1 Mbakorinte 12 - ICIGHAN BIBILO

¹ Hegen yô, anmgbianev, sha kwagh u uiwua mba jijingi yô, sarem ka de lanen nen ga.

² Ne fa, shighe u ne lu atôatyev la, i gba yemen a ven ken akombo a lamen ga la tsô, i za a ven han han kpaa.

³ Nahan yô, m ngu pasen ne sha u fa nen, ma or u nan er kwagh sha Jijingi u Aôndo yô, nana kaa er: Yesu ngu a ifan iyol ga, man shi ma or nana fatyô u kaan er: Yesu ka Ter ga; saa sha Icighan Jijingi.

⁴ Uiwua mba atôghatô kpa ka Jijingi môm tsô.

⁵ Ityom kpaa ngi atôghatô, kpa ka Ter môm tsô.

⁶ Akaa a eren kpaa nga atôghatô kpa ka Aôndo môm tsô A eren akaa ne cii ken hanma or ye.

⁷ Kpa i na hanma or mpase u Jijingi sha u i̱ lu mbagenev cii a inja yô.

⁸ Gadia orgen yô, ka sha Jijingi man i ne nan kwaghôron u sha kwaghfan ye, orgen yô, i na nan kwaghôron u kaven kwagh, sha Jijingi môm la je.

⁹ Ugen yô, ka jighjigh u nan, kpa ka sha Jijingi môm la je; orgen yô, ka uiwua mba been ior angev, kpa ka sha Jijingi môm la je.

¹⁰ Orgen yô, ka aeren a sha agee, orgen yô, ka u ôron kwaghôron u profeti, orgen yô, ka u karen ujijingi, orgen yô, ka u lamen ijô kposo kposo, orgen yô, ka u pasen ijô.

¹¹ Kpa akaa ne cii ka Jijingi ne môm A lu eren a ye, A karen hanma or kwar er i doo Un yô.

¹² Gadia er iyol i lu i môm man i lu a alegh kpishi yô, man alegh a iyolough a a lu kpishi la, a lu iyol i môm tsô yô, kape Kristu kpaa A lu je la.

¹³ Gadia se cii kpaa, ka sha Jijingi môm i er se batisema ken iyol i môm ye, shin a lu Mbayuda, shin a lu Mbagrika, shin a lu ikpan shin a lu ônov kpaa, se cii i haa se Jijingi môm, heen se iyol cii.

¹⁴ Gadia iyol kpaa ka ilyeegh i môm ga, alegh nga kpishi je.

¹⁵ Aluer nguhar ua kaa er: Er m lu uwegh ga yô, nahan m kera ngu ken iyol ga; sha kwagh la tsô yô, ngu ken iyol ga ze.

¹⁶ Man aluer togh kua kaa er: Er m lu ishe ga yô, nahan m kera ngu ken iyol ga; sha kwagh la tsô yô, ku ken iyol ga ze.

¹⁷ Aluer iyol cii ia lu ishe yô, m-ongo ma a lu hana? A lu m-ongo jimin cii yô, ihuma i hungul ma i lu hana?

¹⁸ Kpa hegen Aôndo ver alegh ken iyol hanmôgh ser ser er i doo Un yô.

¹⁹ Kpa aluer a cii a lu ilyeegh i môm yô, iyol ma i lu hana?

²⁰ Kpa hegen alegh yô, nga kpishi, kpa iyol gema ngi môm.

²¹ Ishe ia fatyô u kaan a uwegh er: Kwagh gbam a we ga, ze; shin ityough kpaa kia fatyô u kaan a angahar er: kwagh gbam a ven ga, ze.

²² Man ka nahan tseegh ga, kpa alegh a iyolough a i bee er a yina agee la gema nga a inja her keng.

²³ Man alegh a iyolough a i bee se er a yina icivir la, ka a je se hembe haan a icivir iyol ye, man alegh a ase a a doo ken igbar ga la, se mba hembe wuhan a iyol.

²⁴ Kpa alegh a ase a a doo ken igbar la yô, kwagh kera gba a nahan ga. Aôndo kohol iyol cii, zua, ilyeegh ki ki gbe ijime yô, A hemba nan ki icivir,

²⁵ sha u mpav a̱ de lu sha iyol ga yô, kpa alegh a̱ waan iyol a a iko vough vough cii.

²⁶ Aluer ican ngi eren ilyeegh i môm yô, alegh cii aa lu ken ican la imôngo. Aluer a civir ilyeegh i môm yô, a cii, aa ember imôngo.

²⁷ Kpa ne yô, ne mba iyol i Kristu man alegh a i ser ser.

²⁸ Man Aôndo ver mbagenev ken nongo u Kristu: hiihii yô, ka mbaapostoli, u dondon yô, ka uprofeti u cirin yô ka mbatesen, u gbiren sha mi yô, ka ityom i ageegh, u masen la yô, ka uiwua mba sha mrumun u sha mhôôn sha u been angev, man uiwasen man mnenge u nengen sha akaa, man ijô kposo kposo kpaa.

²⁹ Ka ve cii ve lu mbaapostoli yee? Ka ve cii ve lu uprofeti yee? Ka ve cii ve lu mbatesen yee? Ka ve cii ve eren akaa a sha agee yee?

³⁰ Ka ve cii ve lu a uiwua mba sha mrumun u sha mhôôn sha u been angev yee? Ka ve cii ve lu lamen ijô yee? Ka ve cii ve lu mbapasen ijô yee?

³¹ Kpa nôngo nen ngegh sha u zuan a uiwua mba ve hembe lun a inja cii yô; man me gema me tese ne gbenda u hemban jimin cii.