1 Samuel 16 - ICIGHAN BIBILO

¹ Tsô TER kaa a Samuel er: Ka hanma shighe je ú de u zungwen Saulu er M vende un u teman tor sha Iseraele? Haa mkurem ken korough ough poo; yô, za, Me tindi u hen Yese or u Betelehem, gadia ka ken ônov nav M tsough tor Wam ye.

² Kpa Samuel gema pine er: Me er na man me zaa? Aluer Saulu una ungwa nahan yô, una wuam. Nahan TER kaa er: Kôr tulebua, za a mi za kaa wer, m va sha u me va na TER nagh.

³ Lôhô Yese nagh kula, Mo kpaa Me tese u kwagh u ú er yô; shighem un u Me ter u un la mkurem.

⁴ Tsô Samuel er kwagh u TER kaa yô, a va hen Betelehem. Mbavesen va kegh un gbenda gba gbidyen akarkase iyol, ve pine un er: U va ka bem je kpa?

⁵ A kaa er: Ka bem; m va sha u me na TER nagh; yô wanger nen ayol, va nen a mo hen nagh ku nan. Tsô a wanger Yese kua ônov nav, a lôhô ve nagh kula.

⁶ Tsô zum u ve va yô, a kenger Eliabi, a kaa er: Mimi je or u TER A shighe un mkurem ngun sha ishigh Nagh ne.

⁷ Kpa TER kaa a Samuel er: De kenger mluyol na ga, shin ityaven na kpaa ga; gadia a kumam ga, gadia mnenge u TER ngu er mnenge u or nahan ga; gadia or nengen mluashe u ken won, kpa TER yô, nengen ken ishima.

⁸ Tsô Yese yila Abinadabi er a̱ kar Samuel sha ishi. Kpa a kaa er: Ngun kpaa TER tsuwa un ga.

⁹ Tsô Yese na Shama er a̱ kar. Kpa a kaa er: Ngun kpaa TER tsuwa un ga.

¹⁰ Yese na ônov nav utaankaruhar er ve̱ kar Samuel sha ishi.

¹¹ Samuel pine Yese er: Ka ve ônov ou cii nee? A kaa er: Mase shin u masetyô tsô, ngu kuran ilev. Nahan Samuel kaa a Yese er: Tindi i̱ za va a na; gadia sé gba teman inya ga, saa una va ve.

¹² Tsô a tindi, i va nyôr a na. Un lu nyian, a doo ashe ikor, doo u kenger. Tsô TER kaa er: Mough, haa un mkurem gadia ka un je ne.

¹³ Tsô Samuel tôô korough ku mkure, a shighe un mkurem hen atô u anmgbianev nav; Jijingi u TER kpaa kende Davidi sha agee, hii sha iyange la je man ken hemen kpaa. Tsô Samuel mough, yem hen Rama.

¹⁴ Kpa Jijingi u TER due hen Saulu kera, TER gema tindi jijingi u bo lu haan un mciem iyol.

¹⁵ Nahan mbayev mba Saulu kaa a na er: Nenge jijingi u bo u a ve hen Aôndo ngu eren we ican.

¹⁶ Yô, ter wase a̱ kaa mbayev nav mba ve lu a na, ve̱ ker or u nan fe molo u kuhwan doo doo yô; nahan shighe u jijingi u bo u a ve hen Aôndo la, una kende u yô, nan gba kuhwan sha uwegh ku nan, tsô á wanger we.

¹⁷ Tsô Saulu kaa a mbayev nav er: Yô, kerem nen ase or u nan fe ityougholov mbi kuhwan dedoo yô, va nen a nan her a mo.

¹⁸ Tsô wanyekwaor ugen gema kaa er: Nenge, m nenge wan u Yese, or u Betelehem, a fa ityougholov mbi kuhwan kpe kpe, ka ortavershima, orutya, or u fan kwaghôron, ka or u kuman ashe kpaa, TER kpaa ngu a na.

¹⁹ Nahan Saulu tindi mbatyomov hen Yese, kaa er: Tindim a wan wou Davidi, u a kor ilev la.

²⁰ Tsô Yese kôr jaki, shi tôô bredi man ikpa i wain kua anivo, tindi Saulu a mi sha ikev i wan na Davidi.

²¹ Tsô Davidi va hen Saulu, va hingir wanye na. Nahan a doo un ishima je; a hingir or u tilin un ikav mbi tswamev.

²² Nahan Saulu tindi hen Yese, kaa er: Shi de Davidi a̱ lu wanye wam, gadia ngu sha ishima yam.

²³ Nahan yô, zum u jijingi u bo u a ve hen Aôndo la, una kenden Saulu yô, Davidi a tôô molo a gba kuhwan sha uwegh nagh; nahan i yôhôl Saulu iyol, a zua a mmem, jijingi u bo kpaa, a undu un.