1 Samuel 18 - ICIGHAN BIBILO

¹ Tsô kur kwaghôron a Saulu yô, ishima i Yonatan maa zua a ishima i Davidi. Davidi doo Yonatan ishima je er ka uma na iyol na nahan.

² Saulu kua a na sha iyange la je, kera rumun er a̱ hide hen ya u ter na ga.

³ Nahan Yonatan vea Davidi ve tôndo zwa ayol a ve, sha ci u a doo un ishima er uma na iyol na yô.

⁴ Yonatan er riga na u a lu a mi iyol la, na Davidi, man akondo a na kua sanker na kpaa, man ada na kua kwange na u shin iwenge kpaa.

⁵ Davidi yô, hanma ijiir i Saulu a tindi un yô, a za; aeren a na kpaa luun sha mi vough; Saulu wa mbanôngontyav sha ikev na, nahan kwagh la doo ior cii, mbayev mba Saulu kpaa doo ve.

⁶ Tsô, er ve hide, man Davidi kpaa hide zum u a wua Orfiliti la yô, kasev due ken agar a Iserael cii gba wan icam vinen amar zan, za keghen tor Saulu gbenda, a anigingav, a iember, man mbaadiguve mba lun a ingyanyinya utar.

⁷ Ken amar la yô, kasev lu wan atsam, mbagenev lu nderan, mbagenev lu rumun, kaan er: Saulu wua udubu udubu; Davidi yô, wua udubu pue pue.

⁸ Nahan ishima vihi Saulu je huan iyol; kwaghôron la lu sha ishima na ga; a kaa er: Ve na Davidi udubu pue pue, kpa mo yô, ve nam udubu udubu tseegh; ka nyi shi i shi unu, ka tor tsô gaa?

⁹ Hii sha iyange la zan zan Saulu gba gohon Davidi ishe i bo.

¹⁰ Tsô kper nan yô, jijingi u bo u a va hen Aôndo, va gba sha Saulu taver je, a gba hunden ken ya na; kpa Davidi gba kuhwan sha uwegh nagh er a eren ayange ayange nahan; Saulu lu a iwange na sha uwe.

¹¹ Nahan Saulu ker iwange la; a kaa er: Me tume Davidi je i̱ kar i̱ kôr ken kpekpe; kpa Davidi palegh kar kera kuma kwa har je.

¹² Nahan Saulu lu cian Davidi sha ci u TER lu a na, kpa A gema A undu Saulu.

¹³ Ka nahan man Saulu kar a na sha ishigh nagh kera, gema ver un orhemen na u sha ior dubu ye; nahan a duen a nyôron sha ishigh ki iorough.

¹⁴ Davidi yô, eren akaa a na cii luun sha mi vough; TER kpa lu a na.

¹⁵ Er Saulu kav er aeren a na a luun sha mi vough yum nahan yô, a cia un.

¹⁶ Kpa Iserael kua Yuda cii, Davidi doo ve ishima; gadia lu duen nyôron sha ishiv vev.

¹⁷ Tsô Saulu kaa a Davidi er: Nenge, Merabi wan wam u kwase u iunda ne, me na u un a̱ hingir kwase wou, kpa lum wanye u taver ishima, nôngo ityav mbi TER. Gadia Saulu kaa er: Uwegh agh ku̱ de kera luun ihom a na ga, i̱ lu uwegh ku Mbafiliti ku̱ lu ihom a na ye.

¹⁸ Kpa Davidi kaa a Saulu er: Mo m ngu nyi, man anmgbianev av, tsombor u terem ngu di nyi ken Iserael je, u me hingir wankem u toro?

¹⁹ Kpa er kuma u á na Davidi Merabi wan u Saulu la yô, i tôô un i na Aderiel or u Mehola er.

²⁰ Kpa Davidi doo Mikal wan u Saulu la ishima; i ôr Saulu nahan, tsô kwagh la doo un.

²¹ Saulu kaa er: Me na un un, a̱ hingir kwagh u hônon un a min, uwegh ku Mbafiliti ku̱ lu ihom a na. Ka nahan man Saulu kaa a Davidi er: Nyian ka kwa har je, u lu wan wam kem ne.

²² Tsô Saulu kaa mbayev nav er: Ôr nen kwagh a Davidi myer, kaa nen ner: Nenge u doo tor ishima kpee, mbayev nav cii kpaa u doo ve ishima; nahan yô, lu wankem u tor.

²³ Tsô mbayev mba tor ôr Davidi akaa la. Kpa Davidi kaa er: U lun wankem u tor ka ne kwagh u kiriki? Gadia mo m ngu icanor, m gba kwagh ga.

²⁴ Tsô mbayev mba Saulu za kaa un er: Ka imbakwaghôron i Davidi a er ne.

²⁵ Saulu shi kaa er: Kaa nen Davidi nahan ner: Inyaregh sar tor ga, saa uipusu mba Mbafiliti deri, sha u oron iyev sha mbaihomov mba tor. Kpa awashima u Saulu yô, lu u nan Davidi er a̱ za kpe sha ikev i Mbafiliti.

²⁶ Er mbayev nav ôr Davidi akaa ne nahan yô, doo Davidi u hingir wankem u tor. Er ayange kpaa lu a kuma ga je tsô,

²⁷ Davidi mough a ior nav za, za wua Mbafiliti ior deri uhar; Davidi va a uipusu vev va na tor nahan vough, er una hingir wankem u tor. Nahan Saulu na un Mikal wan na u kwase a er.

²⁸ Saulu kpaa nenge, kav er TER A lu a Davidi yô, man Mikal wan u Saulu kpaa, Davidi doo un ishima;

²⁹ nahan Saulu shi seer cian Davidi; Saulu lu ihom a Davidi gbem.

³⁰ Tsô atiator a Mbafiliti due; nahan hanma shighe u vea due yô, kwagh a hemba laghen Davidi a mbayev mba Saulu cii, je iti na za gwa kpishi.