1 Mbakorinte 1 - ICIGHAN BIBILO

¹ Paulu u i yila un a yila sha ishima i Aôndo sha u a̱ lu apostoli u Kristu Yesu, kua Sosetene, anmgbian,

² mba sughun nongo u Kristu u Aôndo u u lu ken Korinte la, mba i tsegh ve ken Kristu Yesu, mba i yer ve er ve̱ lu uicighanmbaiorov a mba ve yilan sha iti i Ter wase Kristu la imôngo cii, sha hanma ijiir cii, ka Ter ve man Ter wase kpaa;

³ mrumun u sha mhôôn a̱ lu sha a ven man bem mba ve dugh ken Aôndo Ter wase man Ter Yesu Kristu.

⁴ Mba sughun Aôndo ayange ayange sha ci wen, sha ci u mrumun u sha mhôôn u Aôndo u i ne ne ken Kristu Yesu ne,

⁵ gadia sha hanma gbenda cii i gema ne ne hingir mbalun a akaa wuee ken a Na, sha hanma kwaghôron cii man hanma mfe cii kpaa—

⁶ er i taver shiada u i er sha Kristu la ken a ven nahan—

⁷ nahan ne kera yina sha ma iwua i sha mrumun u sha mhôôn ga, er ne keghen mpase u á va pase Ter wase Yesu Kristu ken igbar la,

⁸ u Una taver ne zan zan mkur sha u né kera lu a acôghol iyol sha iyange i Ter wase Yesu Kristu la ga yô.

⁹ Aôndo ka u jighjigh, A yila ne u lun ken mzough vea Wan Na Yesu Kristu Ter wase.

¹⁰ M ngu zamber a ven anmgbianev, ken iti i Ter wase Yesu Kristu mer: Ne cii, lu nen zwa môm, mbampav ve̱ de lu her a ven ga, kpa zua nen, lu nen ishima i môm man mhen môm kpaa.

¹¹ Gadia, anmgbianev, ior mba ken ya u Kelue ôrom kwagh wen er ayongo nga ken atô wen.

¹² Kwagh u m ver ishima sha mi jim je yô, ka er hanmô wen ka nan kaa er: Mo m ngu or u Paulu, mo di m ngu or u Apolo, mo yô, m ngu or u Kefa, mo ne yagh yô, m ngu u Kristu.

¹³ Nahan yô, i pav Kristu shinii? Ka Paulu man i mande un sha terankon sha ci wen yee? Shin ka ken iti i Paulu je i er ne batisema ase?

¹⁴ M wuese er m er mô wen batisema ga yô, saa di Krisepu man Gayu tsô,

¹⁵ sha er ma or nana̱ de kaan er: Ka ken iti yam i er ne batisema ga.

¹⁶ Mba ken ya u Sefana kpaa, m er ve batisema, sha mfe wam yô, m kera er orgen batisema ga.

¹⁷ Gadia Kristu tindim, lu sha u eren batisema ga, kpa lu sha u m ôron Loho u Dedoo, i̱ de lu sha kwaghôron u fan yum kpaa ga sha u terankon u Kristu u̱ de hingir gbilinkwagh ga yô.

¹⁸ Gadia kwaghôron u terankon ka mba ve lu timin la ibumekwagh, kpa se mba i lu yiman se yô, gema ka se agee a Aôndo je.

¹⁹ Gadia i nger er: Me vihi mfe u mbafankwagh, man mkav u mbakavenkwagh kpaa, Me bunde un.

²⁰ Orfankwagh ngu hana? Man orngeren ngu hana? Or u sendegh kwagh u hen ayange ne nan ngu hana? Aôndo kera gema mfe u tar ne hingir ibumekwagh gaa?

²¹ Gadia er i lu sha kwaghfan u Aôndo je man tar u kera fe Aôndo sha gbenda u kwaghfan la ga yô, nahan doo Aôndo u yiman mba ve ne jighjigh la sha ibumegh ki kwaghôron Na.

²² Gadia Mbayuda mba pinen uivande man Mbagrika yô, mba keren kwaghfan.

²³ Kpa se yô, se mba pasen kwagh u Kristu u i mande Un sha terankon; Mbayuda yô, ka kwagh u nan ve gbev mbu nôngon je, man atôatyev yô, gema ka ve ibumekwagh je.

²⁴ Kpa ve mba i yer ve yô, Kristu gema ka ve agee a Aôndo man kwaghfan u Aôndo kpaa, shin a lu Mbayuda, shin Mbagrika kpaa.

²⁵ Gadia ibumegh ki Aôndo hemba kwaghfan u ior man isheer i Aôndo hemba agee a ior.

²⁶ Gadia nenge nen sha myer u i yila ne la, anmgbianev, mbafankwagh sha inja i iyolough ngee ken ven ga, mbaageev kpaa ngee ga, shin mbaiciviriv kpaa ga.

²⁷ Kpa akaa a a lu a ibume ken tar yô, Aôndo sange a sha u heen mbafankwagh man akaa a a lu a agee ga ken tar yô, Aôndo sange a sha u heen akaa a a lu a agee la,

²⁸ man akaa a a lu a icivir ga ken tar la man a i laha a la, man a a gbe kwagh ga la, Aôndo sange a sha u Una vihi akaa a a gbe kwagh la kera yô,

²⁹ sha er ma or nana̱ de te ihagh sha ishigh ki Aôndo ga yô.

³⁰ Kpa ka Un A ne ne lu ken Kristu Yesu ye, Un u Aôndo gema Un A hingir se mfe man perapera man mtsegh man mpaa kpaa.

³¹ Nahan i̱ lu er i nger nahan er: U nan te ihagh yô, nana̱ ta ihagh ken Ter.