1 Samuel 20 - ICIGHAN BIBILO

¹ Tsô Davidi yevese due ken Nayoti u Rama, va va pine Yonatan, er: M er nyi, kwaghbo wam ka nyi? Kwaghbo u m er sha ishigh ki teru man a keren mo a ku la yô, ka nyi?

² A kaa a na er: Mayange je ga, ú kpe ga; terem gbe eren ma kwagh ga, shin u vesen shin u kiriki kpaa, saa ka a vande kaan mo, man ka nyi je terem una yerem kwagh nee? Ka nahan ga.

³ Kpa Davidi bum, kaa er: Teru fa dedoo je er i doo u a mo yô; ngu kaan je er, Yonatan a̱ de fe kwagh ne ga, sha er ishima ia vihi un ga yô; kpa mimi je, er TER A lu u uma, man we kpaa u lu uma ne, mo a ku yô, kuma iavennguhar i môm tsô.

⁴ Tsô Yonatan kaa a Davidi er: Hanma kwagh u a sar u ken ishima yô, me er u un.

⁵ Tsô Davidi gema kaa a Yonatan er: Nenge, kper uwer u he ua due, man ka u me tema kwaghyan a tor kpee je; kpa dem, m̱ za, m̱ za yer ken toho zan zan iyange i sha utar, aikighe.

⁶ Aluer teru una fa er m lu her ga yô, kaa wer: Davidi zamber a mo tsung je er, m̱ rumun, una za ken gar na Betelehem fefa; gadia ka shighen u nan nagh ku sha anyom anyom her, sha ci u ior mba hen ya la cii.

⁷ Tsô aluer una kaa er: Ka sha mi! Yô wanye wou zua a mkpeyol je ve; kpa aluer ishima ia vihi un yô, fa, a wa kwaghbo ishima je ve.

⁸ Yô, gema er a wanye wou dedoo; gadia u vande yan ikur a wanye wou ken TER; kpa aluer ifer ia lu ken mo yô, wuam iyol you; gadia ka nyi je ú shi ú za a mo hen teru kpee?

⁹ Nahan Yonatan kaa er: De henen nahan ga; gadia aluer mea fe mimi, mer, terem wa kwaghbo ishima a we yô, ma m kaa u gaa?

¹⁰ Tsô Davidi pine Yonatan er: Aluer teru una ôr kwagh a we sha ishima i vihin yô, ka an nana kaama?

¹¹ Tsô Yonatan kaa a Davidi er: Va, sé za ken toho; tsô ve uhar cii ve due ve za ken toho.

¹² Tsô Yonatan kaa a Davidi er: TER, Aôndo u Iserael, A̱ lu shiada; shighen u me time kwagh hen terem kper shighe ne nahan, shin sha iyange i atar la, man m nenge a kwagh u tseren Davidi ga yô, me kera tindi á za pase u gaa?

¹³ TER A̱ er a Yonatan nahan, shi i̱ hemba nahan kpaa, aluer terem una wa ishima u eren we kwaghbo man mo kpaa m pase u ga, man m na u gbenda kpaa sha er ú za doo doo ga yô; TER A̱ lu a we er A vande lun a terem nahan.

¹⁴ We kpaa, er m lu uma ne, er a mo sha erdoo u TER, sha er m̱ de kpeen ga yô;

¹⁵ shi de undun erdoo wou a ya wam mayange ga, shin shighe u TER Una tim mbaihomov mba Davidi sha won kera ci ca la kpaa ga.

¹⁶ Tsô Yonatan ya ikur a ya u Davidi, a kaa er: TER Una or iyev sha mbaihomov mba Davidi.

¹⁷ Yonatan shi er Davidi seer bumun sha dooshima u a doo un ishima la, gadia a doo un ishima er iyol na nahan.

¹⁸ Tsô Yonatan kaa a na er: Kper uwer u he ua due; yô, nahan á fa er u lu her ga yô, gadia ijiir you i teman ia lu gbilin.

¹⁹ Sha iyange i sha utar la yô, sen fefa, va hen ijiir i lu u yer, zum u i lu eren kwagh ne ave la; tema hen iwen i Esel.

²⁰ Yô, mo me ker avaan atar hen kpe u i, er m ngu keren ma kwagh yô.

