1 Samuel 27 - ICIGHAN BIBILO

¹ Nahan Davidi kaa ken ishima na er: Iyange igen me kpe sha ikev i Saulu; guda me yevese me yem ken tar u Mbafiliti, nahan Saulu una hunde ishima a mo, ken tar u Iserael cii, una kera kerem ga; ka nahan man me war sha ikev na ye.

² Tsô Davidi mough, per a ior deri ataratar mba ve lu a na imôngo la, kar yem hen Akishi wan u Maoki, tor u Gati.

³ Nahan Davidi tema a Akishi hen Gati, un a ior nav, hanma or a ior mba nan; Davidi lu a kasev nav uhar Ahinoam wan Yesereel, man Abigail u ken Karmel, kwase u Nabal la.

⁴ Tsô i kaa Saulu er Davidi a yevese a yem ken Gati yô; nahan a kera za ker un ga.

⁵ Nahan Davidi kaa a Akishi er: Aluer a doo u a mo yô, rumun, i̱ nam ijiir i teman ken ma gar u ken toho, er me tema ker yô; gadia ka sha ci u nyi man wanye wou a tema ken gar u tor, a we imôngo?

⁶ Tsô Akishi na un Shikelagi sha iyange la; ka nahan man Shikelagi a lu sha ikev i utor mba Yuda zan zan nyian ye.

⁷ Ayange a Davidi tema ken tar u Mbafiliti yô, lu inyom i môm man iwer inyiin.

⁸ Davidi a ior nav, ve duen ve yemen ityav ken Mbageshur, man Mbagirshi kua Mbaamaleki; gadia ka mbala hii teman ken tar la ngise je ye, aluer u kar sha Shur zan zan u va hen tar u Igipiti yô.

⁹ Nahan Davidi vihi tar la, de ma nomsoor shin ma kwase uma ga, a kura ilev kua ibua man ujaki man urakumi kua akondo, tsô a hide a kar a va hen Akishi.

¹⁰ Akishi pine er: Ka han ne za nenge ityav nyiana? Davidi kaa er: Ka ken imbusutariyan i Yuda, man ken imbusutariyan i Mbayerameeli man ken imbusutariyan i Mbakeni.

¹¹ Davidi de ma nomsoor shin ma kwase uma, sha u van a mi ken Gati ga; a kaa er: Ve̱ de va pasen kwagh wase, ve̱ kaan er: Kape Davidi a er ne ga. Kape ieren na i lu ne, sha ayange a a lu ken tar u Mbafiliti la cii.

¹² Akishi na Davidi jighjigh, kaa er: A er kwagh na a ndôhôr ior nav, Iserael, ishima doo doo ve; nahan una hingir wanye wam gbem je.