1 Samuel 21 - ICIGHAN BIBILO

¹ Tsô Davidi va hen Nobu hen pristi Ahimeleki; un Ahimeleki va kegh Davidi gbenda gba gbidyen ikarikase iyol, a kaa a na er: Ka nyi u lu tswen, ma or nan lu a we ga nahan?

² Tsô Davidi kaa a pristi Ahimeleki, er: Tor tindim ityom, a kaa a mo er: Or môm nana̱ de fe kwagh sha kwagh u m tindi u sha mi ne ga, man sha kwagh u m kaa u ne kpaa ga; nahan m ver mbayev mape.

³ Man ka nyi u lu a mi heenee? Nam ase ikpenbredi itian sha uwegh agh, shin nyityô kwagh i i lu heen kpaa.

⁴ Tsô pristi gema kaa a Davidi er: Ma bredi ugen m ngu a mi ga, kpa icighanbredi ngu; aluer mbayev vande kuran ayol a ve sha ukase yô, ka sha mi.

⁵ Tsô Davidi gema kaa a pristi la er: Mimi je, se palegh ayol a ase sha ukase ayange atar ne; zum u ka m due yô, ikav mbi mbayev kpaa mbi lu wang, shin er zende u lu icighanzende ga kpaa, nahan man hide nyian ne man ikav vev mbia kera lu wang ga yee?

⁶ Tsô pristi na un icighanbredi; gadia ma bredi ugen lu her ga saa ubredi mba sha ishi mba i tee ve sha ishigh ki TER kera sha ci u á ver mba acivin sha iyange i i tee ve kera la.

⁷ Yô, wanye u Saulu ugen lu her sha iyange la, i timbir un sha ishigh ki TER, iti na er Doegi or u Edom; lu orhemen u mbakuranilev mba Saulu.

⁸ Tsô Davidi pine Ahimeleki er: U ngu a ma iwange shin sanker gaa? Gadia m va a sanker wam shin ma ikav yav mbi tswamev ga, sha ci u ityom i tor i lu fefa yum yô.

⁹ Tsô pristi kaa er: Sanker u Goliati Orfiliti u iyange u wua shin pev u Ela la ngu heen, i kange un ken ikondo, ngu ken ijime i efodi; aluer a sar u pe tôôn un yô, tôô tsô, gadia ugen ngu heen ga saa un. Nahan Davidi kaa er: Mô gen u kuman sha a na ngu ga, nam un.

¹⁰ Davidi maa mough yevese Saulu sha iyange la je, yem hen Akishi tor u Gati.

¹¹ Tsô mbayev mba Akishi kaa un er: Or ne kera ka Davidi tor u hen tar ne, ne gaa? Ka un iyange ve ter un icam i amaregh er: Saulu wua udubu udubu; Davidi yô, wua udubu pue pue, gaa?

¹² Tsô Davidi gba henen akaaôron la ken ishima, gba cian Akishi tor u Gati tsung.

¹³ Nahan a gema inja na sha ishigh vegh, a gba eren er orihundu nahan sha ikev ve, a gba kperan akaa sha ucivir mba sha hundagar, a gba haan azer sha indyer na.

¹⁴ Tsô Akishi kaa a mbayev nav er: Ne nenge or ne ka orihundu je, man ka nyi ne ve a na her a Mo?

¹⁵ Mbaihunduv banem shin ne ve a or ne ner, a̱ va hunde sha ishigh yagha? Ngun di nahan kpaa a nyôr hen ya wama?