1 Mbakorinte 7 - ICIGHAN BIBILO

¹ Sha kwagh u akaa a ne nger la yô, doo u or nana bende a kwase ga.

² Kpa sha ci u idya yô, hanma or nana̱ lu a kwase u nan iyol i nan, man hanma kwase di kpaa nana̱ lu a nom u nan iyol i nan.

³ Nom la nana̱ er kwase kwagh u i lu kpee u eren a nan la, kwase la di kpaa nana̱ er a nom u nan nahan vough.

⁴ Iyol i kwase yô, nan ngu a tahav sha mi ga, saa nom. Iyol i nom di kpaa nan ngu a tahav sha mi ga, saa kwase.

⁵ De vende nen ayol a en ga, saa di alaghga né zua zwa ayol a en sha shighe u né ver yô, sha u ne ver ishima sha msen u eren yô, kpa shi zua nen sha u Satan a̱ de meen ne sha mban u kôron iyol tsaha la ga.

⁶ M ngu ôron kwagh ne ka sha ian i nan tsô, ka u wan tindi ga.

⁷ Kpa sarem u ior cii ma ve gbe lun er mo nahan tsô. Kpa hanma or nan zua a iwua i nan her Aôndo iyol i nan; orgen nan ngu a mi nahan, orgen di nan ngu a mi kposo.

⁸ M ngu kaan a mbaukwav man kasev mba côgholov mer: U vea gba lun er mo nahan tsô yô, doo.

⁹ Kpa aluer vea fatyô u kôron ayol a ve tsaha ga yô, ve̱ er kasev shin ve̱ er noov. Gadia guda u eren kwase a u yughur.

¹⁰ Kpa mba ve vande eren kasev kera yô, m ngu tan ve icin man kera ka mo m lu tan ve ga, kpa ka Ter je: Kwase nana̱ de dugh hen nom u nan kera ga.

¹¹ Kpa aluer nana duen kera yô, nana̱ lu kwav, gayô nana̱ hime a nom u nan; nom kpaa, nana̱ de paven a kwase u nan ga.

¹² Mbagenev yô, kera ka Ter ga, ka mo m lu ôron ve nahan mer: Aluer ma anmgbian nan ngu a kwase u nan ne jighjigh ga, man kwase la rumun u lun vea nan yô, nana̱ de paven a nan ga.

¹³ Man aluer kwase ngu a nom u nan ne jighjigh ga, man nom la rumun u lun vea nan yô, nana̱ de duen hen nom la ga.

¹⁴ Gadia i tsegha nom u nan ne jighjigh ga la ken kwase la, man i tsegha kwase u nan ne jighjigh ga la di ken anmgbian la. A lu nahan ga yô, ônov enev ma ve lu wang ga, kpa hegen yô, mba icighan je.

¹⁵ Kpa aluer u nan ne jighjigh ga la nan soo u paven yô, i̱ de nan nana̱ pav. Sha imbagbenda ne yô, i kighir anmgbian u nomso shin anmgbian u kwase la ga. Gadia ka sha u lun bem bem je Aôndo A ver ne ye.

¹⁶ Gadia we kwase, u fa nana, alaghga ú va yima nomu shinii? Man we nom kpaa, u fa nana, alaghga ú va yima kwase wou shinii?

¹⁷ Kwagh u a lu yô, hanma or nana̱ zenden sha kwar u Ter A ne nan yô, man shi er Aôndo A yer nan yô. Kape m we tindi ken hanma nongo u Kristu cii je ne.

¹⁸ Aluer ma or tsôngo kera man i yila nan yô, nana̱ de gem icôngo la ga. Man aluer i yila orgen nan ngu ipusu yô, nana̱ de tsenge ga.

¹⁹ Icôngo yô, ngi ma kwagh ga, ipusu kpaa ngi ma kwagh ga, saa u wan atindi a Aôndo iko.

²⁰ Hanma or nana̱ lu sha kwagh u nan lu sha mi zum u i yila nan la.

²¹ Wea lu kpan zum u i yila u yô, ishima i̱ de nyian we ga, kpa wea fatyô u duen kera yô, nôngo sha mi ngeegh je.

