1 Samuel 14 - ICIGHAN BIBILO

¹ Tsô, iyange igen Yonatan wan u Saulu kaa a wanye u tilin un ikav mbi tswamev er: Va sé per sé za ken mbakuran mba Mbafiliti mba ve lu yande keela la. Kpa a kaa ter na ga.

² Saulu yô, tema ken ikighirtar i Gibea shin tine i pomegraneti i i lu ken Migeron la; ior mba ve lu a na imôngo la, ve lu er deri ataratar nahan.

³ Ahia wan u Ahitubi, anngô u Ikabodi, wan u Pinehashi, wan u Eli, pristi u TER ken Shilo, haa efodi. Kpa ior kera fa er Yonatan a yem ga.

⁴ Hen atô u ihigha i i sar Yonatan u karen her zan hen mbakuran mba Mbafiliti la, iwen i horon lu vegher u keen, igen lu di vegher u keela, iti i i môm er Boseshi, i igen la er Sene.

⁵ Iwen i môm tile sha jighilii ken vegher u imbusutarimese sha ishigh ki Mikemashi, igen la lu di ken vegher u imbusutariyan sha ishigh ki Geba.

⁶ Yonatan kaa a wanye u tilin un ikav mbi tswamev la er: Va, sé za ken afo a mbaipusuv mban; alaghga TER Una nôngo ityav sha ci wase, gadia ma kwagh u yangen TER u nan mhembe shin a lu sha ikev i ior kpishi shin sha ikev i ior kpeghee kpaa ngu ga.

⁷ Or u tilin un ikav mbi tswamev la kaa a na er: Kwagh u a lu u ken ishima cii gba eren tsô; nenge m ngu a we, er ishima you i lu nahan, kape i yam kpaa i lu di je la.

⁸ Tsô Yonatan kaa er: Nenge, sé per sé za hen ior mbala, sé za ande her a ve.

⁹ Aluer vea kaa a vese er: Tile nen zan zan sé va her a ven yô, nahan sé tile her, sé kera za her a ve ga.

¹⁰ Kpa aluer vea kaa er: Kôndo, va nen sha a vese yô, sé kôndo, gadia TER na ve sha ikev yase je ve; kwagh ne una lu se ikav.

¹¹ Tsô ve uhar ve va ande hen afo a Mbafiliti; nahan Mbafiliti kaa er: Nenge, Mbaheberu mban gba duen shin ahungwa a ve yer la ve.

¹² Ior mba her afo mbala gema kaa a Yonatan man or u tilin un ikav mbi tswamev la, er: Kôndo nen sha a vese, tsô sé tese ne kwagh. Nahan Yonatan kaa a or u tilin un ikav mbi tswamev la er: Dondo sha a mo, gadia TER na ve sha ikev i Iserael ve.

¹³ Yonatan gba unden ng'aa ng'e ng'aa; or u tilin un ikav mbi tswamev lu van un ken ijime; Yonatan haa ve inya; or u tilin un ikav mbi tswamev la kpaa lu wuan ve van ken ijime.

¹⁴ Mwoo u hiihii u Yonatan man or u tilin un ikav mbi tswamev ve wua la, lu nomsombaiorov kuma ikundu nahan, ijiir la kpaa kuma iniembe er atô sule nahan.

¹⁵ Akarkase gbidye ior iyol ken afo, man ken akôngo kua mbautyav cii; mbakuranafo kua mbayanshar, ve kpaa akarkase gbidye ve iyol je, inya kpaa tenger; lu akarkase a a dugh sha Aôndo je yô.

¹⁶ Tsô mbakuran mba Saulu ken Gibea u Benyamin, ve nenge ikpilaior hingir kughukuku.

¹⁷ Tsô Saulu kaa a ior mba ve lu a na mbala, er: Ôr nen iyenge hegen, nenge nen or u nan dugh her a vese kera la. Mba er iyenge yô, Yonatan man or u tilin un ikav mbi tswamev, ve lu her ga.

¹⁸ Tsô Saulu kaa a Ahia er: Va a areki u Aôndo heen. Gadia her ayange la areki u Aôndo lu ken Iserael.

¹⁹ Tsô er Saulu lu ôron kwagh a pristi la yô, ayôôso a ken afo a Mbafiliti lu seer a seer zan hemen; nahan Saulu kaa a pristi er: Tôô uwegh ough kera.

²⁰ Nahan Saulu kua ior mba ve lu a na cii ve kohol, ve va ken utya; yô, sanker u hanma or gema lu ihom a anngô u nan; kwagh nzughul her je cier iyol.

²¹ Mbaheberu mba ve vande lun a Mbafiliti imôngo caigba la, mba ve mough a ve imôngo ve za hen afo la, ve yô, ve gema ve ta ken Mbaiserael mba ve lu a Saulu man Yonatan la.

²² Nahan zum u Mbaiserael, mba ve yer ken tar u iwoogh u Eferaim la cii kpaa, ungwa er Mbafiliti mba yevese yô, ve kpaa, ve cir ve ijime a ityav.

²³ Nahan TER yima Mbaiserael sha iyange la; ityav kar yem ken hemen u Bete-aven.

²⁴ Ior mba Iserael ya ican sha iyange la; gadia Saulu bum a ve er: Or u nana ya kwagh shin nana ma kwagh er iyange i lu a mire ga, man m lu a or iyev sha mbaihomov av ga ne yô, ifan i̱ kôr nan. Nahan ma or bende kwaghyan zwa ga.

²⁵ Tsô ior cii nyôr shin ikô, akpa a iyoughough lu hen inya.

