1 Samuel 23 - ICIGHAN BIBILO

¹ Tsô i kaa a Davidi er: Nenge, Mbafiliti mba nôngon ityav a Keila, mba va kuran ve akaa sha avande a gbiren alakema.

² Nahan Davidi pine imo i TER, a kaa er: M̱ za, m̱ za wua Mbafiliti mban shinii? TER kaa a Davidi er: Za, za hemba Mbafiliti, yima Keila.

³ Kpa ior mba Davidi kaa a na er: Nenge, ken Mbayuda heen kpaa, se mba a mciem iyol man hire aluer se za hen Keila, se za nôngo num a Mbafiliti.

⁴ Tsô Davidi shi pine imo i TER. TER kaa un er: Mough, sen shin Keila, gadia Me na Mbafiliti sha ikev you.

⁵ Nahan Davidi kua ior nav ve za hen Keila, ve za nôngo ityav a Mbafiliti, ve za kula ve ilev, ve wua ve kpishi. Kape Davidi yima mba ve lu ken Keila la.

⁶ Tsô shighe u Abiatar, wan u Ahimeleki, yevese va hen Davidi ken Keila la, a lu a efodi.

⁷ Tsô i va ôr Saulu er, Davidi va hen Keila. Nahan Saulu kaa er: Aôndo na un sha ikev yam kera ve; gadia a wuhe iyol na je, er a nyer ken gar u lun a ihinda i iyôô kua uishindan mba iyôôv yô.

⁸ Tsô Saulu yila ior cii er ve̱ va ityav, vea za hen Keila sha u vea za kase Davidi a ior nav yô.

⁹ Kpa Davidi fa er Saulu a we kwaghbo ishima a na yô, nahan a kaa a pristi Abiatar er: Va a efodi heen.

¹⁰ Nahan Davidi kaa er: TER, Aôndo u Iserael, wanakiriki wou ungwa mimi je, er Saulu ngu nôngon u van hen Keila sha u va timin gar ne sha ci wam.

¹¹ Shin ior mba Keila vea nam sha ikev naou? Shin Saulu una sen er wanye wou a ongo nahanou? TERE, Aôndo u Iserael, shi kaa wanakiriki wou. Tsô TER kaa er: Una sen.

¹² Nahan Davidi pine er: Ior mba Keila vea nam sha ikev i Saulu a ior ava? TER kaa er: Vea na u.

¹³ Tsô Davidi a ior nav, ve lu er deri ataratar nahan, ve mough ve due ken Keila, ve gba zenden wue wue pe ve kercio u zan cii. Tsô i ôr Saulu er Davidi due ken Keila war; nahan a kera za ga.

¹⁴ Tsô Davidi tema a ne nagh ken toho man ken ajiir a yeren a sha iwo, kua sha tar u iwoogh ken desereti u Shiv. Saulu gba keren un ayange ayange; kpa Aôndo na un sha ikev na ga.

¹⁵ Davidi kav er Saulu a dugh sha u keren un a ku yô, Davidi gema lu ken desereti u Shiv ken Horeshi.

¹⁶ Tsô Yonatan wan u Saulu, mough za hen Davidi hen Horeshi, za taver un ishima ken Aôndo.

¹⁷ A kaa a na er: De cie ga, gadia uwegh ku terem Saulu kua zua a we ga; ú tema tor sha Iserael, mo me gema me dondo sha a we, terem Saulu kpaa fa nahan.

¹⁸ Nahan ve uhar ve ya ikur sha ishigh ki TER; tsô Davidi tema shin Horeshi, kpa Yonatan gema hide hen ya na.

¹⁹ Tsô Mbashiv va hen Saulu hen Gibea, ve va kaa er: Kera ka her a vese, Davidi a yer ken ajiir a yeren a ken Horeshi, sha igungu u Hakila, u a lu ikôngough vegher u ken imbusutariyan la gaa?

²⁰ Nahan tor, ishima a lu u, u senen yô, sen; se yô, sé na un sha ikev i tor.

²¹ Tsô Saulu kaa er: Iveren i TER i̱ lu sha a ven, gadia mhôônom kôr ne a mo.

²² Yô, shi za nen, shi za seer fan nen doo doo, fa nen, nenge nen ijiir na i yeren, man or u nan nenge a na her la kpaa; gadia i kaam er a wa ayom mimi.

²³ Ver nen ishima fa nen ahoghol a a yeren cii, man shi hide nen her a mo kpee je, man me za a ven imôngo ye; tsô aluer una lu ken tar la yô, me tôv un angahar ken udubu dubu mba Mbayuda cii.

²⁴ Nahan ve mough ve vande yemen a Saulu u zan hen Shiv; kpa Davidi a ior nav ve lu ken desereti u Maon, hen Araba, ikôngough vegher u ken imbusutariyan la.

²⁵ Saulu a ior nav ve za u za keren un. I ôr Davidi; nahan a sen a va shin vande, a va tema ken desereti u Maon. Er Saulu ungwa nahan yô, a gba tôvon Davidi ijime ken desereti u Maon.

²⁶ Tsô Saulu kar vegher uwo u keen, Davidi a ior nav gema lu vegherwo u keela; Davidi mough hen ijiir la fefa, lu cian Saulu; gadia Saulu a ior nav ve kase Davidi a ior nav sha u vea kôr ve yô.

²⁷ Kpa ortyom ugen va hen Saulu, va kaa a na er: Va fefa, gadia Mbafiliti va haa ityav ken tar la.

²⁸ Nahan Saulu de u zendan Davidi ijime, hide yem u za nôngon ityav a Mbafiliti. Ka nahan man i ii ijiir la iti er, Vande u Mwar ye.

²⁹ Tsô Davidi maa mough heera, za tema ken ajiir a yeren a En-gedi.