1 Samuel 2 - ICIGHAN BIBILO

¹ Nahan Hana er msen kaa er: Ishima yam ngi ember ken TER; i kende korough agh sha ken TER. Zwa wam aver sha mbaihomov av gbangeraa, gadia m ngu ember myem u U yemen yô.

² Mô u lun wang er TER nahan nan ngu ga; gadia mô ngu ga, saa We; ma vande u lun er Aôndo wase kpaa ngu ga.

³ De kera shi seer u ôron kwagh sha imanger ga; kwaghôron u iceenegh kpaa a̱ de dugh ken zwa wen ga; gadia TER ka Aôndo u fan kwagh dedoo je, ka Un je A karen aeren ye.

⁴ Mbaada mba ior mbaageev sombo, mba ve nenge gbev yô, i wa ve agee iyol.

⁵ Mba ve idi yô, ve na ayol a ve sha tôndo sha u zuan a kwaghyan, kpa mbajenev yô, ve mem. Een, ikômkwase mar utaankaruhar; kpa wen u a mar ikpelauôn la yô, a ure.

⁶ TER ka A wua, A shi A na uma kpaa; ka A hungwa A or shin Sheol je, shi ka A due a or sha kpaa.

⁷ TER ka A na ican i gba, A shi A na inyaregh ki ngeen kpaa; ka A shirigh a or inya, shi A kende a or sha.

⁸ Ka A dugh icanor shin vuulevu kera, A mough a nan sha. A kende a oribanave shin tihi u ihôgh sha, er ve̱ tema a uityombaiorov imôngo, ve̱ ya dyako sha ikônough ki torough ki engem; gadia ityôv mbi tarev ka mbi TER je, A ver tar sha mbi.

⁹ Una kula angahar a uicighan Nav, kpa mbaaferev yô, vea saa ken ime; gadia a lu sha agee yô, ma or môm nana hemba ga.

¹⁰ Mba ve hendan a TER yô, á her ve, Una dura Sha, sha a ve; TER Una ôr akighir a tar ijir, Una na tor Na agee kpaa, Una kende a korough ku or Na u i shigh un mkurem la, sha.

¹¹ Tsô Elkana yem hen Rama hen ya na. Wanakiriki la gba eren TER tom sha ikev i pristi Eli.

¹² Kpa ônov mba Eli, lu udangmbaiorov, ve fa TER ga.

¹³ Ieren i pristi a ior yô, ka i ne: zum u hanma or nana naan nagh yô, ortom u pristi la a va, er i jiidi inyam i lu sha atse la je, a va a ayari u lun a agbaa atar sha uwe,

¹⁴ a kuma un shin icenge, shin shin itye, shin shin iwese, gayô, shin tsuwa; hanma kwagh u ayari la una due a mi yô, pristi a ver sha ci na iyol na. Kape ve eren hen Shilo a Mbaiserael mba ve vaan her cii la.

¹⁵ Een, er ve lu a nande ahôm ga je kpaa, wanye u pristi la a va a va kaa a or u nan nagh la er: Na inyam i á mgbagh sha ci u pristi yô; gadia una ngohol i jiidi her a we ga, saa i kô.

¹⁶ Man aluer or la nana kaa a na er: Saa á vande nanden ahôm la kpee man ú pande kwagh u a sar u yô, a gema a kaa a nan er: Ei, nam hegen je, ga yô, me ngohol sha apera.

¹⁷ Isholibo i mbayevikaior mbala, i kehe kpishi sha ishigh ki TER; gadia ior gema lu lahan nagh ku TER.

¹⁸ Kpa Samuel yô, lu eren tom sha ishigh ki TER, lu wanye je, a har efodi u sha ikondo i pupuu.

¹⁹ Man ngô na kpaa a koron un togo u kiriki va nan un anyom anyom, zum u una va vea nom na sha u va nan nagh ku sha anyom anyom la.

