1 Mbakorinte 11 - ICIGHAN BIBILO

¹ Lu nen mbakaven mo er mo kpaa, m kaven Kristu nahan.

² M wuese ne je er ne lu umbur mo sha hanma kwagh cii, man ne lu kuran ityesen er m ne ne nahan vough.

³ Kpa sarem ka fa nen, ityough ki hanma nomsoor yô, ka Kristu, man ityough ki kwase yô, gema ka nom, man ityough ki Kristu yô, ka Aôndo je.

⁴ Hanma nomsoor u nana eren msen shin nana ôron kwaghôron u profeti man nan cir kwagh sha ityou yô, nan ngu heen ityough ki nan.

⁵ Kpa hanma kwase u nana eren msen shin nana ôron kwaghôron u profeti man nan cir kwagh sha ityou ga yô, nan ngu heen ityough ki nan je, gadia ka kwagh môm a u ma nan gbongor ityough je.

⁶ Aluer kwase nana cir kwagh sha ityou ga yô, nana̱ hondo ase ityough kpaa. Kpa a lu kwase kwagh u iheenegh u hondon ityough shin u gbongor ityough yô, nana̱ cir kwagh sha ityou.

⁷ Kpa nomsoor yô, ka u nana cir kwagh sha ityough ga gadia nan ngu ibeen man iengem i Aôndo, man kwase gema ka iengem i nomsoor.

⁸ Gadia ka nom nan dugh ken kwase ga, kpa ka kwase nan dugh ken nomsoor ye.

⁹ Man shi i gba nom sha ci u kwase ga, kpa i gba kwase sha ci u nom.

¹⁰ Ka nahan man i lu u kwase nana̱ lu a ikav i utaha sha ityou kpee sha ci u mbatyomov mba Shaav ye.

¹¹ Nahan kpaa ken Ter yô, kwase gbe lun ga, saa nomsoor kpaa nana lu, man shi nomsoor kpaa nan gbe lun ga, saa kwase nana lu.

¹² Gadia er kwase nan dugh ken nomsoor nahan yô, nomsoor di kpaa ka kwase a ne ve nan lu ye; man akaa cii gema ka ken Aôndo a dugh ye.

¹³ Yô, nenge nen ayol a en: Doo u kwase nana sôn Aôndo nana cir kwagh sha ityou ga kpa?

¹⁴ Kera je kpaa mlu u sha won tese er ka nomsoor kwagh u iheenegh u nana ume ityough gaa?

¹⁵ Kpa kwase yô, aluer nana ume ityough yô, ka nan kwagh u icivirigh je. Gadia i na nan ice la sha u i̱ lu nan kwagh u cirin.

¹⁶ Aluer ma or wa anyiman yum yô, se yô, se mba a imbaieren la nahan ga, shin iniongo i Kristu i Aôndo kpaa ga.

¹⁷ M ngu wan ne kwagh ne nahan kpaa, kwagh u m wuese ne sha mi gayô, ka er mkohol u ne kohol la i kera lu kwagh u doon a dugh heregh ga, i gem i lu kwagh u vihin a vihi yô.

¹⁸ Gadia kwagh u hiihii yô, m ungwa mer, mbampav mba her atô wen man m wa nan kwagh la jighjigh kpaa.

¹⁹ Gadia ka u mbamkaha vea lu ken a ven keng sha u mbamimi ve̱ due ken igbar yô.

²⁰ Ka nea kohol yô, i kera lu u yan kwaghyan u umbur Ter la ga.

²¹ Gadia hanma or ka nan gba sasen yan kwaghyan u nan iyol i nan tsô. Orgen ijen i lu kôron nan orgen di nan lu hunden je.

²² Nahan yô, ne kera mba a uya mba né ya kwagh ker, né ma kwagh ker gaa? Shin ka nongo u Kristu u Aôndo ne lahan ve ne ne mba ve lu a kwagh ga la iheene? Tsô me kaa ne nana? Me wuese nee? Sha kwagh ne yô, m ngu wuese ne ga.

²³ Gadia mo yô, kwagh u m ngohol un hen Ter yô, m gema m na ne mer: Ter Yesu tôô bredi hen tugh mbu i nenge Un mker la,

²⁴ sughun Aôndo yô, A coon A kaa er: Ngun ka iyol Yam je ne, ngi sha ci wen. Eren nen kwagh ne sha u umbur Mo.

²⁵ Mba ye kwaghyan kera yô, A tôô iyongo nahan vough A kaa er: Iyongo ne yô, ka Ikuryan i he i sha awambe Am. Eren nen kwagh ne sha u umbur Mo sha hanma shighe u nea maan i cii.

²⁶ Gadia hanma shighe u nea yaan bredi ne man shi nea maan iyôngo ne yô, ka ku u Ter je ne lu yôôn u ye; zan zan Una kar van.

²⁷ Nahan hanma or u nana ya bredi ne shin nana ma iyongo i Ter sha dang yô, nana lu a ibo sha iyol i Ter man sha awambe a Na kpaa.

²⁸ Kpa or nana̱ kar iyol i nan man nana ya bredi la man nana ma iyongo la ye.

²⁹ Kpa u nana ya shi nana ma yô, nan ngu yan man nan ngu man haan mtsaha sha iyol i nan aluer nana kav er i lu iyol i Ter ga yô.

³⁰ Ka nahan man mbagenev kpishi ken a ven ve lu aseeraior, ve lu dedoo ga kpaa ye, mbagenev kpe kera je.

³¹ Kpa aluer sea kar ayol a ase mimi yô, ma i er se ijir ga.

³² Kpa ka Ter je A lu karen mlu wase kôôm se ye, sha u i̱ de tsahan se a tar imôngo ga yô.

³³ Nahan yô, anmgbianev, aluer ne kohol sha u yan kwagh yô, kegh nen anmgbianev kpaa.

³⁴ Aluer ijen ia kôr orgen yô, nana̱ ya kwagh ken ya u nan sha er mkohol wen la a̱ de hee ne mtsaha iyol ga yô. Akaa a a shi yô, me va wa kwagh sha mi shighe u me va yô.