1 Mbatesalonika 5 - ICIGHAN BIBILO

¹ Kpa sha kwagh u ashighe man a-an yô, anmgbianev, gba u á nger ne ma kwagh ga.

² Gadia ne ayol a en ne fa doo doo, iyange i Ter ngi van er ormbaiv ka nan va tugh nahan.

³ Zum u vea kaan er: Bem, man mkpeyol yô, ka zum la je mtim una ande sha a ve ibuv er martoghol ka u kôr kwase uya nahan ye, mayange vea kera war ga.

⁴ Kpa ne yô, anmgbianev, ne mba ken ime ga nahan iyange la ia kera va tser ne, er ormbaiv nahan ga.

⁵ Gadia ne cii ne mba ônov mba iwangerev, man shi ônov mba atetan, se kera mba mbautuuv shin mbaimev kpaa ga.

⁶ Nahan yô, se kera hungul nen mnyam er mbagenev nahan ga, se lu nen per geng ge geng.

⁷ Gadia mba ve hungul mnyam yô, ka tugh je ve hungul ma ye, mbahundenmsôrom kpaa, ka tugh ve hundu ye.

⁸ Kpa se mba se lu mbaatetan yô, se lu nen geng ge geng se har nen perutya u jighjigh u nan man dooshima; man agunduutya yô, ka ishimaveren keghen myom je la.

⁹ Gadia Aôndo ver se, lu sha ci u iyugh ga, kpa lu sha ci u zuan a myom ken Ter wase Yesu Kristu.

¹⁰ A kpe sha ci wase sha er shin sea lu per, shin sea hungul mnyam kpaa, sé lu uma a Na imôngo.

¹¹ Nahan yô, taver nen ayol a en asema, wasen nen ayol a en er ne lu eren nahan je.

¹² Se mba zamber a ven, angbianev ser, rumun nen mbala mba ve eren tom her a ven sha gbashima mba ve hemen ne ken Ter shi ve we ne kwagh kpaa la.

¹³ Waan nen ve iko kpishi je sha dooshima sha ci u tom ve la. Lu nen bem bem ayol a en.

¹⁴ Anmgbianev, se mba taver ne asema ser, wa nen mba ve eren nzughul nzughul mbala kwagh, taver nen mba ve yen ishima la asema, wasen nen mba ve taver ga yô, waan nen ishima a ior cii.

¹⁵ Nenge nen sha er ma or nana̱ de ôron iyev i ifer sha ifer ga. Nôngon nen sha kwagh u doon gbem je hen a ven ayol a en man shi a mbagenev cii kpaa.

¹⁶ Luun nen saan saan hanma shighe.

¹⁷ Eren nen msen gbem.

¹⁸ Ken hanma kwagh cii, naan nen ishughun, gadia ka ishima i Aôndo sha a ven ken Kristu je ne.

¹⁹ De pirin nen Jijingi ga.

²⁰ De lahan akaaôron a uprofeti ga.

²¹ Kpa karen nen akaa cii, kôr nen u dedoo la gbang je.

²² Nyagh nen hanma inja i kwaghbo cii.

²³ Aôndo u bem iyol Na, A̱ tsegha ne wang jimin cii, ma i kor jijingi wen, man uma wen ken ishima man iyol yen cii purututu, ve̱ de lu a ma acôghol a wan iyol je ga sha m-ande u Ter wase Yesu Kristu.

²⁴ Wen u A yer ne yô, ka u jighjigh je Una er sha mi kpaa.

²⁵ Anmgbianev, eren nen msen sha ci wase.

²⁶ Sugh nen anmgbianev cii sha icighanzwa u susen.

²⁷ M ngu kaan ne sha ishigh ki Ter je mer i̱ ôr washika ne hen anmgbianev cii.

²⁸ Mrumun u sha mhôôn u Ter wase Yesu Kristu a̱ lu sha a ven.