1 Samuel 1 - ICIGHAN BIBILO

¹ Orgen lu ken Ramataim-sofim, u sha tar u iwoogh u Eferaim, iti na er Elkana, wan u Yeroham, wan u Elihu, wan u Tohu, wan u Sufi, or u Eferaim;

² lu a kasev uhar; u môm iti na er Hana, ugen iti na er Penina; Penina lu a ônov, kpa Hana lu a wan ga.

³ Hanma inyom yô, or la a mough hen gar na a za civir TER u akum a Sha ken Shilo, shi a na nagh kpaa. Ônov mba Eli Hofeni kua Pinehashi upristi mba TER, ve lu her.

⁴ Iyange i a kuman u Elkana una na nagh yô, a na kwase na Penina kua ônov nav mba nomso man mba kasev aci a ve;

⁵ kpa Hana yô, a na un aci ahar, sha ci u Hana doo un ishima yum yô, kpa TER cir un mar.

⁶ Wuhe na bamen un tsung, sha u vihin un ishima, er TER A cir un mar yô,

⁷ eren nahan anyom anyom; shighe u una za hen iyou i TER yô, kape a bamen un la; nahan a gba vaan, kwaghyan kpaa a ya ga.

⁸ Nahan Elkana nom na kaa a na er: We Hana, ka nyi u vaa? Man ka nyi u vende kwaghyana? Man ka nyi ishima i vihin we? Mo m hemba u ônov mba nomso pue gaa?

⁹ Tsô Hana mough er ve ya man ve ma kwagh ken Shilo kera yô. Pristi Eli, tema sha kwaghteman u hen kpandehunda u tempel u TER la.

¹⁰ Yô, ishima lu vihin Hana, a gba sônon TER, vaan tsung.

¹¹ Nahan a tsegha zwa a kaa er: TER u akum a Sha, aluer Wea rumun, Wea nenge ican i kpan Wou u kwase, Wea umbur mo, kpan Wou u kwase á hungul We ga, Wea na kpan Wou u kwase wan u nomso yô, mo kpaa me na TER un sha ayange a á lu uma cii, atsem kpaa á kar un sha ityou ga.

¹² Tsô, er a ngôôr, a lu eren msen sha ishigh ki TER nahan yô, Eli nenge un sha zwa.

¹³ Hana lu ôron kwagh ken ishima na, zwa na lu tenger di a tenger tsô, imo na due sha ga; nahan Eli hen er, ngu hunden.

¹⁴ Eli kaa a na er: Ka hanma shighe je ú de ihundughu? Pav a wain wou la.

¹⁵ Tsô Hana gema kaa er: Ei, terem, mo m ngu kwase u ishima i vihim tsung yô, m ma wain shin ma kwagh u hunden ga, kpa m ngu pasen TER ishima yam cii.

¹⁶ De kera henen wer kpan wou u kwase ka dangkwase ga; gadia ka sha mvihi u ishima i vihim yum man mbam u i bamen mo la m er kwagh zan zan hegen ye.

¹⁷ Tsô, Eli gema kaa er: Yô, za ase bem bem; Aôndo u Iserael A̱ na u kwagh u u sen Un yô.

¹⁸ Shi a kaa er: Ma i doo u a kpan wou u kwase. Tsô kwase la kôr gbenda, a yem a za ya kwagh, ishigh nagh kera tese ishima i vihin ga.

¹⁹ Ve mough pepe pepe, ve gure sha ishigh ki TER, ve civir Un, tsô ve hide hen ya ve hen Rama; Elkana yav a kwase na Hana; TER umbur un.

²⁰ Tsô ayange nga kar yô, Hana wa iyav, mar wannomso; a ii un iti er Samuel, a kaa er: Gadia m sôn TER un.

²¹ Tsô or la, Elkana, kua ior nav cii, yem sha u za nan nagh ku sôngon sha anyom anyom, kua ku a tsegh zwa sha mi la kpaa.

²² Kpa Hana za ga; gadia a kaa a nom na er: Mo me za ga; saa wan á de atumba ve, man me za a na ye, sha u a̱ za tile sha ishigh ki TER, a̱ lu ker gbem.

²³ Tsô Elkana nom na kaa a na er: Gba eren kwagh u u nenge a doo u ken ishima tsô; tile zan zan wan á de atumba; TER A̱ kure kwaghôron Na. Tsô kwase la tile, na wan na atumba zan zan a de atumba.

²⁴ Zum u a de atumba yô, a mough a na kua anomabua atar, man mwem kuma efa môm, kua ikpa i wain, a va a mi hen ya u TER hen Shilo; yô, wan la lu kpeghee je.

²⁵ Nahan ve sôngo nombua, ve va a wan la hen Eli.

²⁶ A kaa er: Terem, mimi je, er u lu uma ne terem, ka mo kwase u iyange m tile hen we heen sônon TER ne.

²⁷ Ka sha ci u wan ne iyange m sônon ye; TER kpaa nam msen wam u m sen Un yô;

²⁸ nahan mo kpaa m gema un m na TER; a̱ lu u TER sha ayange a á lu uma cii, Tsô a gure a civir TER her.