1 Samuel 15 - ICIGHAN BIBILO

¹ Tsô Samuel kaa a Saulu er: TER tindim sha u m̱ shighe u mkurem u̱ tema tor sha ior Nav Iserael. Hegen yô, ver ase ato sha imo i akaaôron a TER.

² TER u akum a Sha ngu kaan nahan er: M umbur kwagh u Amaleki lu er a Iserael er a ker un iyongo sha gbenda, zum u a due ken tar u Igipiti la.

³ Hegen yô, za, za ta num sha Amaleki, tim akaa a ve lu a mi cii, mhôônom ma de ker u a ve ga. Wua nomsoor kua kwase, wanye kua wanikundan u man atumba, bua kua iyôngo, man rakumi kua jaki kpaa.

⁴ Tsô Saulu yila ior, ôr iyenge ve ken Telaim; ior mba zan angahar lu dubu deri uhar kua ior mba Yuda dubu pue.

⁵ Tsô Saulu va hen gar u Amaleki, va yer ior shin pev.

⁶ Nahan Saulu kaa a Mbakeni er: Mough, yem nen, undu nen Mbaamaleki sha er m̱ de timin ne a ve imôngo ga yô; gadia ne er a Mbaiserael dedoo zum u ve due ken tar u Igipiti la. Tsô Mbakeni mough hen Mbaamaleki kera.

⁷ Nahan Saulu hemba Mbaamaleki, hii hen Havila vegher u zan sha Shur u a lu Igipiti vegher u sha ityoughkitaregh la.

⁸ A kôr Agagu tor u Amaleki la uma, kpa a tim ior mbagenev purututu cii sha zwa u sanker.

⁹ Kpa Saulu kua ior, ve de Agagu uma man iyôngo i hemban doon man ibua man ilev mbi kehen man aniyôngov kua akaa a doon cii, ve tim a ga; kpaa akaa a lu a injaa ga man a dang cii yô, ve tim a purututu.

¹⁰ Tsô kwaghôron u TER va hen Samuel, A kaa er:

¹¹ Gema vihim er M ver Saulu Mer a̱ tema tor yô; gadia a gema a de u dondon sha a Mo, a er sha imo Yam ga. Nahan ishima vihi Samuel; a tsa vaan a TER kaka.

¹² Tsô Samuel nder pepe pepe sha u una za kohol Saulu yô; i va kaa Samuel er: Saulu va hen Karmel, a tim ikav i umbur kwagh heregh sha ci na, a kar, a sen hen Gilgal.

¹³ Tsô Samuel va hen Saulu; Saulu kaa a na er: TER A̱ ver u doo doo, m er sha imo i TER ve.

¹⁴ Nahan Samuel gema pine er: Man inja na nan, m ongo mliam ma iyôngom ken ato a am kua amo a ibua kpaa?

¹⁵ Saulu gema kaa er: I va a mi ken Mbaamaleki; gadia ior tsegha iyôngo kua ibua i hemban doon sha u nan TER, Aôndo wou, nagh a mi; mbigenev yô, se tim mbi purututu.

¹⁶ Tsô Samuel kaa a Saulu er: Tile, m̱ ôr u kwagh u TER A kaam tugh mbu nyian mbun yô. A kaa a na er: Kaa ase!

¹⁷ Samuel kaa er: Er u nenge iyol you kpeghee nahan, u gema u hingir orhemen u ikwe i Iserael gaa? TER kpaa shighe u mkurem ver u tor sha Iserael;

¹⁸ man TER tindi u sha gbenda, kaa er: Za, za tim mbaasorabo purututu, ka Mbaamaleki je la, nôngo ityav a ve zan zan ve̱ bee kera.

¹⁹ Inja na nan u ongo imo i TER ga, u gem u kumbur sha ishar, u er kwaghbo sha ishigh ki TERE?

²⁰ Saulu kaa a Samuel er: Mimi je, m wa imo i TER iko, m za sha gbenda u TER A tindim kpaa, m va a Agagu tor u Amaleki je, m tim Mbaamaleki purututu.

²¹ Kpa ior pande ishar, iyôngo kua ibua, ka akaa a hemban doon ken akaa a i tim a kera je la, sha u nan TER, Aôndo wou, nagh sha mi hen Gilgal.

²² Tsô Samuel kaa er: Iniav mbi nanden kua mbi sôngon, doo TER ishima er iko i wan sha imo i TER nahan kpa? Yô, nenge, iko i wan hemba nagh ku sôngon, man u veren ato kpaa hemba ahôm a anomaiyôngo.

²³ Gadia, u hendan kwagh, ka er ishor i kpehen nahan, man ityough ki taver gema ka er akombo a sôron kua eev mbu civir nahan. Er u vende u ungwan imo i TER yô, Un kpaa A venda u, u shi lun tor.

²⁴ Tsô Saulu kaa a Samuel er: M er kwaghbo; gadia m wa imo i TER kua akaaôron a ou iko ga, sha ci u m cie ior, m er sha imo ve yô.

²⁵ Yô, shi dem isholibo yam, gema hide a mo imôngo er me za sôn TER yô.

²⁶ Kpa Samuel venda a Saulu er: Me hide a we imôngo ga, gadia u venda kwaghôron u TER, nahan TER kpaa venda u u shi lun tor u Iserael.

²⁷ Tsô Samuel gem u una yem yô, a kôr un tsumbu u riga, maa a ande.

²⁸ Nahan Samuel kaa a na er: Nyian TER ande u tartor u Iserael gema na or u nan we ndor a we nan hembe u inja yô.

²⁹ Man shi Agee a Iserael kpaa er aie ga, Una vaa afanyô kpaa ga; gadia Un ka or man Una vaa afanyô ga.

³⁰ Tsô a kaa er: M er kwaghbo; nahan kpaa shi civir mo sha ishigh ki mbatamen mba ior av kua sha ishigh ki Iserael kpaa, gema hide a mo sha er me za sôn TER, Aôndo wou, yô.

³¹ Tsô Samuel gema dondo sha Saulu; Saulu kpaa gure sôn TER.

³² Nahan Samuel kaa er: Va a Agagu tor u Amaleki la her a mo heen. Tsô Agagu va sha ishigh nagh saan saan. Agagu kaa er: Ican i kuugh kar kera je ve.

³³ Kpa Samuel kaa er: Er sanker wou a er kasev ve kera lu a ônov ga nahan, kape ngôu kpaa una hingir u lun a ônov ga ken ukase je la. Tsô Samuel gber Agagu avur avur sha ishigh ki TER hen Gilgal.

³⁴ Tsô Samuel yem hen Rama; Saulu kpaa yem hen ya na, hen Gibea u Saulu.

³⁵ Samuel kera va sôr Saulu ga, zan zan a kar kpen; gadia Samuel lu zungwen Saulu. TER kpaa vihi Un, er A ver Saulu tor sha Iserael yô.