1 Samuel 19 - ICIGHAN BIBILO

¹ Tsô Saulu wa wan na Yonatan kwagh kua mbayev nav cii er ve̱ wua Davidi. Kpa Yonatan wan u Saulu yô, Davidi doo un ishima tsung.

² Nahan Yonatan kaa a Davidi er: Terem Saulu ngu keren we a ku; nahan yô, kper pepe, ver ishima sha iyol you, tema ken ijiir i myer, yer her;

³ yô, mo me due me za tile a terem ken akôngo henpe u lu la, me ôr kwagh a terem sha kwagh wou; aluer mea nenge a ma kwagh yô, me kaa u.

⁴ Tsô Yonatan ôr ter na Saulu akaadedoo a Davidi; a kaa a na er: Tor a̱ de kera eren wanye na Davidi kwaghbo ga, gadia a er u kwaghbo ga, aeren a na a we kpaa ka a perapera kpishi je;

⁵ gadia a wa uma na iko ga, a hemba Orfiliti la, nahan TER na Iserael cii mhembe tseer tseer, we kpaa u nenge, u ember je; man ka nyi ú tôô ike i awambe a or u ishôôgh, ú wua Davidi a ityôikaa ga?

⁶ Nahan Saulu ver ato sha imo i Yonatan; Saulu bum kaa er: Er TER A lu u uma ne, á wua un je ga.

⁷ Tsô Yonatan yila Davidi; Yonatan gema pase un akaa la cii. Tsô Yonatan va a Davidi hen Saulu, va lu a na er tsuaa nahan.

⁸ Tsô ityav shi mough; Davidi due za nôngo ityav a Mbafiliti, wua ve je falegh gba, ve yevese un.

⁹ Shi jijingi u bo u a va hen TER gba sha Saulu er a tema ken ya na a iwange na sha uwe yô, man Davidi lu kuhwan kwagh sha uwegh nagh.

¹⁰ Saulu shi nôngo er una tume Davidi iwange i̱ kar i̱ kôr ken kpekpe; kpa a palegh, a kar Saulu sha ishi kera; iwange kar tume ken kpekpe; Davidi yevese, war tugh mbula.

¹¹ Nahan Saulu tindi mbatyomov hen iyou i Davidi er ve̱ za kase un, kper ve̱ wua un pepe; kpa Mikal kwase u Davidi kaa a na er: Aluer ú yima uma wou hen tugh mbun ga yô, kper á wua u.

¹² Tsô Mikal due a Davidi hen ianiyoughough; a yevese, a yem, a war.

¹³ Nahan Mikal tôô eev gbir sha gambe, ver mbu ikondo i sha aive a ivo vegher u sha ityou, cir akondo sha mi.

¹⁴ Er Saulu tindi mbatyomov sha u ve̱ va kôr Davidi, yô, a kaa er: Ngu dedoo ga.

¹⁵ Shi Saulu tindi mbatyomov er ve̱ za nenge Davidi, a kaa er: Tôô un sha gambe na, va nen a na hen mo, m wua un.

¹⁶ Er mbatyomov va nyôr yô, lu eev lu sha gambe ye, man ikondo i sha aive a ivo la lu mbu vegher u sha ityou.

¹⁷ Nahan Saulu kaa a Mikal er: Ka nyi u tsughum nahana, u de orihom wam wer a̱ yem a̱ wara? Mikal gema kaa a Saulu er: A kaa a mo er: Dem m yem m wua u zee?

¹⁸ Kpa Davidi yevese, war, va hen Samuel hen Rama, va ôr un akaa a Saulu a er a na cii. Nahan un vea Samuel ve yem ve za tema ken Nayoti.

¹⁹ Tsô i va ôr Saulu er: Nenge, Davidi ngu ken Nayoti u Rama.

²⁰ Nahan Saulu tindi mbatyomov er ve̱ za kôr Davidi, kpa zum u ve nenge ikpila i uprofeti lu ôron kwaghôron u profeti man Samuel lu hemen ve yô, Jijingi u Aôndo gba sha mbatyomov mba Saulu mbala, ve kpaa ve gba ôron kwaghôron u profeti.

²¹ Er i va ôr Saulu nahan yô, a shi a tindi mbatyomov mbagenev, mbala kpaa shi gba ôron kwaghôron u profeti. Saulu shi tindi mbatyomov kuma acin atar, mbala kpaa shi ôr kwaghôron u profeti.

²² Tsô un kpaa za ken Rama, za ar hen kpe u zegejôr u lu hen Seku la, a pine er: Samuel man Davidi mba hana? Orgen kaa er: Mba ken Nayoti u Rama.

²³ Tsô a kar a gba zan hen Nayoti u Rama; un kpaa Jijingi u Aôndo gba sha a na, lu ôron kwaghôron u profeti yemen, zan zan za ar hen Nayoti u Rama.

²⁴ A er ikav nav kera, a gba ôron kwaghôron u profeti sha ishigh ki Samuel, a yav idyelegh, shi didi, tugh mbula cii lu her nahan. Ka nahan man i kaa er: Saulu kpaa, nyôr nongo a uprofeti?