1 Samuel 30 - ICIGHAN BIBILO

¹ Tsô zum u Davidi a ior nav ve va ar hen Shikelagi sha iyange i sha utar la yô, Mbaamaleki vande van ityav ken Imbusutariyan la, kua sha Shikelagi kpaa; ve hemba Shikelagi, ve nande un sha usu;

² ve kôr kasev kua mba ve lu ker cii yô, mbakiriki kua mbavesen, ve wua ma or ga, ve kura ve cii, tsô ve gba yemen.

³ Zum u Davidi a ior nav ve va hen gar la yô, nenge, gar vande hian sha usu ve; kasev vev kua ônov vev mba nomso man mba kasev, i kura ve.

⁴ Tsô Davidi kua ior mba ve lu a na imôngo ve ger mliam, zan zan ve kera lu a agee iyol a shi vaan ga.

⁵ Kasev mba Davidi uhar kpaa, i kura ve, Ahinoam u Yesereel kua Abigail kwase u Nabal u Karmel.

⁶ Ishima lu nyian Davidi tsung, gadia ior lu ôron er vea ta un awen; gadia asema vihi ior cii, hanma or sha ci u ônov mba nan mba nomso kua mba kasev; kpa Davidi taver ishima na ken TER, Aôndo na.

⁷ Tsô Davidi kaa a pristi Abiatar, wan u Ahimeleki er: Shi vam a efodi. Nahan Abiatar tôô efodi va na Davidi.

⁸ Davidi pine TER, er: Aluer me zenda ior mban ijime yô, me kohol ve kpa? A rumun A kaa a na er: Zenda; gadia mimi je ú kohol kpee, man ú yima ve kpaa.

⁹ Tsô Davidi za, un a ior deri ataratar mba ve lu a na imôngo la, ve va ar hen uwagh u Besor, ve undu mba ve gba ijime her.

¹⁰ Kpa Davidi zenda ve ijime, un a ior deri unyiin; gadia ior deri uhar vôr, ve fatyô u peren uwagh u Besor ga, ve lu ken ijime.

¹¹ Tsô ve kohol or u Igipiti ken ikôngo ve va a na hen Davidi, ve na un kwaghyan, a ya, ve na un mngerem kpaa, a ma;

¹² ve na un vegher u ijentur u uman man asume a atam a wain a uman ahar; ye yô, hide taver un iyol, gadia ahô atar je a ya kwagh ga, a ma mngerem kpaa ga.

¹³ Nahan Davidi pine un er: U ngu u ana? Man ka han u dughu? A kaa er: Mo m ngu wanye u Igipiti, m ngu kpan u Oramaleki; orvesen wam gbihim sha ci u angev kôrom, nyian ka ayange atar je ne.

¹⁴ Se za ityav ken Imbusutariyan i Mbakereti, man ken tar u Yuda kpaa, kua ken Imbusutariyan i Kalebu, se nande Shinkeragi sha usu.

¹⁵ Davidi pine un er: Tsô ú za a mo zan zan hen ikumutya la kpa? A kaa a na er: Yô, bum Aôndo a mo wer, ú wuam ga man shi ú nam sha ikev i orvesen wam kpaa ga, yô, me za a we hen ikumutya la.

¹⁶ Tsô ze a na yô, nenge, ve haa inya jir jir, ve lu yan kwagh, man kwagh, eren iniongo sha ishar i kpishi i ve kura ken tar u Mbafiliti man tar u Mbayuda la.

¹⁷ Nahan Davidi hii u wuan ve aikighe u corododo la je, zan zan kper nan iyange i bee; mô ve môm war ga; saa mbayevikaior deri unyiin mba ve henda urakumi, ve yevese ve war ye.

¹⁸ Davidi ngohol akaa a Mbaamaleki ve kura la cii; Davidi yima kasev nav mba uhar mbala kpaa.

¹⁹ Kwagh môm saa ve ga, u kiriki shin u vesen kpaa ga, shin ônov mba nomso shin mba kasev, shin ishar, shin nyityôkwagh i ve kura la kpaa ga; Davidi hide a mi cii.

²⁰ Shi Davidi ngohol iyôngo kua ibua cii; ve hule i ve kar a mi sha hemen, ve kaa er: Ingin ka ishar i Davidi je ne.

²¹ Tsô Davidi va ar hen ior mba deri uhar mba ve vôr, ve fatyô u zan a Davidi ityô ga la, ve mba i undu ve hen uwagh u Besor la; ve due sha u za keghen Davidi kua ior nav mba ve lu a na la, gbenda; er Davidi va ar hen ior mbala yô, a sugh ve.

²² Tsô aferaior kua agbilinaior a a lu a mba ve za a Davidi imôngo la, ve gba kaan er: Er ve ze a vese imôngo ga yô, se kpaa sé na ve kwar u ishar i se ngohol la ga, kpa á na hanma or kwase u nan kua ônov mba nan ve̱ yem a mi tsô.

²³ Kpa Davidi kaa er: Anmgbianev av, ka ape né er sha kwagh u TER A ne se ne ga; A kor se, A ne se ior mba ve ve ityav mbi nôngon a vese la sha ikev kpaa.

²⁴ Ka anti je nana wa imo yen iko sha kwagh nee? Gadia er kwar u un u a ze ityav u lu nahan, kape kwar u un u a tem hen uika kpaa u lu la; vea ya vough.

²⁵ Tsô hii hen iyange la zan zan ken hemen á lu nahan; a ver kwagh ne, hingir tindi kua ieren i Iserael zan zan nyian.

²⁶ Er Davidi za ar hen Shikelagi yô, a pande ishar la, a tindi a mi hen mbatamen mba Yuda, mba ve lu akar a na la, a kaa er: Ingin ka iwua i i dugh i sha ishar i mbaihomov mba TER, i ne ne ye.

²⁷ A tindi a mi hen mba ve lu ken Betel man mba ve lu ken Ramoti u Imbusutariyan la, man mba ve lu ken Yatir,

²⁸ man mba ve lu ken Aroer, man mba ve lu ken Shifemoti, man mba ve lu ken Eshetemoa,

²⁹ man mba ve lu ken Rakal, man mba ve lu ken agar a Mbayerameeli, man mba ve lu ken agar a Mbakeni

³⁰ man mba ve lu ken Horma, man mba ve lu ken Borashan, man mba ve lu ken Ataki,

³¹ man mba ve lu ken Heberon, kua hen ajiir cii, a Davidi iyol na kua ior nav ve lu zan keke la.