1 Mbakorinte 8 - ICIGHAN BIBILO

¹ Sha kwagh u inyamakombo yô, se fa er se cii se lu a kwaghfan yô. Kwaghfan yô, ne iyolmoron kpa dooshima yô, gem maan a maa.

² Aluer or ngu henen er nan fa ma kwagh yô, nan ngu a fa er i doo u ma nan fe la ga.

³ Kpa aluer Aôndo Una doo or ishima yô, nan kpaa Aôndo fa nan.

⁴ Nahan sha kwagh u inyamakombo i yan yô, se fa, ma akombo nga a inja sha won ga, man shi ma Aôndo ugen ngu ga, saa môm tseegh.

⁵ Gadia shin er mba i yer ve er mbaaôndo la vea lu Sha shin shin tar yô,—gayô mbaaôndo ngee uter kpaa ngee—

⁶ kpa her a vese yô, Aôndo ngu môm tsô, ka Ter u akaa cii a dugh her a Na yô, man shi ka sha ci Na se lu uma ye; Ter kpaa ngu môm, ka Yesu Kristu, ka sha a Na man akaa cii a lu ye, se kpaa ka sha a Na se lu uma ye.

⁷ Kpa ka ken ior cii man kwaghfan ne a lu ga. Mbagenev yô, hoghol ve iyol a akombo zan zan hegen, ka ve ya kwagh la er ka inyamakombo nahan; tsô imo i ken asema a ve i i taver ga la i gema i hôngor.

⁸ Kpa kwaghyan yô, ngu se ityôikaa sha ishigh ki Aôndo ga. Aluer se ya ga kpaa, se yina ga, aluer se ya kpaa, se seer ga.

⁹ Kpa kura nen ayol, tahav enev mbula mbu̱ de hingir mba ve taver ga la ityôikaa i nôngon gbev ga.

¹⁰ Gadia aluer orgen nana nenge a we, we u u lu a kwaghfan la, u ngu yan kwagh ken kwa akombo, imo i nan i taver ga i ken ishima la yô, ia kera kende nan ishima u yan inyamakombo gaa?

¹¹ Nahan u nan taver ga la nana̱ gema nana̱ saa ishe sha kwaghfan wou la zee? Man ka anmgbian, u Kristu A kpe sha ci u nan je.

¹² Aluer ne er anmgbianev kwaghbo, ne vihi imo ve i ken asema i i taver ga la yô, ka Kristu je ne lu eren Un kwaghbo ye.

¹³ Nahan yô, aluer kwaghyan una hingir ityôkwagh i nan anmgbian wam gbev mbu nôngon yô, mayange me kera ya inyam ga, sha u i̱ de ne anmgbian wam gbev mbu nôngon ga yô.