1 Mbatesalonika 3 - ICIGHAN BIBILO

¹ Ka nahan man er se kan wan ishima shio yô, se nenge hemba doon u á undu se ken Atene, se tseegh,

² man se tindi a Timoteu, anmgbian wase u eren Aôndo tom sha Loho u Dedoo u Kristu, sha u a̱ taver ne asema man shi a̱ nyôôso jighjigh wen u nan kpaa,

³ sha u ma or môm nana̱ de lu pee pee sha mtev u sha atsan ne ga. Gadia ne ayol a en kpaa ne fa ka sha kwagh ne je i ver se ye.

⁴ Gadia er se lu a ven la je se tsengaôron ne er i lu u sé ya ican keng yô, man kape i va lu kpaa la, er ne fe nahan.

⁵ Ka nahan man mo kpaa er m kan wan ishima shio yô, m tindi sha u me fa jighjigh wen u nan shin alaghga ormeen vande meen ne kera man tom wase u hingir gbilin tsôou?

⁶ Kpa er Timoteu sember hiden ken ven yô, a wuese jighjigh wen u nan man dooshima wen man a pase er ne mba umbur se doo doo gbem je man i hange ne pe zuan ishigh a vese er se di kpaa a ven nahan.

⁷ Sha ci u nahan yô, anmgbianev, ken hanma zayol wase man mtev u i lu tôvon se a atsan la asema sur se sha kwagh wen sha jighjigh wen u nan la.

⁸ Gadia hegen yô, se mba uma aluer ne tile ken Ter dông yô.

⁹ Gadia ka nyi ishughun je sé sugh Aôndo min sha ci wen sha hanma iember cii i se ember sha ci wen sha ishigh ki Aôndo wase?

¹⁰ Se mba eren msen ngegh tugh man tetan kpaa sha u ma se zough ishigh a ven shi ma se iv kwagh u a yen sha jighjigh wen u nan la.

¹¹ Hegen yô, Aôndo Ter wase iyol Na man Ter wase Yesu ma ve bugh se gbenda u zan her a ven.

¹² Kpa ne yô, Ter A̱ na dooshima wen a̱ seer a seer, a̱ ngee her ayol a en man a ior cii kpaa, vough er se a ven nahan,

¹³ sha u Una taver asema a en, a̱ de lu a acôghol a wan iyol ga ken icighanmlu sha ishigh ki Aôndo Ter wase sha m-ande u Ter wase Yesu kua uicighan Nav cii kpaa.