1 Mbakorinte 3 - ICIGHAN BIBILO

¹ Kpa mo yô, anmgbianev m fatyô u ôron ne kwagh er ka mbajijingiv nahan ga, kpa lu er mbaiyolov nahan tsô, er anikundanev ken Kristu nahan.

² Lu sha atumba je m koso ne ye, lu sha kwaghyan u taver ga, gadia ne lu a kuma ga. Hegen je kpaa ne mba a kuma ga,

³ gadia ne mba mbaiyolov heregh di tsô, gadia aluer iwuhe man iyongo vea lu her a ven yô, kera ka mbaiyolov ne lu, man kera ka sha inja i or ne zenden gaa?

⁴ Gadia aluer orgen nana kaa er: Mo yô, m ngu or u Paulu, shin ugen er: Mo m ngu or u Apolo, yô, kera ka ior tsô ne lu gaa?

⁵ Apolo ngu di nyi je? Man Paulu yô, ngu di nyi? Ka mbatomov mba i lu tom ve man ne gem ne ne jighjigh ye, sha inja i Ter A ne hanmô wase la.

⁶ Mo m môôr. Apolo gema ur mngerem, kpa ka Aôndo A ne mvese ye.

⁷ Nahan un u a môôr la ngu ma kwagh ga, shin un u a ur mngerem la kpaa ga, saa Aôndo u A ne mvese la.

⁸ Un u a môôr la vea un u a ur mngerem la ka kwagh môm tsô, kpa hanmô ve nana zua a injar i nan iyol i nan sha inja i tom u nan.

⁹ Gadia se mba mbashirentom a Aôndo imôngo je, ne mba sule u Aôndo je, man shi mmaa u Aôndo jim kpaa.

¹⁰ Ka sha mrumun u sha mhôôn u Aôndo u i nem la man m tim imagh er orfanmaa nahan ye, orgen nan kar nan ngu maan sha mi, kpa hanma or nana̱ er teghelee sha mmaa u nan maan sha mi la.

¹¹ Gadia ma or nana fatyô u shi timin imagh kigenegh kposo a ki i vande timin la ga, ka Yesu Kristu je la.

¹² Aluer hanma or nan ngu maan sha imagh kila yô, shin a lu zenaria shin a lu azurfa shin a lu awen a injaa shin a lu ikon shin a lu toho shin a lu ayia kpaa,

¹³ tom u hanma or ua hingir ken igbar, gadia ka iyange la ia tese inja i u ye, gadia ka sha usu je á pase iyange la ye, man ka usu ua kar tom u hanma or, er u lu ye.

¹⁴ Aluer tom u hanma or u nan maa la ua lu heregh yô, nana zua a injar.

¹⁵ Aluer tom u hanma or ua hia kera yô, akaa a nan saa kera je ve, kpa nan iyol i nan yô, nana war, kpa á lu je er ka sha usu nahan.

¹⁶ Ne kera fa er ne lu tempel u Aôndo man Jijingi u Aôndo A tem ken a ven gaa?

¹⁷ Aluer anti or nana vihi tempel u Aôndo yô, Aôndo Una vihi nan, gadia tempel u Aôndo ka icighan je, man ka ne ne lu tempel la ye.

¹⁸ Ma or nana̱ de tsughun iyol i nan ga. Aluer anti or u ken a ven nan ngu henen er nan ngu orfankwagh ken kov u ainge ne yô, nana̱ hingir ibumeor, man nana fa kwagh ye.

¹⁹ Gadia kwaghfan u tar ne ka Aôndo ibumekwagh je. Gadia i nger er: Un u A ker mbafankwagh sha atseregh a ve la,

²⁰ man shi: Ter fa mbamhen mba mbafankwagh la, ka gbilinkwagh tsô.

²¹ Nahan yô, ma or nana̱ de kera taan ihagh sha ior ga; gadia akaa cii ka a en,

²² shin a lu Paulu shin a lu Apolo shin a lu Kefa shin a lu tar shin a lu uma shin a lu ku shin a lu akaa a hegen, shin a lu akaa a a lu van ken hemen la kpaa, ka a en cii.

²³ Kpa ne yô, ne mba kwagh u Kristu, man Kristu gema ka u Aôndo je.