1 Peteru 2 - ICIGHAN BIBILO

¹ Nahan undu nen hanma ifer man hanma icugh man imanger man iwuhe man angereke cii kpaa,

² man atumba a man a mimi a sha kwaghôron u Aôndo la a̱ sar ne tsung er anikundanev mba forototo nahan, sha er né vese sha mi u zan ken myom yô,

³ aluer ne kav er Ter A doo je yô.

⁴ Va nen hen a Na, Wen u A lu iwen i i lu uma i ior yô, ve venda i, kpa hen Aôndo yô, gema ka icuwan man shi i injaa kpaa.

⁵ Ne kpaa, i̱ maa ne er ka awen a lun uma nahan, ne̱ lu iyou i ken jijingi, ne̱ hingir icighannongo u upristi sha u né naan nagh ku ken jijingi, ku ku doon Aôndo sha ci u Yesu Kristu yô.

⁶ Gadia i nger ken icighanruamabera er: Nenge, m ngu veren icuwaniwen i injaa i sha zongo ken Shion. Or u nan ne Un jighjigh yô, nana va ahenge ga.

⁷ Kape A lu a inja her a ven ne, ne mba ne ne jighjigh ne. Kpa hen mbanan jighjigh ga yô, kwaghôron ugen ngu er: Iwen i mbamaan ve vende i la, ka i je i hingir i sha zongo ye,

⁸ man shi: Ka iwen i keman nguhar sha mi man vande u nôngon gbev sha mi. Ka ve mba ve nôngo gbev sha ci u ve we kwaghôron u Aôndo iko ga la, man ka sha kwagh la je i vande veren ve kpaa ye.

⁹ Kpa ne yô, ne mba icuwannongo, nongo u upristi mba sha inja i tor, icighanikurior, nongoior u Aôndo jim, ka sha u né yôô aeren a Na a ageegh, Un u A yila ne ken ime, A va a ven ken iwanger Na i kpiligh iyol la.

¹⁰ Ngise ne lu nongoior ga, kpa hegen ne gema ne hingir nongoior u Aôndo, i zungwen ne mhôônom ga, kpa hegen yô, mba zungwen ne mhôônom.

¹¹ Ne mbadoon mo ishima, ne mba ne lu ushirmbaiorov man iorvannya kpaa, m ngu zamber a ven mer: Nyagh nen asaren a iyolough a a nenge ityav a uma u ken ishima la.

¹² Zende wen u hen atôatyev u̱ lu wanger wanger, sha u aluer mba lamen sha a ven er ka mbaaferev yô, ve̱ nengen aeren a en a dedoo man ve̱ civir Aôndo sha iyange i Una va sôron ne la.

¹³ Waan nen hanma tindi u ior ve we la iko sha ci u Ter—shin a lu tor u a hembe cii,

¹⁴ shin a lu ugomna mba tor a tindi ve sha u ve̱ tsahan mbaerenafer kpa ve̱ gema ve̱ wuese mba ve eren sha mi la.

¹⁵ Gadia ishima i Aôndo yô, kape i lu ne, ka u né eren dedoo man né cir abumeaior zwa sha lanegh vegh ye.

¹⁶ Lu nen er mba ve lu ken uikangen ga nahan, kpa mlu wen u ken uikangen ga la a̱ de gem a̱ hingir ne kwagh u yisan ifer a mi ga; lu nen ikpan i Aôndo.

¹⁷ Waan nen ior cii iko, anmgbianev ve̱ doo ne ishima, cian nen Aôndo, waan nen tor iko.

¹⁸ Ne mbayev kpaa, ungwan nen imo i uter enev sha mcie, i̱ de kera luun mbadedoo man mba ve lu saan saan tseegh ga, kpa i̱ kua mba ve lu jighilii ga kpaa.

¹⁹ Ka kwagh u doon je aluer or nana umbur Aôndo nana wa ishima ken ican zum u ican i tser nan sha apera la yô.

²⁰ Gadia aluer ne er isholibo man á gbidye ne man né wa ishima yô, iwuese ngi hana? Kpa aluer ne mba eren sha mi man né gema né ya ican kpa né wa ishima yô, ka kwagh u doon hen Aôndo je la.

²¹ Gadia ka sha kwagh ne je i yer ne ye, gadia Kristu kpaa ya ican sha ci wen, A ver ne ikav je sha u né dondo Un ijime yô.

²² A er ma isholibo ga, icugh kpaa i zua a mi sha zwa Na ga.

²³ Zum u i laha Un kpaa mayange A or iyev sha mlaha la ga, er A ya ican kpaa A ta hwa ga, kpa A gema A wa sha ikev i Un u A er ijir sha mimi la.

²⁴ Ka Un jim kpaa A tôô asorabo ase ken iyol Na je sha terankon sha er ma se kpe kera sha kwagh u isholibo, kpa se̱ gema se̱ lu uma sha ci u perapera. Ka sha agbir a Na man se zough a mkpeyol ye.

²⁵ Gadia ngise ne tsumen er iyôngo nahan kpa hegen yô, ne hide ken Orkuranilev man Orkuran u uuma enev.