²² Kpan u i yer nan ken Ter yô, nan ngu or u Ter u i pase nan i toho yô. Kape or u nan lu kpan ga man i yer nan la kpaa, nan lu kpan u Kristu je la.

²³ Ka sha ishe je i yam ne ye, de kera geman hingir nen ikpan i ior ga.

²⁴ Anmgbianev, kwagh u hanma or nan lu sha mi zum u i yila nan la yô, nana̱ lu sha mi sha ishigh ki Aôndo.

²⁵ Sha kwagh u anuunaukase yô, m ngu a tindi u a dugh hen Ter ga, kpa me na mhen wam, mo u m lu or u jighjigh sha mhôônom ma zungwen ma Ter yô.

²⁶ M ngu henen mer, doo u or nana gba lun nahan tsô sha ci u ican i i lu hegen ne.

²⁷ I zua u a kwasaa? Yô de keren u ma i sagh u ga. U ngu a kwase gaa? Yô, de eren kwase ga.

²⁸ Kpa aluer wea er kwase kpaa, u er isholibo ga. Man aluer iniunkwase la er nom kpaa i er isholibo ga. Kpa mba ve eren nahan yô, vea ya ican ken iyol. Mo yô, sarem pe ican la ma i er ne ga.

²⁹ Kpa anmgbianev, m ngu kaan mer, shighe kera vese ga. Hii hegen yô, mba ve lu a kasev kpaa, ve̱ lu er mba a kwase ga yô.

³⁰ Mba ve vaan kpaa ve̱ lu er mba vaan ga yô, mba ve yamen kwagh kpaa, ve̱ lu er mba a kwagh ga yô.

³¹ Mba kwagh a zough ve a tar kpaa ve̱ lu er kwagh zua ve a u ga nahan. Gadia mluashe u tar ne ngu karen kera.

³² Sarem u ma ne lu a ishima i nyian ga. Or u nan lu kwav yô, ishima ka i nyian nan sha akaa a Ter, er nana er man á doo Ter yô.

³³ Kpa or u nan lu a kwase yô, ishima ka i nyian nan sha akaa a taregh, er nana er man á doo kwase u nan yô,

³⁴ tsô asema hingir nan ahar. Kpa kwase u nan lu kwav shin iniunkwase yô, ishima ka i nyian nan sha akaa a Ter er nana er man nana lu wang ken iyol man ken jijingi kpaa yô. Kpa u nan lu a nom yô, ishima ka i nyian nan sha akaa a taregh er nana er man á doo nom u nan yô.

³⁵ M ngu ôron kwagh ne nahan ka u wasen ne a wase je, ka u tan ne icul ga, sha u né eren kwagh sha inja man né var a Ter er akaa a zan iyol aa kera lu ga yô.

³⁶ Kpa aluer orgen nan ngu henen er nan ngu eren sha mi ga a ishiôr i nan i iniunugh la man nana kera fatyô u wan ishima her ga yô, nana̱ er sha ishima i nan aluer gba u a lu nahan kpee yô; nan ngu eren isholibo ga; de, ve̱ zua ivaa.

³⁷ Kpa or u nan til ken ishima i nan jighilii, i kighir nan a kighir ga, nan lu a tahav u eren ishima i nan iyol i nan man nan wa ken ishima i nan er nana gba lun a ishiôr i nan i iniunugh la her nahan tsô yô, nan er doo.

³⁸ Nahan or u nana zua ivaa a ishiôr i nan i iniunugh yô, nan er sha mi je, kpa u nana zua ivaa ga yô, nan er doo kpishi.

³⁹ Kwase ngu sha tindi er nom u nan a lu uma yô. Kpa aluer nom u nan una kpe kera yô, nan ngu sha ian i nan iyol i nan, nan fatyô u eren nom sha ishima i nan, kpa i̱ lu ken Ter tseegh.

⁴⁰ Kpa aluer nana gba lun nahan tsô yô, á hemba saan nan iyol; ka mnenge wam je ne. Beem er mo kpaa, m ngu a Jijingi u Aôndo yô.