1 Samuel 29 - ICIGHAN BIBILO

¹ Tsô Mbafiliti kohol akumautya ve cii hen Afeki; Iserael kpaa haa afo hen kpehwembe u ken Yesereel.

² Atiator a Mbafiliti kar uderi uderi man udubu udubu; Davidi a ior nav yô, ve kar ken ijime a Akishi imôngo.

³ Nahan atiator a Mbafiliti pine er: Mbaheberu mban yô, ka nyi ve eren heene? Nahan Akishi kaa a atiator a Mbafiliti la er: Ka Davidi wanakiriki u tor u Iserael u a lu a mo ayange shin anyom kar je gaa? Man m zua un a ma ibo ga, hii sha iyange i a va kohol mo zan zan nyian.

⁴ Kpa asema vihi atiator a Mbafiliti a na tsung; nahan atiator a Mbafiliti gema kaa a na er: I̱ na or ne gbenda, a̱ hide hen ijiir na henpe u ver un yô, a̱ de zaan ityav a vese ga, sha er a̱ de kera za hingir orihom wase ken utya ga yô; gadia ka sha nyi je, man or ne una za zua vea ter na, á kera lu sha ityouv mbi ior mban gaa?

⁵ Ngun kera ka Davidi u i ter un icam sha amar er: Saulu wua udubu nav; Davidi yô, wua udubu pue pue, ne gaa?

⁶ Tsô Akishi yila Davidi, kaa a na er: Er TER A lu u uma ne, u ngu ormimi, mdugh wou kua mnyer wou a mo imôngo ken akumautya a doom, gadia m zua u a ibo ga, hii sha iyange i u va kohol mo la je zan zan nyian; nahan kpaa atiator rumun we ga.

⁷ Yô, hide gba yemen doo doo hegen tsô, de vihin atiator a Mbafiliti ishima ga.

⁸ Tsô Davidi kaa a Akishi er: M er nyi? Man ka nyi u zough a mi ken wanakiriki wou sha ayange a m lu a we imôngo zan zan nyian, er i rumun er m̱ za ityav hen mbaihomov mba terem, tor ga?

⁹ Akishi gema kaa a Davidi er: M fa u ngu ormimi sha ashe a am, er ortyom u Aôndo nahan; nahan kpaa atiator a Mbafiliti kaa er: Un a̱ de ze a vese imôngo ken utya ga.

¹⁰ Yô, mough pepe pepe, a mbayev mba teru mba ve ve a we imôngo la, mough nen pepe dindee, á va wanger yô, yem nen.

¹¹ Nahan Davidi mough pepe pepe, un kua ior nav, sha u vea hide vea yem ken tar u Mbafiliti pepe pepe yô. Mbafiliti kôndo yem sha Yesereel.