1 Kroniku 9 - ICIGHAN BIBILO

¹ Kape i nger ati a Iserael cii ken takerada u icombor ve la; nenge, i nger a ken ruamabera u utor mba Iserael. I yem a Yuda uikangen ken Babilon sha ci u atindi ve a peren la.

² Mba ve vande va teman ken ityar ve ken agar a ve yô, lu Iserael man upristi man Mbalevi kua mbasôrontempel.

³ Ônov mba Yuda man mba Benyamin man mba Eferaim kua Manase ve pande ve tema ken Yerusalem,

⁴ lu: Utai wan u Amihudi, wan u Omri, wan u Imri, wan u Bani; ken ônov mba Perese, wan u Yuda.

⁵ Man ken Mbashilon yô, lu: Asaia wan u iunda a ônov nav.

⁶ Man ken ônov mba Sera yô, lu: Yehuel man anmgbianev vev, ve lu ior deri ataratar man akunduanyiingber.

⁷ Ken ônov mba Benyamin yô, lu: Salu wan u Meshulam, wan u Hodavia, wan u Hasenua;

⁸ man Ibeneia wan u Yeroham man Ela wan u Ushi, wan u Mikeri; man Meshulam wan u Shefatia, wan u Reuel, wan u Ibeniya;

⁹ kua anmgbianev vev sha ikov ve; ve lu ior deri utaankarunyiin man akunduahargber kar ataratar. Mban cii lu uityombaiorov mba sha uya mba uter ken icombor ve.

¹⁰ Ken upristi yô, lu Yedaia man Yehoyaribi man Yakin;

¹¹ man Asaria wan u Hilkia, wan u Meshulam, wan u Sadoki, wan u Merayoti, wan u Ahitubi, orvesen u nengen sha iyou i Aôndo;

¹² man Adaia wan u Yeroham, wan u Pashur, wan u Malkiya; man Maasai wan u Adiel, wan u Yasera, wan u Meshulam, wan u Meshilemiti, wan u Imer;

¹³ man anmgbianev vev, uityombaiorov mba sha uya mba uter vev; ve lu ior dubu man deri utaankaruhar man akunduatar; ve lu ior mba ve fa tom u eren ken iyou i Aôndo dedoo yô.

¹⁴ Man ken Mbalevi yô, lu Shemaia, wan u Hashubi, wan u Aserikam, wan u Hashabia, ken ônov mba Merari;

¹⁵ man Bakebakar man Hereshi man Galal man Matania, wan u Mika, wan u Shikeri, wan u Asav;

¹⁶ man Obadia, wan u Shemaia, wan u Galal, wan u Yedutun; man Berekia, wan u Asa, wan u Elkana; ka mba ve tema ken agar a Mbanetofati je la.

¹⁷ Mbakuranhunda yô, lu: Shalum man Akubi man Talmon man Ahiman kua anmgbianev vev; ka Shalum lu orvesen ye;

¹⁸ ngu sha hunda u tor vegher u sha ityoughkitaregh heregh zan zan hegen; ve lu mbakuranhunda u afo a ônov mba Levi.

¹⁹ Shalum wan u Kore, wan u Ebiasav, wan u Kora, man anmgbianev nav mba ken ya u ter na, ka Mbakora je la, i wa ve tom sha ikev, ve lu kuran ihinda i tenti; uter vev vande lun mbakuran hunda u nyôron ken afo a TER.

²⁰ Pinehashi wan u Eleasar lu or u nengen sha a ve, sha ayange a tsuaa la; TER lu a na imôngo.

²¹ Sekaria wan u Meshelemia lu orkuran hunda u tenti u kohol ker la;

²² mban cii mba i sange ve sha er ve lu mbakuran ihinda yô, lu ior deri uhar man pue kar uhar. Ve cii i nger ati ve ken takerada u icombor ve, ken agar a ve; ka Davidi kua Samuel ornengen akaa a ken hemen la, ve ver ve sha tom ve ye.

²³ Ve kua ônov vev, ve lu mbanengen sha ihinda i iyou i TER, ka iyou i tenti je la; ve lu mbakuran.

²⁴ Mbakuranihinda lu sha avegher anyiin, ka vegher u sha ityoughkitaregh man u shin ityôtar man u ken imbusutarimese man u ken imbusutariyan la.

²⁵ I ver anmgbianev vev mba ken agar a ve, er ve̱ nyôr tom a ve imôngo sha ashighe ashighe, hanmô ve nan nyôr ayange ataankarahar;

²⁶ gadia mbakuran mba unyiin mba ve lu mbahemenev la, ve lu Mbalevi, ve lu sha tom gbem, ve lu nengen sha ayou kua sha akaa a i koso a ken iyou i Aôndo la yô.

²⁷ Ve kase iyou i Aôndo ve tsaan her, gadia i wa ve tom u kuran i sha ikev, ve bughun i kpaa hanma sev.

²⁸ Mbagenev lu mba nengen ikav mbi tomov; gadia i ôron iyenge i mbi shighe u nyôron a mi man u duen a mi kpaa.

²⁹ Shi i ver mbagenev kpaa sha u kuran ikav mbi ken iyou la, man uicighanmbaakaav cii, man shi u kuran mwem ma kengese man wain man mkurem man kwaghhumandoon kua ilyôghonov.

³⁰ Ônov mba upristi mbagenev lu mbasôron ilyôghonov nungwan mbi.

³¹ Matitia, Orlevi, waniunda u Shalum, Orkora, lu or u nengen sha tom u kaan akaa sha atsenge.

³² Anmgbianev vev mbagenev ken ônov mba Kohati ve lu nengen sha ubredi mba sha ishi, sha u sôron ve hanma iyange i memen.

³³ Man mbawanatsam kpaa lu, mbavesen mba sha uya mba uter mba Mbalevi, ve teman ken ayou a hen tempel la, i na ve tom ugen ga, gadia tugh man tetan cii, ve luun sha tom ve.

³⁴ Mban lu mbavesen mba sha uya mba uter ken Mbalevi, ve lu mbahemenev sha ikov ve; ve tema ken Yerusalem.

³⁵ Ken Gibeon yô, ter u Gibeon, Yeiel tema ker; iti i kwase na er Maaka,

³⁶ wan na u iunda lu Abedon, man Sur man Kishi man Baal man Ner man Nadabi

³⁷ man Gedor man Ahio man Sekaria man Mikeloti.

³⁸ Mikeloti mar Shimean; ve kpaa ve tema a anmgbianev vev imôngo ken Yerusalem, ve zua ishiv a anmgbianev vev.

³⁹ Ner mar Kishi; Kishi gema mar Saulu; Saulu gema mar Yonatan man Malkishua man Abinadabi man Eshebaal.

⁴⁰ Wan u Yonatan yô, lu Meribibaal; Meribibaal mar Mika.

⁴¹ Ônov mba Mika yô, lu Piton man Meleki man Taharea man Ahashi.

⁴² Ahashi mar Yara; Yara mar Alemeti man Asemaveti kua Shimeri; Shimeri mar Mosa;

⁴³ Mosa mar Binea, wan na Refaia, wan na Eleasa, wan na Asel.

⁴⁴ Asel lu a ônov mba nomso ataratar, ati ve yô, lu: Aserikam, Bokeru, Ishemael, Shearia, Obadia man Hanan; ka ônov mba Asel je la.