1 Samuel 4 - ICIGHAN BIBILO

¹ Kwaghôron u Samuel samber hen Iserael cii. Tsô Iserael za nôngo ityav a Mbafiliti, ve za haa afo hen Ebeneser; Mbafiliti haa di afo hen Afeki.

² Tsô Mbafiliti samber ityav a Iserael; zum u ityav za gigh yô, Mbafiliti hemba Iserael, ve wua ior er dubu unyiin nahan ken ikôngo.

³ Zum u ior hide hen afo yô, mbatamen mba Iserael pine er: Ka nyi man TER A er Mbafiliti ve hembe se nyian nahana? Yô, sé za tôô nen areki u ikuryan u TER ken Shilo, sé va nen a mi heen, a̱ va nyôr hen atô wase, a̱ yima se sha ikev i mbaihomov asev.

⁴ Tsô ior tindi loho hen Shilo, i za va a areki u ikuryan u TER u akum a Sha u A tem hen atô u ucerubi la; ônov mba Eli mba uhar mbala, Hofeni man Pinehashi, ve lu a areki u ikuryan i Aôndo.

⁵ Zum u areki u ikuryan u TER va nyôr hen afo yô, Iserael cii ger je, inya tenger.

⁶ Er Mbafiliti ungwa igeren la nahan yô, ve kaa er: Inja i igeren i ken afo a Mbaheberu la, ka nyi? Tsô, ve kav er i za ve a areki u TER ken afo yô.

⁷ Mbafiliti cia, gadia ve kaa er: Aôndo va hen afo a ve. Shi ve kaa er: Kwagh tser se ve, gadia imbakwagh ne ngi a vande eren ga.

⁸ Kwagh tser se ve! Ka an nana shi yima se sha ikev i mbaaôndo mba ageev mbana? Mban ka mbaaôndo mba iyange ve tim Mbaigipiti sha hanma injacan ken desereti je ne.

⁹ Taver nen asema, lu nen nomsombaiorov, ne Mbafiliti, sha er né hingir ikpan i Mbaheberu er ve ve lu i yen nahan ga; lu nen nomsombaiorov, nôngo nen ityav.

¹⁰ Tsô Mbafiliti nôngo ityav, ityav hemba Iserael; hanma or yevese yem hen tenti u nan; i wua ior kpishi; gadia ken Iserael ior mba zan angahar kpe dubu ikundugber.

¹¹ Man shi i ngohol areki u Aôndo; ônov mba Eli mba uhar mbala, Hofeni man Pinehashi kpaa, i wua ve.

¹² Tsô, Orbenyamin u ken utya gber ayem va ken Shilo sha iyange shon la a akondo a anden iyol man inya sha ityou.

¹³ Er a va ar yô, Eli tema hen ijiir na i teman sha gbenda, lu keghen; gadia ishima lu nyian un a areki u Aôndo. Tsô er or la va ôr kwagh la ken gar yô, gar cii ger mliam.

¹⁴ Er Eli ungwa er i ger mliam nahan yô, a pine er: Ka nyi injaayôôso nee? Tsô or la va fese va kaa Eli.

¹⁵ Eli lu anyom akunduanyiingber kar anigheni; ashe a na hingir gang, kera fan ityô u nengen kpaa ga.

¹⁶ Or la kaa a Eli er: Ka mo m dugh ken utya nyian je m yevese ken utya ye. Tsô a pine er: I er nana, wan wama?

¹⁷ U a va a loho la gema kaa er: Iserael yevese Mbafiliti; i wua ior kpishi, ônov ou mba uhar Hofeni man Pinehashi ve kpe, areki u Aôndo kpaa i ngohol kera.

¹⁸ Tsô er a ter areki u Aôndo yô, a segha sha kwaghteman na, a gba hen kpehunda, a sombo mon, a kpe; gadia lu or u been iyol je, man yuhwa kpaa. A lu orjir hen Iserael anyom akunduahar.

¹⁹ Kwase u wan na Pinehashi, lu iyav kuma u maren je; zum u a ungwa loho er i ngohol areki u Aôndo man ter u nom na kua nom na kpaa ve kpe yô, a shirigh inya, a mar; gadia martoghol kôr un.

²⁰ Tsô er a lu nôngon ku la yô, kasev mba ve tile a na her la, ve kaa a na er: De cie ga, gadia u mar wannomso. Kpa a bugh zwa ga, a ver ishima her kpaa ga.

²¹ Tsô a ii wan la iti er: Ikabodi, a kaa er: Icivir kar hen Iserael kera, sha ci u i ngohol areki u Aôndo, man sha ci u kwagh u ter u nom na kua nom na la kpaa.

²² A kaa er: Icivir kar hen Iserael kera ve, gadia i ngohol areki u Aôndo.