1 Mbakorinte 6 - ICIGHAN BIBILO

¹ Aluer orgen ken a ven ikyaa ia zua nan a orgen yô, nan cihi nan yila ijir hen mbaaferev, i kera lu hen uicighanmbaiorov ga zee?

² Shin ne kera fa er i lu uicighanmbaiorov je man vea ôr tar ijir gaa? Man aluer ka ne man nea ôr tar ijir yô, nahan ne kera kuma u ôron ajir a kiriki gaa?

³ Ne kera fa er mbatyomov mba Shaav je kpaa sé va ôr ve ijir gaa? Man hire akaa a shin tar ne?

⁴ Nahan aluer ne mba a ajir a sha kwagh u shin tar ne yô, mba i nengen ve er ve lu mba ikoogh ga ken nongo u Kristu la, ve̱ tema ve̱ ôr.

⁵ M ngu ôron ne kwagh ne, ka u van ne ahenge je. Or u fan kwagh môm tsô kpaa ngu ken a ven u nana fatyô u ôron ikyaa i hen anmgbianev mba nan gaa?

⁶ Angbian ka a gema a za yila anmgbian ijir man i lu hen mbanan jighjigh ga la jee?

⁷ Kera je kpaa kwagh hemba ne a hemba je er ne lu a ajir ayol a en yô. Kera guda u ne gba ngohol ibo sha apera tsô gaa? Kera guda u kwagh a gba saan ne tsô gaa?

⁸ Kpa ne mba eren sha mi ga, ne mba ngohol kwagh sha apera kpaa, man gema ka anmgbianev je.

⁹ Ne kera fa er mbaaferev vea ya dyako u tartor u Aôndo ga jee? I̱ de tsughun ne ga, mbadyarev shin mbasôronakombo shin mbavihin ivaa sha idya shin nomso mba ve yaven a ayol a ve

¹⁰ shin mbaiv shin mbahuav shin mbahundenmsôrom shin mbauityuhwanev shin mbanumungbenda kpaa, vea ya dyako u tartor u Aôndo je ga.

¹¹ Kape ne mbagenev kpaa ne vande lun la. Kpa i ôô ne, i tsegha ne, i na ne ishô ken iti i Ter Yesu Kristu man sha Jijingi u Aôndo wase.

¹² M ngu a ian sha akaa cii, kpa ka akaa cii man a lu iwasen ga, m ngu a ian sha akaa cii, kpa mo yô, me rumun ma kwagh u yan tor sha a mo ga.

¹³ Akaayan nga sha ci u iyav; iyav di kpaa mbu sha ci u akaayan, kpa mbu kua a kpaa, Aôndo Una kar a mi kera cii. Kpa iyol yô, ngi sha ci u idya ga, kpa ngi sha ci u Ter man Ter kpaa ngu sha ci u iyol.

¹⁴ Aôndo nder a Ter shin ku, se kpaa Una nder a vese sha agee a Na.

¹⁵ Ne kera fa er ayol a en a lu alegh a Kristu je gaa? Nahan me gema alegh a Kristu a̱ hingir alegh a agbagaa? Mayange ga.

¹⁶ Shin ne fa er or u nan zough a agbaga nan lu iyol i môm vea na gaa? Gadia i nger er: Ve uhar cii vea hingir iyôgh i môm je.

¹⁷ Kpa u nana var a Ter yô, nan ngu jijingi môm a Na je.

¹⁸ Yevese nen idya. Hanma isholibo igen i or nan eren yô, ka ken wonyolough tsô i lu ye. Kpa or u eren idya yô, ka iyol i nan je nan eren i kwaghbo ye.

¹⁹ Shin ne fa er iyol yen i lu tempel u Icighan Jijingi u A lu ken a ven u ne ngohol Un her Aôndo la gaa? Ne kera mba kwagh wen ayol a en ga.

²⁰ Gadia i yam ne a yam sha ishe je. Civir nen Aôndo ken iyol yen.