1 Samuel 13 - ICIGHAN BIBILO

¹ Saulu tema tor inyom i môm; er a tema tor sha Iserael kuma anyom ahar yô,

² Saulu sange ior dubu utar ken Iserael; dubu uhar lu a Saulu ken Mikemashi kua sha uwo u Betel; dubu môm gema lu a Yonatan ken Gibea u Benyamin; ior mbagenev yô, a na ve gbenda er hanma or nana̱ yem hen tenti u nan.

³ Yonatan hemba Mbafiliti mba ve haa afo hen Geba la, Mbafiliti kpaa ungwa gwa la. Nahan Saulu tôngo korough ken tar la cii a kaa er: Mbaheberu ve̱ ungwa!

⁴ Iserael cii ungwa er i kaa er Saulu hemba Mbafiliti mba hen afo la; nahan Iserael due Mbafiliti ishima. Tsô i kohol ior, ve dondo sha Saulu ve za hen Gilgal.

⁵ Mbafiliti kpaa va zua sha u nôngon ityav a Iserael: akekeautya dubu utar man mbaanyinyav dubu ataratar man ior ngee er waarawa u hen kpe u zegemnger nahan; tsô ve kôndo ve haa afo hen Mikemashi, Bete-aven vegher u sha ityoughkitaregh la.

⁶ Zum u ior mba Iserael nenge er kwagh tser ve nahan (gadia kwagh imbishi ior), nahan ve gba yeren ken ubar man ken ikô man ken ikweavande man ken ijô kua shin ahungwa.

⁷ Mbaheberu mbagenev vande peren Yordan nyôr ken tar u Gadi kua Gileadi; kpa Saulu yô, hila lu hen Gilgal, ior cii lu a na ityô a akarkase iyol.

⁸ A tsa her ayange ataankarahar, lu keghen shighen u Samuel ver la; kpa Samuel va hen Gilgal ga; tsô ior gba sarem her a na kera.

⁹ Tsô Saulu kaa er: Vam a nagh ku nanden kua iniav mbi bem. Tsô a na nagh ku nanden.

¹⁰ Ne nagh ku nanden been yô, Samuel maa va nyer; Saulu due za kegh un gbenda sha u una sugh un.

¹¹ Tsô Samuel pine er: Ka nyi u ere? Saulu kaa er: Ka sha ci u m nenge ior ve lu sarem her a mo kera man we kpaa u va sha iyange i i ver la ga, man Mbafiliti kpaa kohol hen Mikemashi,

¹² ka nahan man m kaa mer: Mbafiliti vea va ta sha a mo hen Gilgal er m lu a sôn iveren i TER ga ne; tsô m cimin ishima, m na nagh ku nanden.

¹³ Samuel kaa a Saulu er: U er ibumekwagh; u wa kwagh u TER, Aôndo wou, A kaa u la iko ga; gadia TER ma A ver tartor wou sha Iserael ma u taver gbem.

¹⁴ Kpa hegen yô, tartor wou ua kera lu gbem ga; TER ker or Na u sha ishima Na vough, TER ver un er a̱ lu orhemen u ior Nav, sha er u we kwagh u TER A kaa u ne iko ga yô.

¹⁵ Tsô Samuel mough hen Gilgal kar yem sha Gibea u Benyamin; Saulu ôr iyenge i ior mba ve lu a na, kuma er deri ataratar nahan.

¹⁶ Saulu man shi wan na Yonatan kua ior mba ve lu a ve la, ve lu ken Geba u Benyamin; Mbafiliti yô, haa afo ken Mikemashi.

¹⁷ Tsô mbayanshar due ken afo a Mbafiliti akum atar; ikum i môm yem sha gbenda u zan hen Ofera, ken tar u Shual la;

¹⁸ ikum igen ver ishigh u zan sha gbenda u Bete-horon; shi ikum igen za gbenda u hen tar u tseghe tseghe hen pev u Seboim, vegher u yemen ken desereti la.

¹⁹ Ken tar u Iserael cii orvareniwa lu ga; gadia Mbafiliti kaa er: Mbaheberu ve̱ de varen usanker kua awange ayol a ve ga;

²⁰ nahan Iserael cii ve zaan shin Mbafiliti, hanma or nan za tsaase nduhar u nan kua bwagi u nan man ijembe i nan kua ishôm i nan;

²¹ a pav shekel avegher atar yô, i wa avegher ahar sha ci u asôm man ubwagi man mbaayari man azembe man shi vegher môm sha u sôron igbough mbi hulen ibua a mi.

²² Kape i lu man sha iyange i nôngon ityav, i zua a sanker shin iwange sha ikev i ma or môm u nan lu a Saulu man Yonatan ga la; kpa Saulu man wan na Yonatan yô, ve lu a mi.

²³ Tsô nongo u mbakuran mba Mbafiliti due za hen huwa u Mikemashi.