1 Kroniku 4 - ICIGHAN BIBILO

¹ Ônov mba Yuda yô, lu Perese man Heseron man Karmi man Hur man Shobal.

² Reaia wan u Shobal mar Yahati; Yahati mar Ahumai man Lahadi, mban ka icombor i Mbasorati.

³ Ônov mba Etam yô, lu Yesereel man Ishema man Idebashi; man iti i anngô ve u kwase lu Haseleleponi;

⁴ Penuel lu ter u Gedor man Eser ter u Husha. Mban ka ônov mba Hur, waniunda u Eferata, ter u Betelehem.

⁵ Ashur ter u Tekoa lu a kasev uhar, Hela man Naara.

⁶ A mar Ahusam man Hefer man Mbateman man Mbaahashetari a Naara. Ka ônov mba Naara je ne.

⁷ Ônov mba Hela lu: Sereti man Isehar man Etenan.

⁸ Koshi mar Anubi man Sobeba man icombor i Aharhel wan u Harum.

⁹ Yabeshi hemba anmgbianev nav icivir; ngô na yila un iti er Yabeshi, a kaa er: Gadia m mar un sha ican.

¹⁰ Yabeshi sôn Aôndo u Iserael er: Ma U verem doo doo, ma U seer tar wam, uwegh Ough ma ku lu a mo, ma U yemen, kwaghbo ma a tserem ga. Tsô Aôndo er un kwagh u a sôn la.

¹¹ Kelubi anngô u Shua mar Mehir, ka ter u Esheton je la.

¹² Esheton gema mar Bete-rafa kua Pasea man Tehina ter u Irnahashi. Ka ior mba Reka je ne.

¹³ Ônov mba Kenashi yô, lu: Oteniel man Seraia; man ônov mba Oteniel yô, lu: Hatati man Meonotai.

¹⁴ Meonotai mar Ofera, Seraia mar Yoabi ter u Geharashim; gadia ve lu mbafan tomaveegh doo doo.

¹⁵ Ônov mba Kalebu wan u Yefune yô, lu: Iru man Ela man Naam; man ônov mba Ela lu: Kenashi.

¹⁶ Ônov mba Yehalelel yô, lu: Shiv man Shifa, Tiria kua Asarel.

¹⁷ Ônov mba Esera yô, lu: Yeter man Meredi man Efer man Yalon; mban yô, ka ônov mba Bitia, wan u Farao u kwase, u Meredi er yô; a mar Miriam man Shamai, man Isheba ter u Eshetemoa.

¹⁸ Kwase na, wan u Mbayuda, mar Yeredi ter u Gedor, man Heber ter u Soko, kua Yekutiel ter u Sanoa.

¹⁹ Ônov mba kwase u Hodia, anmgbian u Naham u kwase yô, lu: ter u Keila, Orgarmi, man Eshetemoa, Ormaakati.

²⁰ Ônov mba Shimon yô, lu: Amnon man Rina man Benhanan man Tilon. Ônov mba Ishi yô, lu: Soheti man Ben-soheti.

²¹ Ônov mba Shela wan u Yuda yô, lu: Er, ter u Leka, man Laada ter u Maresha, man icombor i ya u mba ve tumen akondo a pupuu a legh legh, hen Bete-ashebea,

²² man Yokim, kua ior mba Koseba, man Yoashi man Sarafi mba ve tema tor ken Moabi, man Yashubi-lehem (akaangeren ne ka a ngise je).

²³ Mban ka mbamaantyev, mba ve tema ken Netaim man Gedera la; ve tema keregh a tor imôngo, ve lu eren un tom.

²⁴ Ônov mba Shimeon yô, lu: Nemuel man Yamin man Yaribi man Sera man Shaul;

²⁵ Shalum wan na, Mibesam wan na, Mishema wan na.

²⁶ Ônov mba Mishema yô, lu: wan na Hamuel, wan na Sakur, wan na Shimei.

²⁷ Shimei yô, lu a ônov mba nomso pue kar ataratar, ônov mba kasev ataratar; kpa anngôôv nav yô, mar kpishi ga, man icombor ve cii seer er ônov mba Yuda nahan ga.

²⁸ Ve tema ken Bersheba man Molada kua Hasar-shual

²⁹ man hen Bila man hen Esem man hen Toladi,

³⁰ hen Betuel kpaa man hen Horma man hen Shikelagi,

³¹ man hen Bete-markaboti man Hasar-sushim man hen Bete-biri man hen Shaaraim. Ka agar a ve je ne, zan zan ar sha ayange a tor u Davidi.

³² Angarev vev yô, lu Etam man Ain man Rimon man Token man Ashan, lu agar ataan;

³³ kua agar a ve cii, a a kase agar shon la zan zan ar hen Baal. Ka ajiir a ve a teman je la, ve nger ati a icombor ve.

³⁴ Man Meshobabi kua Yameleki man Yosha wan u Amashia,

³⁵ man Yoel man Yehu wan u Yoshibia, wan u Seraia, wan u Ashiel,

³⁶ man Elioenai man Yaakoba man Yeshohaia man Asaia man Adiel man Yeshimiel man Benaia,

³⁷ man Shisa wan u Shifi, wan u Alon, wan u Yedaia, wan u Shimeri, wan u Shemaia,

³⁸ mban mba i ter ve sha ati ve ne lu uityombaiorov sha icombor ve; uya mba uter vev kpaa seer kpishi.

³⁹ Ve za zan zan ar hen pe nyôron Gedor hen pev la, vegher u sha ityoughkitaregh, sha u keren ajiir a toho sha ci u akumauile ve.

⁴⁰ Ve zua a toho u hômon u dedoo, tar la gbangese lu ving, bem bem; gadia mba ve tema her tsuaa la, lu Mbaham je.

⁴¹ Mba i nger ati ve mbala, ve va sha ayange a Hesekia tor u Yuda, ve yôhôl utenti vev, ve hemba Mbameun mba i kohol ve her la, ve tim ve purututu zan zan nyian, maa ve tema sha ityouv vev; gadia ajiir a yan toho lu heregh sha ci u akumauile ve.

⁴² Mbagenev ken a ve, ka ônov mba Shimeon, ior deri utaan, ve za sha uwo u Seir; mbahemenev vev yô, lu: Pelatia man Nearia man Refaia man Ushiel, ônov mba Ishi.

⁴³ Ve hemba Mbaamaleki mba lu ve war, ve shi her la, maa ve tema heregh zan zan nyian.