1 Samuel 12 - ICIGHAN BIBILO

¹ Tsô Samuel kaa a Iserael cii er: Nenge m ver ato sha kwaghôron wen sha hanma kwagh u ne kaam cii, m kôr ne tor.

² Nenge hegen yô, tor ngu hemen ne; mo yô, m bee iyol ve, m mende ivu kpaa; ônov av mba a ven; er m lu iyev je m lu zenden sha ishigh yenegh zan zan nyian.

³ M ngun heen ne; pase nen ase kwagh wam nyian sha ishigh ki TER kua or Na u i shigh un mkurem la; ka an, m ngohol nan bua sha aperaa? Shi ka an je m ngohol nan jaki sha apera? Shi ka an je m kighir nan a icana? Shin ka an je m ngohol nan kwagh sha icughuu? Man ka sha ikev i an, m ngohol iwua i yamen ishô sha u me kusu ashe a am a mini? Á lu nahan yô, me hide ne a mi.

⁴ Tsô ve kaa er: U kighir se a ican ga, u ngohol se kwagh sha icugh ga, u ngohol kwagh sha ikev i ma or kpaa ga.

⁵ Nahan a kaa a ve er: Ka TER je, A lu shiada sha a ven ye, man or Na u i shigh un mkurem la kpaa ka shiada nyian, ne zua a ma kwagh sha ikev yam ga. Tsô ve kaa er: Un ka shiada.

⁶ Tsô Samuel kaa a ior er: Ka TER A ver Mose vea Aron, shi A due a uter enev ken tar u Igipiti kpaa ye.

⁷ Hegen yô, tile nen ase sha u me ôr ne kwagh sha ishigh ki TER sha aeren a perapera a TER cii, a A er ne kua uter enev kpaa yô.

⁸ Zum u Yakob va ken Igipiti la, man shighe u uter enev vaa a TER yô, TER tindi Mose kua Aron, ve za due a uter enev ken tar u Igipiti, ve va ver ve, ve tema hen ijiir ne.

⁹ Kpa TER, Aôndo ve, hungul ve, nahan A gema ve a na sha ikev i Shisera, orhemen u ikumutya i Hasor, man sha ikev i Mbafiliti kpaa, kua sha ikev i tor u Moabi; mbala nôngo ityav a ve.

¹⁰ Tsô ve vaa a TER, ve kaa er: Se, se er kwaghbo, se undu TER, se gema se civir Ubaal kua Ashetaroti; kpa hegen yô, yima se sha ikev i mbaihomov asev, nahan sé gema sé civir We.

¹¹ Tsô TER tindi Yerubaal man Bedan man Yefeta man Samuel, A yima ne sha ikev i mbaihomov enev hanma vegher cii, ne tema doo doo.

¹² Zum u ne nenge Nahashi tor u Mbaamon mough num a ven yô, ne kaa a mo ner: Ei, na se tor, a̱ lu tor sha a vese; man nenge, TER, Aôndo wen, ka Un A lu tor wen ye.

¹³ Hegen yô, tor u ne tsough man ne sen yô, ngun je ne; nenge, TER ver ne tor.

¹⁴ Aluer né cian TER, né civir Un, né ungwan imo Na, né hendan a tindi u TER ga yô, man aluer ne kua tor u a tem sha a ven ne, né lu mbadondon mba TER, Aôndo wen yô, á doo;

¹⁵ kpa aluer né ungwan imo i TER ga, né gema né hendan a tindi u TER yô, uwegh ku TER kua lu num a ven er ku lu num a uter enev nahan.

¹⁶ Yô, tile nen ase, nenge nen zegekwagh u TER Una er sha ishigh yenegh ne.

¹⁷ Nyian ka iyange i sundan alakema gaa? Me sôn TER A̱ nôô ura man né fa man né nenge kpaa er kwaghbo wen a lu u vesen u ne er sha ishigh ki TER, er ne ker tor yô.

¹⁸ Tsô Samuel sôn TER; nahan TER dura shi nôô ura sha iyange la; nahan ior cii cia TER kpishi kua Samuel kpaa.

¹⁹ Tsô ior cii kaa a Samuel er: Sôn TER, Aôndo wou, sha ci u mbayev ou sha er se̱ de kpen ga yô; gadia se seer kwaghbo ne sha asorabo a ase cii, er se ker tor yô.

²⁰ Nahan Samuel kaa a ior er: De kera cie nen ga; mimi je, ne er asorabo ne cii, nahan kpaa, de kera gbihin nen TER ga, kpa civir nen TER a ishima yen cii;

²¹ de kera kahan nen sha u dondon sha ugbilinmbaakaav mba vea fatyô u wasen shin yiman ne ga la ze, gadia ka akaagbilinigh tsô.

²² Gadia TER Una gbihi ior Nav kera ga, sha ci u iti Na i vesen la; gadia doo TER u geman ne er ne̱ hingir ikurior Na iyol Na je.

²³ Kpa mo yô, mayange me er TER kwaghbo ga, sha u den u eren msen sha ci wen la; kpa me zer tesen ne gbenda u dedoo kua u mimi gbem.

²⁴ Ka TER cian nen Un ye, civir nen Un sha mimi a ishima yen cii; gadia nenge nen uzegembaakaav mba A er sha ci wen yô.

²⁵ Kpa aluer né za hemen u eren kwaghbo yô, á tim ne, kua tor wen cii.