1 Samuel 22 - ICIGHAN BIBILO

¹ Tsô Davidi mough haala, yevese va hen bar u Adulam; er anngôôv nav kua ya u ter na cii ve ungwa yô, ve va her a na.

² Man hanma or u ican i tser nan, man u nan ye anzô, man hanmô u ishima i vihi nan kpaa, ve va kohol un, maa a hingir orhemen ve; ior er deri unyiin nahan lu a na.

³ Tsô Davidi mough haala yem hen Misepa u Moabi; a za kaa a tor u Moabi er: Shi rumun terem kua ngôm ve̱ tema a ven zan zan me kar fan kwagh u Aôndo Una er a mo ve.

⁴ Tsô a va a ve sha ishigh ki tor u Moabi; nahan ve tema a na ayange a Davidi lu ken baruwoogh la cii.

⁵ Profeti Gadi kaa a Davidi er: De tem ken bar ne ga; mough yem ken tar u Yuda. Nahan Davidi maa mough a va ken ikô i Hereti.

⁶ Tsô Saulu ungwa er i za zua a Davidi kua ior mba ve lu a na imôngo cii; her ayange la yô, Saulu tema ken Gibea shin itine i tsamia, sha igungu, lu a iwange na sha uwe, mbayev nav cii tile kase un.

⁷ Tsô Saulu kaa a mbayev nav mba ve kase un la er: Ungwa nen ase, ne Mbabenyamin; wan u Yese ne, una na hanmô wen ishule man ikon i wain, una ver ne cii né hingir mbahemenev mba hemen ior dubu dubu man mbahemenev mba hemen ior deri deri,

⁸ man ne cii ne zua zwa sha a mo, or môm kpaa pasem shighe u wan wam á zough zwa a wan u Yese ga, mô wen kpaa m kôr nan mhôônom ga, or môm kpaa pasem er wan wam a tor wanye wam ityô er a̱ lu ihom a mo, a̱ yer a keghen mo, er i lu nyian ne gaa?

⁹ Tsô Doegi, Oredom, u a tile a dondo a mbayev mba Saulu la, gema kaa er: M nenge a wan u Yese lu van ken Nobu hen Ahimeleki wan u Ahitubi.

¹⁰ A sôn TER sha ci na, shi a na un kwaghyan u gbenda man a na un sanker u Goliati Orfiliti la.

¹¹ Tsô tor tindi er i̱ za yila pristi Ahimeleki, wan u Ahitubi kua ya u ter na cii, ka upristi mba ve lu ken Nobu je la; nahan ve cii ve va hen tor.

¹² Tsô Saulu kaa er: Ungwa ase, we wan u Ahitubi. A kaa er: M ngun, terem.

¹³ Saulu pine un er: Inja na nan man ne zough zwa sha a mo, we man wan u Yese, sha er u ne un bredi kua sanker, shi u sen Aôndo sha ci na, sha u a̱ hendan a mo, a̱ yer a keghen mo, er i lu nyian nahana?

¹⁴ Tsô Ahimeleki gema kaa a tor er: Ka hanma wanye wou je nan kom u veren ishima sha a nan er Davidi nahana, u a lu wankem u tor, man orhemen u mbakurantor, u a lu a icivir hen ya wou kpaa?

¹⁵ Ka nyian m hii u sônon Aôndo sha ci na yee? Mayange ka nahan ga; tor a̱ de kera ne wanye na ma ibo ga, shin ya u terem cii kpaa ga; gadia akaa ne cii wanye wou fa ma kwagh sha mi ga, kpeghee tsô kpaa ga.

¹⁶ Nahan kpaa tor kaa er: Ú kpe kpee Ahimeleki, we kua ya u teru cii.

¹⁷ Tsô tor gema kaa a mbatyomov mba ve tile a na la er: Gema wua nen upristi mba TER mban, gadia uwegh vegh ku a Davidi imôngo, man sha er ve fe er a yevese, kpa ve pasem ga yô. Kpa mbayev mba tor venda u zan ave, tan num sha upristi mba TER.

¹⁸ Nahan tor gema kaa a Doegi er: Yô, we ta num sha upristi. Tsô Doegi Oredom gema ta num sha upristi; sha iyange la a wua ior akunduanyiin kar utaan mba ve haa efodi u i kor sha ikondo i pupuu yô.

¹⁹ Shi a za tim Nobu, gar u upristi la, sha zwa u sanker, nomso kua kasev, mbayev kua mbamanatumba, man ibua man ujaki kua iyôngo cii, sha zwa u sanker.

²⁰ Kpa wan u Ahimeleki, wan u Ahitubi, ugen u i yila er Abiatar la, war, yevese yem hen Davidi.

²¹ Tsô Abiatar ôr Davidi er Saulu a woo upristi mba TER yô.

²² Davidi gema kaa a Abiatar er: Iyange Doegi, Oredom, lu heregh la, m fa je mer, una ôr Saulu kpee je; m ngu a ibo sha ku u ior hen ya u teru cii.

²³ Lu a mo, de cie ga; gadia u a keren mo a ku la, we kpaa ngu keren we a ku; kpa her a mo yô, ú lu doo doo.