1 Peteru 3 - ICIGHAN BIBILO

¹ Nahan yô, ne kasev di kpaa ungwan nen imo i noov enev sha er aluer mbagenev ken ve, vea lu mbawan kwaghôron u Aôndo iko ga je kpa, á urugh ve sha mlu u kasev vev la, á kera lu sha kwaghôron kpee ga,

² er ve nengen mlu wen u wang u cian Aôndo la yô.

³ Hwe wen a̱ de luun u ken won tsô ga, er gbatyou u gban nahan, shin u wan akaa a hweegh a zenaria shin akondo a zeren ga.

⁴ Kpa i̱ lu or u ken myer u ken ishima la, a hwe u saan ishe ga, u ishima i legh legh man u lun ving la; ka kwagh u hemban sha mnenge u Aôndo je la.

⁵ Gadia kape uicighanmbaukase mba tsuaa mba ishimaverenkeghen ve i lu sha Aôndo la kpaa, ve eren hwe je la, ve ungwan imo i noov vev.

⁶ Kape Sara kpaa lu ungwan imo i Aberaham la, je a yila un er ter; man ne hingir ônov nav aluer ne eren doo doo man ne rumun er ma kwagh a̱ de te ne mciem iyol ga yô.

⁷ Nahan ne nomso kpaa, lu nen a kasev enev imôngo sha kwaghfan, waan nen kasev iko er ve hembe yinan agee yô, gadia ve kpaa, ka mbayandyako u sha mrumun u sha mhôôn u uma a ven imôngo, sha u i̱ de vende mbamsen enev ga yô.

⁸ Ken masetyô yô, ne cii lu nen ishima i môm, shi lu nen mbazungwen mhôônom; doo nen ayol a en er ka anmgbianev nahan, lu nen mba mhôônom ma ker ve; shi hide nen a ayol a en ijime kpaa.

⁹ De kera oron iyev sha ifer ga shi de kera oron iyev sha ityuhwan kpaa ga, kpa gema veren nen a ver ior dedoo, gadia ka sha kwagh ne je i yer ne ye, sha u né ya dyako u iveren i dedoo yô.

¹⁰ Gadia: Or u i sar nan pe uma a̱ doo nan ishima man shi sar nan pe nengen ayange a dedoo kpaa yô, nana̱ kura nombor u nan sha u ôron kwagh u ifer, man zwa u nan u̱ de er kwagh u icughugh ga,

¹¹ nana̱ nyagh ifer nana̱ gema nana̱ er kwagh u dedoo, nana̱ ker bem nana̱ zenda un ityô kpaa.

¹² Gadia ashe a Ter yô, nga sha mbaperapera shi veren ato sha zamber ve kpaa. Kpa Ter gem tsuhur ishigh sha mba ve eren ifer yô.

¹³ Aluer ne mba nôngon kpogholoo sha kwagh u dedoo yô, ka an je nana gema á er ne kwagh u ifer ase?

¹⁴ Kpa aluer nea yan ican sha ci u kwagh u perapera kpaa, á saan ne iyol je; de cie nen m-ange ve ga, man ishima i̱ de te ne kwe kpaa ga.

¹⁵ Kpa gema tsegha nen Kristu ken asema a en, A̱ lu Ter, waan nen ago iyol veren nen a ver sha u né na imo sha mpin u hanma or u nana pine ne ityôikaa i ishimaverenkeghen i i lu ken a ven la, kpa i̱ lu sha ishima i legh legh man sha mcie kpaa.

¹⁶ Shi lu nen a imo i wang ken ishima sha er kwagh u i lu lamen sha a ven dang dang la je kpaa, ve̱ va ahenge yô, ka ve mba ve lu teren mlu wen u dedoo u ken Kristu sha dang la.

¹⁷ Gadia aluer ka ishima i Aôndo u ú ya ican sha shighe u u eren kwagh u dedoo yô, hemba doon a u ú ya ican sha shighe u u eren ifer la.

¹⁸ Gadia Kristu kpaa kpe sha ci u asorabo kwa môm, Un Orperapera sha ci u mbaaferev sha u Una va a vese hen Aôndo yô. Iyol Na yô, i wua i kpa i shi i na Un uma sha Jijingi.

¹⁹ Lu sha Jijingi kpaa man A za A za ôr ujijingi mba ve lu ken uikangen la kwaghaôndo ye.

²⁰ Ka ve mba ngise ve lu hemban ato zum u Aôndo lu wan ishima sha ayange a Noa zum u i lu gban tsô la, ka ker man ior kpeghee, ka uuma mba iorov anigheni tsô ve war sha mnger ye.

²¹ Ma tese ikav sha batisema u ne kpaa ne lu waren sha mi hegen yô; batisema ka u wanger hôngor u sha iyol kera ga, kpa ka msen u sônon Aôndo imo i wanger wanger i ken ishima sha mnder u Yesu Kristu shin ku.

²² A yem Sha, ngu ken uwegh ku yanegh ku Aôndo, i gema mbatyomov mba Shaav man tahav kua agee i wa Un sha ikev.