1 Samuel 24 - ICIGHAN BIBILO

¹ Saulu zende Mbafiliti ityô hir yô, i kaa un er: Nenge, Davidi ngu ken desereti u En-gedi.

² Tsô Saulu kua a ior dubu utar, uicuwanmbaiorov mba i sange ve a sange ken Iserael cii, gba za keren Davidi a ior nav sha Avande a Ashim.

³ Nahan a va ar hen atôraiyôngo sha gbenda henpe bar lu yô; tsô Saulu nyôr kimi sha u una za wanger iyol. Yô, Davidi a ior gema lu ken ape bar kure la.

⁴ Tsô ior mba Davidi kaa a na er: Nenge, ka iyange shon i TER lu kaa a we er: Me na orihom wou sha ikev you, er a na sha ishima you, je ne. Tsô Davidi mough nyighaa tôndo tsumbuikondo u Saulu.

⁵ Tsô, ken masetyô yô, ishima na Davidi ibo sha ci u a tende Saulu tsumbuikondo yô.

⁶ Nahan a kaa a ior nav er: TER A̱ yangem er me er terem kwagh ne ga yô, ka or u TER, u i shigh un mkurem yô, me bende uwegh agh sha a na ga; gadia un ka or u TER, u i shigh un mkurem je yô.

⁷ Ka sha akaaôron ne man Davidi yange ior nav ye, a rumun er ve̱ ta num sha Saulu ga. Tsô Saulu mough due ken bar la kôr gbenda ave.

⁸ Ken masetyô la Davidi kpaa due ken bar la, gba yilan Saulu, a kaa er: Tor, terem! Saulu gem ashe yô, Davidi gure wa ityough inya je, a gure a ta inya.

⁹ Shi Davidi gema kaa a Saulu er: Ka nyi u ongo alam a ior mba ve kaan a we er: Ka Davidi ka eren we kwaghbo?

¹⁰ Nenge, nyian yô, u nenge sha ashe ou je er TER A ne u sha ikev yam nyian ken bar ne yô; mbagenev je yô, ve kaa a mo er, m̱ wua u; kpa m de u; m kaa mer, me bende uwegh agh sha terem ga, gadia un ka or u TER, u i shigh un mkurem je.

¹¹ Nenge ase, terem, een, nenge tsumbuikondo wou sha uwegh agh; gadia er m tende u tsumbuikondo je, kpa m wua u ga, yô fa, man shi kav kpaa er ma ifer shin ibo i lu her a mo ga yô, m er u kwaghbo ga, shin er u tev uma wam a ku nahan kpaa.

¹² Yô, TER A̱ kure kwagh wam vea we ne, man shi TER A̱ or u iyev sha ci wam; kpa uwegh agh yô, kua bende sha a we ga.

¹³ Bee injakwagh i ior mba ngise kaa er: Ka hen mbaaferev ifer i dugh ye. Kpa uwegh agh yô, kua bende sha a we ga.

¹⁴ Ka sha u tôvon anti ityô, tor u Iserael a dughu? Man ka anti u ye nan akishi angahara? Ka iwa i kpene! Ka palegh mômô!

¹⁵ Yô, TER A̱ lu orjir, A̱ kure kwagh wam vea we ne; A̱ nenge, A̱ ôr kwagh wam, A̱ yimam sha ikev you.

¹⁶ Tsô er Davidi kure u ôron Saulu akaa ne yô, Saulu gema kaa er: Ka imo you la, wan wam Davidi? Nahan Saulu gba vaan genger genger.

¹⁷ A kaa a Davidi er: U hembam perapera, gadia u er a mo doo doo, kpa mo yô, m er a we dang.

¹⁸ Nyian yô, u pase gbar gbar je, er u er a mo dedoo yô; er TER A nem sha ikev you nahan kpaa, u wuam ga.

¹⁹ Gadia aluer or á tser orihom u nan, nahan nana de un er a̱ yem dedoo kpa? Yô, TER A̱ ver u doo doo sha kwagh u u er a mo nyian ne.

²⁰ Hegen yô, nenge, m fa mimi je, ú ya tor, tartor u Iserael kpaa ua taver sha uwegh ough.

²¹ Yô, bum ase a mo hegen sha iti i TER wer, ú tim tsombor wam ken ijime yam kera ga, shi ú ese iti yam ken ya u terem kera ga.

²² Tsô Davidi bum a Saulu. Nahan Saulu yem hen ya; kpa Davidi a ior nav yô ve mough ve yem ken ijiir i yeren sha uwo.