²⁶ Er ior nyôr shin ikô yô, iyough ngee ker, kpa ma or za uwegh sha zwa ga, gadia ior lu cian mbum la.

²⁷ Kpa Yonatan ungwa mbum u ter na bum a ior la ga; nahan a naregh gbough ku ku lu un sha uwe la, a shindi ku sha ikpayough, a za uwegh sha zwa, maa wanger un ashe.

²⁸ Tsô orgen gema kaa er: Teru na ior ve bum gbang gbang er: Or u nana ya kwagh nyian ne yô, ifan i̱ kôr nan; nahan ior vôr.

²⁹ Nahan Yonatan kaa er: Terem er tar ne ican tsô, nenge, m bende iyough ne ciôn nahan kpaa, wanger mo ashe,

³⁰ man hire ior vea ye kwagh nyian gbar gbar sha ishar i mbaihomov vev i ve zough a mi la? Gadia hegen á kera wua Mbafiliti er ma i woo ve la ga.

³¹ Sha iyange la, ve hemba Mbafiliti hii hen Mikemashi zan zan za ar hen Aiyalon; ior vôr kpishi.

³² Tsô ior ta sha ishar, ve kôr iyôngo man ibua kua anibuav, ve sôngo hen inya; ior gba yan awambe.

³³ Tsô i kaa Saulu er: Nenge, ior mba eren TER kwaghbo sha er ve ye inyam kua awambe kpaa yô. Tsô a kaa er: Ne er kwagh u dang; va nam nen zegeiwen hegen.

³⁴ Nahan Saulu kaa er: Samber nen ken ior, kaa nen ve ner; Hanma or nana̱ va nam bua u nan heen, man hanma or kpaa nana̱ va nam iyôngo i nan, va sôngo nen heen, ya nen, de kera eren nen TER kwaghbo sha u yan awambe ga. Nahan ior cii, hanma or nan va a bua u nan hen tugh mbula, ve va sôngo heregh.

³⁵ Tsô Saulu ta TER atse a nanden nagh sha mi; angan ka atse a hiihii a un ta TER je la.

³⁶ Tsô Saulu kaa er: Sé sen sé tôv nen Mbafiliti ityô, tugh mbun, sé sar nen ve zan zan sev mbu kar aven, sé de ma or ve môm ga. Nahan ve kaa a na er: Gba eren kwagh u a doo u tsô. Kpa pristi kaa er: Yô, sé za nen hen Aôndo.

³⁷ Tsô Saulu pine ishima i Aôndo, a kaa er: M̱ sen, m̱ zenda Mbafiliti ityô, shinii? Ú na ve sha ikev i Iserael shinii? Kpa A bugh un zwa sha iyange la ga.

³⁸ Nahan Saulu kaa er: Kporom nen heen, ne mbavesen cii, time nen, fa nen henpe kwaghbo ne a lu nyian yô.

³⁹ Gadia er TER u A yem Iserael A lu u uma ne, shin a lu wan wam Yonatan je kpaa, una kpe kpee. Kpa ma or bugh un zwa ga.

⁴⁰ Tsô a kaa a Mbaiserael cii er: Haa nen vegher môm, mo vea wan wam Yonatan sé tema di vegher la. Nahan ior kaa a Saulu er: Gba eren kwagh u a doo u tsô.

⁴¹ Tsô Saulu kaa a TER er: Aôndo u Iserael, tese kwagh u mimi. Tsô ishor gba sha Yonatan kua Saulu, ior due a ishô iyol.

⁴² Saulu shi kaa er: Yô, er ishor sha a mo vea wan wam Yonatan; maa ishor kôr Yonatan.

⁴³ Nahan Saulu pine Yonatan er: Kaam kwagh u u er yô. Tsô Yonatan kaa un er: Mimi je, m bende iyough kpeghee sha ityô i gbough ku m lu a mi sha uwe ne; yô me kpe tsô.

⁴⁴ Nahan Saulu kaa er: Aôndo A̱ er nahan man i̱ hemba nahan kpaa, ú kpe kpee Yonatan.

⁴⁵ Tsô ior pine Saulu er: Yonatan una kpe, un u a yem Iserael yum nee? Aôndo A̱ yange; er TER A lu u uma ne, gwarce na môm u sha ityou kpaa una gba inya ga; gadia a er tom a Aôndo imôngo nyian. Kape ior yima Yonatan sha u a̱ de kpe ga la.

⁴⁶ Tsô Saulu de u zendan Mbafiliti ijime, mough hide; Mbafiliti kpaa yem hen ijiir ve.

⁴⁷ Saulu yô, er a ya tor sha Iserael la, a nôngo ityav a mbaihomov nav cii sha hanma vegher, a Moabi man a Mbaamon man Edom kua utor mba Soba man a Mbafiliti kpaa; henpe una gema cii, a hemba.

⁴⁸ A eren kwagh sha ishima i taver, a hemba Mbaamaleki, a yima Iserael sha ikev i mba ve saren ve la.

⁴⁹ Ônov mba Saulu yô, lu Yonatan man Ishevi man Malkishua; man ati a ônov nav mba kasev mba uhar yô, iti i u iunda la er Merabi, iti i u kiriki er Mikal;

⁵⁰ iti i kwase u Saulu er Ahinoam, wan u Ahimashi; iti i kurutya u mbautyav nav er Abiner wan u Ner, anngô u ter u Saulu.

⁵¹ Ter u Saulu lu Kishi, man Ner, ter u Abiner la, lu wan u Abiel.

⁵² Sha ayange a Saulu cii a nôngo ityav mbi taver a Mbafiliti, hanma or u ageegh shin or u taver ishima u Saulu a nenge a nan yô, a tôô nan je.