²¹ Nenge, me tindi wanye mer: Za, za ker avaan. Man aluer mea kaa a wanye mer: Nenge, avaan nga u vegher u keen, tsuwa a, yô, nahan gba van tsô, gadia ka bem, kwaghvihin ngu ga, er TER A lu u uma ne.

²² Kpa aluer mea kaa a wanye mer: Nenge, avaan nga u ken hemen keela yô, nahan gba yemen a you tsô, gadia TER na u gbenda je ve.

²³ Sha kwagh u mo vea we, se vande ôron la, nenge, TER ngu hen atô wam vea we gbem sha won.

²⁴ Tsô Davidi yer ken toho. Er uwer u he due yô, tor za tema kwaghyan.

²⁵ Tor tema sha ijiir na i a tem keke la, ka ijiir i teman i i lu hen kpekpe la; tsô Yonatan mough tile sha; Abiner gema tema dondo a Saulu; kpa ijiir i Davidi i teman yô, lu gbilin.

²⁶ Nahan kpaa Saulu ôr ma kwagh sha iyange la ga; gadia lu henen er alaghga ma kwagh er un, ngu wang ga; ngu wang ga mimi je.

²⁷ Tsô kper nan gen u wer u he la, lu ayange ahar la, ijiir i Davidi i teman lu gbilin her tsô. Nahan Saulu pine wan na Yonatan er: I er nan man wan u Yese ne a ve hen kwaghyan ga, nyen kpaa kua nyian kpaa nahana?

²⁸ Yonatan gema kaa a Saulu er: Davidi zamber a mo tsung er una za ken Betelehem;

²⁹ a kaa er: De m̱ shi za, gadia ityô yase ngi a nagh ku nan ken gar; man anngôm iyol na lôhôm er m̱ za; nahan aluer kwagh wam una doo u mimi yô, de m̱ za, m̱ za nenge anngôôv av. Ka nahan man a ve hen tebul u tor ga ye.

³⁰ Tsô ishima gba vihin Saulu a Yonatan tsung, a kaa a na er: We dang wan u hemban ato ne, m vande fan er u tsough wan u Yese sha u ú za due sha kunya wou iyol you kua kunya u idyelegh u ngôu kpaa ga?

³¹ Gadia ayange a wan u Yese a lu uma sha won ne, ú lu taveraa ga, we shin tartor wou kpaa ga. Yô, tindi ase ahegen i̱ va a na her a mô, gadia una kpe kpee.

³² Tsô Yonatan gema kaa a ter na Saulu er: Inja na nan man á wua unu? A er nyi?

³³ Tsô Saulu ker un iwange er una tume un; nahan Yonatan maa fa er ter na a we ishima u wuan Davidi yô.

³⁴ Tsô Yonatan mough hen tebul kera a ishima i vihin tsung, ya ma kwagh sha ayange a uweregh ahar la ga, gadia ishima vihi un sha ci u Davidi, sha er ter na a hee un yô.

³⁵ Tsô, sev mbu av yô, Yonatan za ken toho sha shighe u a ver vea Davidi la, un vea wanye.

³⁶ A kaa a wanye na er: Gber ayem, za tsuwa avaan a me ker yô. Wanye la gbe zan ayem yô, a ker ivaan aver un.

³⁷ Er wanye la za ar hen ijiir i Yonatan ker ivaan za gba la yô, Yonatan yila wanye la pine er: Ivaan la ngi u sha hemen gaa?

³⁸ Yonatan shi yila wanye la kaa a na er: Kar fefa, za ayem, de kera til ga. Tsô wanye u Yonatan tsuwa avaan la hide hen orvesen na.

³⁹ Kpa wanye la kav ma kwagh môm sha mi ga, saa Yonatan vea Davidi tseegh ve fa kwagh la ye.

⁴⁰ Tsô Yonatan na wanye na ikav nav mbi tswamev kaa a na er: Yem a mbi ken gar.

⁴¹ Wanye la yemen kera yô, Davidi mough hen ijiir i hen vegher u imbusutariyan la, a va, a va gure a kuma icul inya, a ngurum kwa tar; ve suse zwa ayol a ve, ve gba vaan ayol a ve, kpa Davidi hemba vaan.

⁴² Yonatan kaa a Davidi er: Za doo doo gadia se bum ayol a ase sha iti i TER ser: TER A̱ tema hen atô wase, mo vea we, man hen atô u tsombor wam a tsombor wou gbem sha won. Tsô a mough, a gba yemen, Yonatan gema hide ken gar.