1 Mbakorinte 15 - ICIGHAN BIBILO

¹ Anmgbianev, m ngu pasen ne sha u fa nen Loho u Dedoo u m ôr ne, ne ngohol ne til sha mi la.

² Ka sha u kpaa i lu yiman ne ye, aluer ne kôr ave sha mi gbang er m lu pasen ne kwaghôron la nahan, saa di nea na jighjigh gbilin tsô.

³ Gadia kwagh u vesen u mo kpaa m ngohol a ngohol m gem m ne ne yô: Kristu kpe sha asorabo ase er lu i nger ken icighanruamabera nahan.

⁴ I ii Un, sha iyange i sha utar la yô, A nder er lu i nger ken icighanruamabera nahan.

⁵ A ande hen Kefa, dondo sha mi yô, lu hen mba pue kar uhar.

⁶ Shi A ande hen anmgbianev hemba deri utaan sha shighe môm je, ken ve yô, mba ve lu uma her zan zan hegen ve hemba ngeen, kpa mbagenev yô, kpe kera.

⁷ Shi A ande hen Yakobu, man shi hen mbaapostoli cii kpaa.

⁸ Ken masetyô cii yô, mo kpaa A ande hen mo er wan u i mar un kôgh nahan.

⁹ Gadia mo m hemba gban ijime ken mbaapostoli cii m kuma u á yilam er apostoli kpaa ga, gadia m tôv nongo u Kristu u Aôndo a ican.

¹⁰ Kpa ka sha mrumun u sha mhôôn u Aôndo je man m lu kwagh u m lu ne ye, man mrumun Na u sha mhôôn u hen a mo la lu gbilin ga, kpa m hemba eren tom a ve cii, nahan kpaa lu mo ga, lu mrumun u sha mhôôn u Aôndo u a lu a mo la.

¹¹ Nahan shin a lu mo, shin a lu ve kpaa, kape se lu ôron kwaghaôndo je ne, man kape ne na jighjigh kpaa ne.

¹² Aluer mba pasen kwagh u Kristu er A nder shin mbakpenev yô, hii nan man mbagenev ken ven ve kaan er mnder u shin mbakpenev ngu ga?

¹³ Aluer mnder u shin mbakpenev ngu ga yô, nahan Kristu kpaa, i nder a Na ga.

¹⁴ Man aluer i nder a Kristu ga yô, kwaghaôndo wase u pasen ngu gbilin tsô, jighjigh wen u nan kpaa ngu gbilin.

¹⁵ Shi á va fa se er se lu mbashiada mba Aôndo mba aiev, gadia se mba sendegh kwagh a Aôndo eren shiada ser, A nder Kristu, man A nder Un ga je, aluer mnder u shin mbakpenev ngu ga yô.

¹⁶ Gadia aluer mba nderen mbakpenev ga yô, Kristu kpaa i nder Un ga je ve.

¹⁷ Man aluer i nder Kristu ga yô, jighjigh wen u nan kpaa ka gbilinkwagh tsô, ne mba ken asorabo a en her je.

¹⁸ Nahan mba ve kpe ken Kristu la kpaa ve saa je ve.

¹⁹ Aluer ka sha uma u hegen ne tseegh man se lu a ishimaverenkeghen sha Kristu yô, se hemba kôron mhôônom a ior cii.

²⁰ Kpa mimi je i nder Kristu shin mbakpenev, ka iyiagh ki tsutswagh ken mba ve kpe kera la.

²¹ Gadia er i lu sha or man ku u ve yô, kape mnder u shin mbakpenev di kpaa i lu sha or je la.

²² Gadia er i lu ken Adam man ior cii ve lu kpen yô, kape ken Kristu kpaa, á gema ior cii vea hingir mbaumav la.

²³ Kpa hanma or nana̱ lu sha nongo u nan. Iyiagh ki tsutswagh yô, ka Kristu; kwagh u a dondon yô, ka mba ve lu ior i Kristu sha m-ande Na la,

²⁴ u cirin yô, ka mkur zum u Una gema tartor Una na Aôndo Ter, er A vande timin tarkuran cii kera man tahav kua agee cii kpaa.

²⁵ Gadia ka u Una ya tor keng, zan zan Una gema mbaihomov Nav cii, vea lu shin angahar a Na.

²⁶ Orihom u masetyô u á tim un kera yô, ka ku.

²⁷ Gadia A gema akaa cii A wa sha ikev Na A ver shin angahar a Na je, kpa zum u i kaa er: I gema akaa cii hingir sha ikev Na yô, wanger er Un u A gema akaa cii A wa sha ikev Na la i we Un ker ga yô.

²⁸ Zum u á va gema akaa cii á hingir sha ikev Na yô, Wan kpaa Una gema iyol Na Una wa sha ikev i Un u A gem akaa cii A wa sha ikev Na la, sha er Aôndo Una hoghom cii ken hanma or cii yô.

²⁹ A lu nahan ga yô, mba i eren ve batisema sha ci u mbakpenev la, vea er nana? Aluer mba nderen mbakpenev mayange je ga yô, ka nyi man i eren ior mbala batisema sha ci ve?

³⁰ Ka nyi se lu zorough zorough a kwagh u tseren se u bo hanma shighe?

