba ve lu ken Kiriati-yearim la, ve kaa er: Mbafiliti hide a areki u TER ve; yô, sen va tôô nen, kôndo nen a mi sha a ven.