1 Samuel 25 - ICIGHAN BIBILO

¹ Tsô Samuel kpe; nahan Iserael kohol cii, ve vaa ku na, ve ii un hen ya na ken Rama. Tsô Davidi mough sen shin desereti u Paran.

² Yô orgen lu ken Maon, kpa akaa a na yô, lu ken Karmel, or la lu ornyar kpe kpe, lu a iyôngo dubu utar, ivo dubu môm, lu tôndon iyôngo na aive ken Karmel.

³ Iti i or la er Nabal, iti i kwase na er Abigail; un yô, lu kwase u fan kwagh mimi, doo ashe kpaa; kpa or la yô, lu nomor, wa tswam kpishi, aeren a na doo ga, a lu Orkalebu.

⁴ Tsô Davidi ungwa agwa ken desereti er, Nabal ngu tôndon iyôngo na aive.

⁵ Nahan Davidi tindi mbayev pue; Davidi kaa mbayev er: Za nen hen Karmel, nyôr nen hen Nabal, sugh nen un nam;

⁶ shi kaa nen un ner: Se sugh u! Bem a̱ lu sha a we, bem a̱ lu sha ya wou man shi bem a̱ lu sha akaa a u lu a mi cii.

⁷ Ka hegen m ongo er u lu a mbatôndon aive ye; mbakuranilev ou tsa her a vese, kpa se nzughul a ve ga, ma kwagh saa ve ga, sha ayange a ve lu ken Karmel cii.

⁸ Pine mbayev ou, tsô vea kaa u; nahan yô, i̱ doo u a mbayev mban; gadia se va sha iyange i ember; yô, shi na mbayev ou kua wan wou Davidi hanma kwagh u u nenge i doo u yô.

⁹ Tsô mbayev mba Davidi mba va nyer yô, ve ôr Nabal akaaôron la cii ken iti i Davidi, maa ve huan.

¹⁰ Tsô Nabal gema kaa a mbayev mba Davidi er: Ka an nan lu Davidi? Man ka an nan lu wan u Yese? Ikpan ngee hen ayange ne, i i yevese uter vev yô.

¹¹ Nahan, m̱ tôô bredi wam man mngerem am kua inyam i m senge mbatôndon mo iyôngo aive, m̱ na ior mba m fe henpe ve dugh ga la ha?

¹² Tsô mbayev mba Davidi gema kôr gbenda ve ave, ve hide, ve va ôr un nahan cii.

¹³ Nahan Davidi kaa a mbayev nav er: Hanma or nana̱ kange sanker u nan iwenge. Nahan hanma or kange sanker u nan iwenge; Davidi kpaa kange sanker na iwenge; ior mba ve dondo sha Davidi yô, kuma er deri unyiin nahan; deri uhar gema lu her, lu nengen ikav.

¹⁴ Kpa wanye ugen va kaa Abigail, kwase u Nabal la, er: Nenge, Davidi tindi mbatyomov, ve mough ken desereti, ve va sugh ter wase; kpa a gema a nyoon ishima a ôr kwagh a ve caver caver.

¹⁵ Man ior mbala ve er a vese doo doo mayange ve nzughul a vese ga; ma kwagh kpaa saa se sha ayange a se lu a ve imôngo, zum u se lu ken desereti la ga.

¹⁶ Ve hingir se gilgar tugh man tetan kpaa, sha ayange a se lu a ve, se kuran ilev la.

¹⁷ Hegen yô, hen, fa kwagh u ú er yô, gadia i wa ishima u eren ter wase kwagh u vihin kua ya na cii kpaa; gadia un ka gbilinor je, gande u á ôr kwagh a na.

¹⁸ Tsô Abigail tôô ikpenbredi deri uhar fefa kua akpa a wain ahar man iyôngo itian i i vande sôngon i i bur dedoo yô, man alakema u kaan uikaren utaan, man asume a atam a wain a ombor deri man azen a atam a tur a uman deri uhar, a penda akaa la cii sha ujaki.

¹⁹ Nahan a kaa a mbayev nav er: Hemen nen, mo me vaan ne ijime. Kpa a kaa nom na Nabal kwagh môm ga.

²⁰ Tsô er a lu yemen sha jaki lu senen hen pev u huwa u uwoogh yô, Davidi a ior nav di kpaa sen va due sha a na, nahan a za kohol ve.

²¹ Yô, Davidi vande kaa er: Mimi je, lu m nyoon iyol gbilin m kura akaa a or ne a lu a mi ken desereti cii, je ma kwagh na môm saa un ga, kpa a gema a er a mo dang sha erdoo wam a na la.

²² Yô, Aôndo A̱ er a mbaihomov mba Davidi nahan, shi i̱ hemba nahan kpaa, aluer akaa a na a a lu a mi cii mea de wanye na u nomso môm tsô nana̱ lu uma her, man sev á mase aven yô.

