1 Kroniku 5 - ICIGHAN BIBILO

¹ Man ônov mba Ruben waniunda u Iserael (gadia un ka waniunda; kpa er a hôngor a gambe u ter na yô, i gema tamen na i na ônov mba Yosev, wan u Iserael, nahan i kera nger tsombor na er ka wan u tamen ga.

² Gadia Yuda hemba anmgbianev nav, ka ker a na je orkurantar due ye; kpa dyako u iunda yô, hingir u Yosev);

³ ônov mba Ruben waniunda u Iserael yô, lu: Hanoki man Palu, Heseron man Karmi.

⁴ Ônov mba Yoel yô, lu: Wan na Shemaia, wan na Gogi, wan na Shimei,

⁵ wan na Mika, wan na Reaia, wan na Baal,

⁶ wan na Beeri u Tilgati-pilneser tor u Ashiria yem a na uikangen la, un lu ityoor u Mbaruben.

⁷ Man anmgbianev nav, sha icombor ve er i nger ati ve sha mar ve yô, ka: Yeiel orhemen, man Sekaria,

⁸ man Bela wan u Asase, wan u Shema, wan u Yoel u a tema hen Aroer zan zan za ar hen Nebo man Baal-meon la;

⁹ shi a tema vegher u sha ityoughkitaregh zan zan za ar henpe nyôron ken desereti hii hen ifi u Uferati je, gadia ilev vev seer ngeen ken tar u Gileadi.

¹⁰ Sha ayange a Saulu la, ve nôngo ityav a Mbahager ve hemba ve, maa ve za tema ken utenti vev ken tar u Gileadi vegher u sha ityoughkitaregh la cii.

¹¹ Ônov mba Gadi tema sha ishigh vegh ken tar u Bashan zan zan za ar hen Saleka;

¹² Yoel lu orhemen, Shafam gema dondo; Yanai man Shafati kpaa tema ken Bashan;

¹³ anmgbianev vev mba sha uipaven mba uya mba uter vev yô, ka: Mikael man Meshulam man Sheba man Yoraia man Yakan man Shia kua Eber; lu utaankaruhar je.

¹⁴ Mban lu ônov mba Abihail wan u Huri, Wan u Yaroa, wan u Gileadi, wan u Mikael, wan u Yeshishai, wan u Yado, wan u Bushi;

¹⁵ Ahi wan u Abediel, wan u Guni, lu orhemen u uya mba uter vev.

¹⁶ Ve tema ken Gileadi ken Bashan man ken agar a na, man ken ajiir a toho a Sharon, zan zan za ar hen akighir a a.

¹⁷ Mban cii i nger ati a ve ken takerada u icombor ve, sha ayange a Yotam tor u Yuda man sha ayange a Yerobiam tor u Iserael.

¹⁸ Ônov mba Ruben man Mbagadi man vegherkwe u Manase, anomaior a a tôôn perutya man sanker, man mbakerenavaan, mbafantyav yô, ve lu ior dubu akunduahar kar unyiin man deri utaankaruhar man akunduatar, ka mba ve zaan ityav je la.

¹⁹ Ve nôngo ityav a Mbahager man a Yetur man Nafishe man Nodabi.

²⁰ Ve zua a iwasen sha u nôngon ityav a ve, Mbahager hingir sha ikev ve, kua mba ve lu a ve imôngo la cii; gadia ve vaa a Aôndo ken utya, Un kpaa A ungwa zamber ve, er ve suur sha a Na yô.

²¹ Ve kura uzendenya vev: urakumi dubu akunduahargber, man iyôngo dubu deri uhar man akunduahargber, man ujaki dubu uhar, kua ior dubu deri kpaa.

²² Gadia i wua ior ngee, sha ci u ityav mbila lu mbi Aôndo yô, maa ve tema ken ajiir a ve sha ityouv vev zan zan shighe u i yem a ve uikangen la.

²³ Ônov mba vegherkwe u Manase yô, ve tema ken tar la, ve ngee, ve hii hen Bashan zan zan za ar hen Baal-hermon man Senir kua uwo u Hermon.

²⁴ Mbahemenev mba uya mba uter vev ka: Efer man Ishi man Eliel man Aseriel man Yeremia man Hodavia man Yadiel, ve lu anomaior a zan ati, mbahemenev mba uya mba uter vev.

²⁵ Kpa ve per atindi a Aôndo u uter vev, ve er idya ve dondo mbaaôndo mba ior mba hen tar la, mba Aôndo lu tim ve sha ishigh vegh kera la.

²⁶ Tsô Aôndo u Iserael tor jijingi u Pul tor u Ashiria la ityô, man jijingi u Tilgati-pilneser tor u Ashiria; tsô a va kura Mbaruben man Mbagadi kua vegherkwe u Manase, a yem a mi uikangen ken Hala man Habor man Hara man hen ifi u Gosan zan zan nyian.