²⁰ Eli ver Elkana kua kwase na doo doo a kaa er: TER A̱ na u tsombor sha kwase ne sha ityough ki iwasen i u wase TER a mi la. Tsô ve yem hen ya ve.

²¹ Nahan TER va sôr Hana, a shi a mar ônov mba nomso utar man mba kasev uhar. Samuel wanakiriki la, vese sha ishigh ki TER.

²² Kpa Eli bee iyol kpishi; lu ungwan akaa a ônov nav eren a Iserael cii, man shi er ve yaven a kasev mba ve eren tom hen hunda u tenti u kohol ker la kpaa.

²³ Nahan a kaa a ve er: Inja na nan ne eren ambaakaa ne, gadia m ngu ungwan aferakaa a en hen ior mban cii.

²⁴ Ei, ônov av; ka gwa u dedoo m ongo ga; ne mba nan sha u ior mba TER ve̱ er kwaghbo yô.

²⁵ Aluer or nan er orgen isholibo yô, Aôndo Una ôr nan ijir; kpa aluer or nana er Aôndo isholibo yô, ka an nana sôn sha ci u nana? Nahan kpaa ve wa iko sha imo i ter ve ga, gadia TER ver ishima u timin ve.

²⁶ Samuel wanakiriki la vese, TER kua ior kpaa rumun un.

²⁷ Tsô or u Aôndo ugen va hen Eli va kaa a na er: TER ngu kaan nahan er: M pase iyol Yam hen ya u teru gbar gbar, er ve lu ken Igipiti sha ikev i ya u Farao la gaa?

²⁸ Man ken ikwe i Iserael cii m tsuwa un Mer, a̱ hingir pristi Wam, a̱ unden sha atse Am a nanden nagh sha mi, a̱ nanden kwaghhumandoon, man a̱ haan efodi sha ishigh Yagh; shi M na ya u teru iniav mbi usuv mbi Mbaiserael cii.

²⁹ Inja na nan, ne ndyar nagh Agh kua iwua Yam mba M kaa Mer, i̱ eren ken tabernakel Wam la, u gem u hembe civir ônov ou a Mo, ne ye iniav mbi hemban doon mbi ior Av, Iserael, ne kehen a kehee?

³⁰ Nahan yô, TER, Aôndo u Iserael, ngu kaan er: M kaa je Mer, ya wou man ya u teru vea zenden sha ishigh Yagh gbem. Kpa hegen yô, TER ngu kaan er: Á kera lu nahan je ga; gadia mba ve civir Mo yô, Mo kpaa Me civir ve, man mba ve laham yô, vea kera gba kwagh ga.

³¹ Nenge ayange nga van a Me gber ikasewe you, man ikasewe i ya u teru, á kera zua a orbeenyol hen ya wou ga.

³² Ú nenge ican i ia er ijiir Yam i teman la, shin er Una er Iserael akaadedoo nahan kpaa; ma orbeenyol kpaa nana kera lu hen ya wou mayange ga.

³³ Man shi or wou u Me kera wua nan hen atse Am a nanden nagh sha mi ga yô, nana gema á lu sha ci u vihin ashe ou kera man u vihin we ishima kpaa; tsombor u ya wou cii kpaa ua kpe a agee a ve iyol.

³⁴ Kwagh u una hingir we ikav yô, ka kwagh u una er Hofeni man Pinehashi, ônov ou mba uhar mbala: ve uhar cii vea kpe iyange i môm.

³⁵ Yô, Mo Me ver pristi ugen u a kom u veren ishima sha a na, u una er kwagh sha mhen Wam kua sha ishima Yam kpaa yô. Me maa un ya u lun gbem; una zenden sha ishigh ki or wam u i shigh un mkurem la, gbem.

³⁶ Tsô hanma or u nan shi hen ya wou yô, nana va gure un sha ishi sha u nana zua a angbenger u azurfa man kpenbredi; shi nana kaa er: Shi wam ken ma tom u pristi, sha u me zua a ankwaghyan u me ya yô.