²³ Er Abigail nenge a Davidi yô, a hungwa sha jaki fefa, a gure a kuma icul inya, sha ishigh ki Davidi, a gure inya je.

²⁴ A gba un hen angahar, a kaa er: Terem, ibo ne ka sha a mo i lu ye, ka sha ityough yagh je, shi de kpan wou u kwase a ôr u kwagh sha ato ou, shi ungwa kwaghôron u kpan wou u kwase kpaa.

²⁵ M ngu zamber we, terem a̱ de veren ishima sha Nabal, gbilinor la ga, gadia er iti na i lu nahan, kape un kpaa a lu la; gadia inja i iti na er ibumegh, man ibumegh ki a na; kpa mo kpan wou u kwase yô, m nenge a mbayev mba terem a tindi la ga.

²⁶ Hegen yô, terem, mimi je, er TER A lu u uma ne, man we kpaa u lu uma ne yô, ka TER A yange u ike i awambe man iyevoron sha uwegh ough iyol you ye; yô, mbaihomov ou man mba ve keren terem a ifer la, ve̱ hingir er Nabal nahan.

²⁷ Iwua i kpan wou u kwase a va ne ter na ne yô, i̱ gema i, i̱ na mbayev mba ve zenden a terem ityô ne.

²⁸ Shi de kpan wou u kwase kwaghbo na; gadia TER Una maa terem ya u taver dông kpee je; gadia terem ngu nôngon ityav mbi TER; nahan sha ayange a ou cii á zua a ifer her a we mayange ga.

²⁹ Man shi aluer or á mough sha u zendan we ijime, keren we a ku kpaa, ma i kange uma u terem ken ile u mbaumav a TER, Aôndo wou, imôngo; kpa uma u mbaihomov ou Una ta ve kera sha ihuren i mzu.

³⁰ Tsô zum u TER Una er terem akaaôron a i ter sha a we ne cii, man shi Una ver u tor sha Iserael kpaa yô,

³¹ kwagh ne una hingir we u vaan afanyô sha mi man u vihin terem ishima kpaa ga, er u za haa awambe sha ityôikaa ga, man er terem a za or iyev iyol na kpaa ga yô. Man shi zum u TER Una er a terem doo doo yô, umbur kpan wou u kwase ne.

³² Tsô Davidi kaa a Abigail er: I̱ wuese TER Aôndo u Iserael, u A tindi u nyian er ú va keghem gbenda ne!

³³ I̱ wuese kwaghfan wou shi i wuese we iyol you kpaa; we u u yangem ike i awambe nyian, man u oron iyev yam sha uwegh agh kpaa yô!

³⁴ Gadia mimi je, er TER, Aôndo u Iserael u A yangem u eren we kwagh u bo, A lu u uma ne, ka er u er fefa sha u va keghen mo gbenda yô, gayô, mimi je shighe u sev á av yô, ma wanye nomso môm ma a shi her hen Nabal ga.

³⁵ Tsô Davidi ngohol kwagh u a ve un a mi la hen uwegh nagh, akaa a na er: Hire hen ya wou doo doo; nenge, m ungwa imo you, m rumun we kpaa.

³⁶ Er Abigail hide hen Nabal yô, Nabal lu eren iniongo hen ya na er ka iniongo i tor yô; yô, Nabal kpaa ishima lu un saan saan, gadia lu hunden tsung; nahan a ôr un ma kwagh je ga, zan zan sev av.

³⁷ Tsô sev mbu aven wain samben Nabal ashe yô, kwase na ôr un akaa la, ishima na maa hume, a hingir er iwen nahan.

³⁸ Tsô, ayange nga kar er pue nahan, TER tsaha Nabal maa a kpe.

³⁹ Er Davidi ungwa er Nabal a kpe yô, a kaa er: I̱ wuese TER u A kurum ijir sha ilyahan i Nabal a laham a mi la, man A yange wanye Na u eren ifer kpaa yô; kpa TER hide a ifer i Nabal sha ityough nagh. Nahan Davidi tindi i ôr kwagh a Abigail, er sar un pe eren un.

⁴⁰ Tsô mbayev mba Davidi va hen Abigail hen Karmel, va ôr kwagh a na, ve kaa er: Ka Davidi a tindi se her a we ye, er se̱ va kua a we ú za lu kwase na.

⁴¹ Nahan a mough a gure a kuma ishigh inya, a kaa er: Nenge, kpan wou u kwase ngun, ka kpankwase u una ôôn mbayev mba terem angahar tsô.

⁴² Nahan Abigail mough fefa, henda jaki a ikpan i ukase na itian i i lu a na ityô, yô, a dondo sha mbatyomov mba Davidi; a za hingir kwase na.

⁴³ Davidi vande eren Ahinoam u ken Yesereel; ve uhar cii ve hingir kasev nav.

⁴⁴ Saulu vande tôôn Mikal, wan na u kwase, kwase u Davidi la, na Palti u Laishi or u Galim er.