1 Peteru 1 - ICIGHAN BIBILO

¹ Peteru apostoli u Yesu Kristu ngu sughun ushirmbaiorov mba ve sambe ve lu ken Pontu man Galatia man Kapadoshia man Ashia man shi Bitinia la, ka mba i tsough ve

² sha mtsengefan u Aôndo, sha mtsegh u sha Jijingi, u zan ken iko i wan man awambe a mishin a Yesu Kristu. I̱ seer ne mrumun u sha mhôôn kua bem wuee.

³ I̱ wuese Aôndo, Ter u Ter wase Yesu Kristu u A mar ne hegh sha mhôônom Nam ma zungwen ma vesen er se̱ lu a ishimaverenkeghen i i lu uma sha mnder u Yesu Kristu shin mbakpenev la,

⁴ se̱ lu a dyako u hôôn ga, u fisee kpaa ga, u usen tsô kpaa ga, u i koso un Sha sha ci wen,

⁵ ne mba i kor ne sha agee a Aôndo sha jighjigh u nan, sha u ngohol myom u i kegh iyol i ver a ver u pasen un sha iyange i masetyô yô.

⁶ Sha kwagh ne yô, ne mba ember kpishi shin er hegen, aluer a gba nahan yô, ameen atô kposo kposo nga vihin ne asema sha anyangem kpeghee.

⁷ Zenaria u a lu kwagh u saan ishe kpaa ka i kar un sha usu je, nahan mkar u i kar jighjigh wen u nan u a hemba zenaria inja ica la, ka sha u una kuma iwuese man icivir man iengem sha m-ande u Yesu Kristu.

⁸ A doo ne ishima shin er ne lu a nenge a Na ga je kpaa; ne mba nengen a Na ga nahan kpaa ne mba nan Un jighjigh man ne mba ember tsung sha iember i i gande u ôron i i doo je i hemba.

⁹ Man ne mba zuan a mkur u jighjigh wen u nan, ka myom u uuma enev je la.

¹⁰ Sha kwagh u myom ne yô, uprofeti mba ve tsengaôron kwagh u mrumun u sha mhôôn u i ver sha ci wen yô, ve tôv un ve time vighe vighe je.

¹¹ Ve lu timen er shin ka hanma shighe shin ka shighe u nanou man Jijingi u Kristu u A lu ken a ve la, A lu tesen sha mi zum u A tsengapasen atsan a Kristu man iengem i ia dondo sha mi la.

¹² I pase ve er, ve lu eren tom sha akaa ne, nahan kpaa lu sha ci ve ayol a ve ga, lu sha ci wen; ka akaa a i lu pasen ne hegen sha ikev i mbala mba ve lu pasen ne Loho u Dedoo sha Icighan Jijingi u i tindi Un A due Sha la. Akaa ne yô, mbatyomov mba Shaav je kpaa, ka saren ve pe gbirin ashe ker.

¹³ Nahan yô, nyôôso nen mfe wen, shi lu nen geng ge geng, ishimaverenkeghen yen i̱ lu sha mrumun u sha mhôôn u i lu van ne a mi sha m-ande u Yesu Kristu la vough.

¹⁴ De kera geman nen ayol a en sha inja i asaren a tsuaa a ken mlan wen la ga, lu nen er ônov mba wan iko nahan.

¹⁵ Kpa ne yô, lu nen uicighanmbaiorov ken mlu wen cii, er Un u A yer ne la A lu icighan nahan.

¹⁶ Gadia i nger er: Lu nen uicighanmbaiorov, gadia Mo M ngu u Icighan je.

¹⁷ Man aluer ne yilan Un er Ter yô, Un u A er ijir i lu sha msange u sha dooshima ga kpa i lu sha ieren i hanma or yô, lu nen a mciem sha ayange a shir wen.

¹⁸ Gadia ne fa i paa ne sha mlu wen u gbilinigh u ne ngohol hen uter la; lu sha akaa a saan ishe, er azurfa shin zenaria nahan, ga,

¹⁹ kpa lu sha awambe a injaa a Kristu er ka a waniyôngo u lun a acôghol iyol ga, ihogholough kpaa ga nahan.

²⁰ I vande fan Un je er i lu a gba tar ga yô, kpa i pase Un ken shighe u masetyô ne sha ci wen.

²¹ Ka sha a Na man ne lu mbanan Aôndo jighjigh u A nder Un shin mbakpenev shi A na Un icivir kpaa, sha er jighjigh wen u nan man ishimaverenkeghen yen ve lu sha Aôndo.

²² Er ne vande wanger asema a en kera sha iko i ne wan mimi iko la u zan ken dooshima u mimi u hen anmgbianev yô, doo nen ayol a en ken ishima tsung je.

²³ Gadia i mar ne hegh lu sha vor u hôôn la ga, kpa lu sha u hôôn ga la, lu sha mkaanem ma Aôndo ma ma lu uma man ma lu ma tsôron kpaa.

²⁴ Gadia: Uumace cii mba er toho nahan man icivir ve cii ngi er ikparen u toho nahan; toho ka u use man ikparen u u a ndoor a gba inya,

²⁵ kpa kwaghôron u Ter yô, ngu tsôron gbem zan zan. Man ngun ka kwaghôron u Loho u Dedoo u i ôr ne u je ne.