1 Mbakorinte 2 - ICIGHAN BIBILO

¹ Mo kpaa, anmgbianev, zum u m va hen ven la, lu sha kwaghôron u hemban shin sha kwaghfan man m ôr ne mpase u Aôndo ga.

² Gadia m wa ken ishima mer me fa ma kwagh ken a ven ga, saa di Yesu Kristu man er i mande Un a mande sha terankon la.

³ Mo yô, lu sha isheer man sha mcie man sha ikarikase iyol kpishi yan m va hen a ven ye.

⁴ Kwaghôron wam man kwaghaôndo wam u pasen kpaa, lu sha mhanger u kwaghôron tsô ga, kpa ikav i Jijingi man i agee kpaa lu sha mi,

⁵ sha er jighjigh wen u nan a̱ de suur sha mfe u ior ga, kpa i̱ lu sha agee a Aôndo.

⁶ Nahan kpaa se mba ôron kwagh u mfe je hen mba ve vie dedoo yô, kpa ka mfe u tar ne ga shin u mbavesen mba tar ne mba vea tim kera ne kpaa ga.

⁷ Kpa se mba ôron kwaghfan u Aôndo, ka kwaghmyer u i yer un, u Aôndo vande veren un sha ci u iengem yase je er i lu a gba tar ga yô.

⁸ Ma or u mbavesen mba tar ne fa kwagh ne ga, gadia vea fe un yô, ma ve mande Ter u iengem la sha terankon ga.

⁹ Se mba ôron er i nger la nahan er: Akaa a ashe a nenge a mi ga, ato kpaa a ungwa a ga, a ve or ken ishima kpaa ga, ka akaa a Aôndo A ser a sha ci u mba Un doo ve ishima la.

¹⁰ Kpa se yô, Aôndo gema pase se a sha Jijingi. Gadia Jijingi tev akaa cii, zan zan akaacimin a Aôndo je kpaa.

¹¹ Gadia hen ior yô, ka an nan fe akaa a oro, saa jijingi u or u a lu ken a nan la gaa? Kape akaa a Aôndo kpaa ma or nan fe a ga la, saa Jijingi u Aôndo tseegh.

¹² Kpa se yô, ka jijingi u taregh se ngohol ga, kpa ka jijingi u A dugh her Aôndo la, sha u se̱ fa akaa a Aôndo A ne se sha mhôôn yô.

¹³ Ka a je se lu ôron ye, ka sha asemberakaa a mfe u or a tesen la ga, kpa ka a Jijingi A tesen yô, nahan se mba karen akaa a jijingi sha akaa a jijingi.

¹⁴ Kpa or u nan lu ken uma u sha marami la tsô yô, nan ngohol akaa a jijingi u Aôndo ga, gadia ka nan akaa a ibume, nan fatyô u kaven a kpaa ga, gadia mba kar a sha inja i jijingi.

¹⁵ Kpa or u nan lu ken mlu u jijingi yô, nan karen akaa cii, kpa nan iyol i nan yô, ma or karen nan ga.

¹⁶ Gadia ka an nan fe mhen u Ter je u nana tese Un kwagha? Kpa se yô, se mba a mhen u Kristu.