³¹ Mimi je, sha ihagh i m te sha a ven ken Kristu Yesu Ter wase ne, anmgbianev, m ngu kpen ayange ayange.

³² Aluer i lu sha inja i or man m nôngo a inyamikume ken Efese yô, i lum a inja sha nyi? Aluer mba nderen mbakpenev ga yô, se gbaa yan nen akaa man akaa tsô, gadia kper se mba kpen.

³³ De tsughun nen ayol a en ga, ujende mba bov mba vihin mbamlu mba dedoo.

³⁴ Nder nen tsevaa, de nen u eren isholibo. Mbagenev lan kwagh u Aôndo je, M ngu ôron nahan ka iheen yen je.

³⁵ Kpa orgen nana pine er: Mba nderen mbakpenev nana? Man ka inja i iyolough i nana vea va a mi?

³⁶ We orlanenkwagh ne! We iyol you kpaa, kwagh u u lee la, zough a uma ga, saa ka a vande kpen kera ve.

³⁷ Man aluer u lôô kwagh yô, ka iyol i una va lu a mi la, u lee ga, kpa ka ishange tseegh, shin a lu alakema shin a lu ma inja igen kpaa.

³⁸ Kpa ka Aôndo A ne i iyol er i sar Un yô, hanma inja i ivor ka A na i iyol sha inja i i.

³⁹ Inyam i akaa cii ngi inja i môm cii ga, inyam i uumace ngi kposo a inyam i shôso, inyam i inyon di kpaa gema ngi kposo a inyam i ishu.

⁴⁰ Akaa a sha aôndo nga, akaa a shin tar kpaa nga. Kpa iengem i a sha aôndo la ngi kposo, iengem i a shin tar kpaa ngi kposo je.

⁴¹ Iengem i iyange ngi kposo, iengem i uwer shi ngi kposo, iengem i asan di kpaa ngi kposo, gadia iengem i ishan igen ngi kposo a iengem i asan agen.

⁴² Kape mnder u shin mbakpenev kpaa, a lu la. Mba lee kwagh u a lu u hôôn yô, kpa mba gem mba nderen kwagh u a lu u hôôn ga yô.

⁴³ Mba lee kwagh u iheenegh mba gem mba nderen kwagh u icivirigh. Mba lee kwagh u lun isheer, mba gem mba nderen kwagh u ageegh.

⁴⁴ Mba lee iyol i sha marami, mba gem mba nderen iyol i sha inja i jijingi. Aluer iyol i sha marami ngi yô, iyol i sha inja i jijingi kpaa ngi.

⁴⁵ Kape i nger kpaa la er: Or u hiihii la, Adam, hingir or u uma. Adam u masetyô la hingir jijingi u nan a na uma.

⁴⁶ Kpa kwagh u hiihii yô, ka kwagh u sha inja i jijingi ga kpa ka u sha marami, kwagh u a dondo yô, ka u sha inja i jijingi la.

⁴⁷ Or u hiihii la ka u shin tar, ka shin inya je i dugh nan ye, Or u sha uhar la yô, ka Sha A dugh ye.

⁴⁸ Er or u i er nan sha inya nan lu nahan, kape mba i er ve sha inya kpaa ve lu je la. Man er Or u Sha a lu yô, kape mbashaav kpaa ve lu je la.

⁴⁹ Man er se lu a ibeen i or u shin inya yô, kape shi se va lu a ibeen i Or u Sha kpaa la.

⁵⁰ Kpa, anmgbianev, m ngu ôron ngun nahan mer: inyam man awambe fatyô u yan dyako u tartor u Aôndo ga, kwagh u a lu u hôôn la kpaa, ye dyako u kwagh u hôôn ga la ze.

⁵¹ Nenge, ka kwaghmyer je m lu ôron ne ye. Ka se cii sé kpe ga, kpa á va gema se cii.

⁵² Á lu fese je er ka i pelegh ashee nahan, sha mtenge u ikpamkor i masetyô la, gadia á tôngo ikpamkor man á nder mbakpenev vea kera lu mbahôôn ga je, man se yô, á gema se a gema.

⁵³ Gadia kwagh u a lu u hôôn ne, ka u una haa kwagh u a lu u hôôn ga la iyol keng, man kwagh u a lu u kpen ne kpaa ka u una haa kwagh u kpen ga la iyol.

⁵⁴ Kpa zum u kwagh u a lu u hôôn ne una haa kwagh u a lu u hôôn ga la iyol kera yô, man shi kwagh u a lu u kpen ne una gema á haa kwagh u kpen ga la iyol kera yô, ka zum la man kwaghôron u i nger la una kure vough ye, er: I mena ku sha mhembe je.

⁵⁵ Yô, ku, mhembe wou ngu hana? Ku, soho wou ngu hana?

⁵⁶ Soho u kuugh yô, ka isholibo man agee a isholibo gema ka tindi.

⁵⁷ Kpa i̱ wuese Aôndo u A ne se mhembe sha Ter wase Yesu Kristu.

⁵⁸ Nahan yô, ne anmgbianev av mba doon mo ishima, tile nen dông, de kpoghol nen ga, eren nen tom u Ter ngegh je sha hanma shighe cii, gadia ne fa, ken Ter yô, tom wen ngu gbilin ga.