1 Peteru 5 - ICIGHAN BIBILO

¹ Nahan yô, m ngu taver mbatamen mba ken ven asema, mo u m lu ortamen a ve imôngo man shi orshiada u atsan a Kristu kpaa. Mo kpaa m ngu a kwar sha iengem i á va pase i la.

² Kura nen ikumuile i Aôndo i i lu hen ven la, er ka sha ci u Aôndo nahan, i̱ de lu er i kighir ne a kighir ga, kpa i̱ lu sha asema a en; i̱ de lu sha ci u mtsera u dang ga, kpa i̱ lu sha gbashima je;

³ i̱ de lu er ne mba eren tahav sha kwagh u i we ne sha ikev ga, kpa lu nen ikumuile la ikav.

⁴ Zum u Orkuranilev u tamen Una ande yô, né ngohol tsar u engem u sha ityou u usen mayange ga.

⁵ Nahan yô, ne mbayev kpaa ungwan nen imo i mbatamen, man ne cii, haa nen ityough ki taver ga iyol, hen ayol a en, gadia Aôndo hendan kwagh a mbagengeseyol, kpa ne mba ve hir ayol a ve ijime la mrumun u sha mhôôn.

⁶ Hide nen a ayol a en ijime er uwegh ku Aôndo ku ageegh ku lu sha a ven nahan, sha er shighe á va kuma vough yô Una kende ne sha.

⁷ Gema nen ishima i nyian yen la cii, haa nen sha a Na, gadia ka Un A lu koson ne ye.

⁸ Lu nen geng ge geng shi kuran nen kpaa, orihom wen diabolo ngu zenden er begha u tan kume nahan, keren or u una ya yô.

⁹ Hendan nen a na, tile nen dông sha jighjigh u nan gadia ne fa anmgbianev enev sha won cii kpaa i ver ve ican shon i môm i môm i ne lu yan i ne vough.

¹⁰ Zum u ne ya ican sha anyangem kpeghee kera yô, Aôndo u mhôôn cii u A yila ne u zan ken iengem i tsôron ken Kristu, Un iyol Na Una sôr mlu wen Una suwe ne, Una taver ne man shi Una tim ne né lu dông kpaa.

¹¹ Ka Un je A lu a tahav gbem sha won ye. Amen.

¹² M nger ne ankwagh ne kpuaa sha ikev i Siluanu u a lu ne anmgbian u jighjigh sha mnenge wam yô. M ngu taver ne ishima man m ngu eren shiada mer, ngun ka mrumun u sha mhôôn u mimi u Aôndo je ne. Tile nen sha mi dông.

¹³ Un u a lu ken Babilon u i tsough un di er ne nahan la, ngu sughun ne; wan wam Marku kpaa nahan.

¹⁴ Sugh nen ayol a en sha zwasusen u sha dooshima. Bem a̱ lu sha a ven cii, ne mba ne lu ken Kristu yô.