1 Kroniku 29 - ICIGHAN BIBILO

¹ Tsô tor Davidi kaa ior cii er: Wan wam Solomon u Aôndo A tsough un ne, hide ka wanye tsô, ngu denge denge, man tom yô, u kehe; gadia zegeyou la ngu sha ci u or ga, kpa ka sha ci u TER Aôndo je.

² Ka sha agee am cii je, m kohol akaa sha ci u iyou i Aôndo wam ye; zenaria sha ci u akaa a sha zenaria, man azurfa sha ci u akaa a sha azurfa, man togula sha ci u akaa a sha togula, man iyôv mbi iliv sha ci u akaa a sha iyôv mbi iliv, man ikon sha ci u akaa a sha ikon, man awen a oniki, man awen a wan sha akaa, man awen a hweegh man a lun ashe anza kposo kposo, man awen a injaa anza kposo kposo, kua awen a mabel kpishi kpaa.

³ Man er iyou i Aôndo wam i diom ishima yum yô, inyaregh yagh iyol yam, ki zenaria kua ki azurfa, m na ki sha ci u iyou i Aôndo wam, seer sha ki m vande kohol sha ci u icighanyou la cii;

⁴ ka zenaria, utalenti dubu utar, zenaria u Ofir; man azurfa u i ser sha usu yô, ka utalenti dubu utaankaruhar, sha u cirin ukpekpembaayoughouv a mi;

⁵ zenaria sha ci u akaa a zenaria, man azurfa di sha ci u akaa a azurfa, man shi sha ci u hanma injatom i sha ave a mbafaneev. Ka an nana na iyol i nan nyian gbar gbar u ivin ikev i nan sha u nan TER iwua?

⁶ Tsô mbahemenev mba sha uya mba uter, man mbahemenev mba ikwe i Iserael, man mbahemenev mba sha ior dubu dubu man mba sha ior deri deri, kua mbahemenev mba sha tom u tor, ve na iwua sha asema a gbar gbar;

⁷ ve na zenaria utalenti dubu utaan man udariki dubu pue, man azurfa utalenti dubu pue, man togula utalenti dubu deri, sha ci u tom u iyou i Aôndo.

⁸ Mba i zua ve a awen a injaa yô, ve na a sha ci u akaainjaa a iyou i TER, sha ikev i Yehiel Orgershon.

⁹ Tsô ior ember, er ve na gbar gbar nahan, gadia ve na TER iwua a ishima i môm gbar gbar; tor Davidi kpaa lu saan saan.

¹⁰ Nahan Davidi wuese TER Sha ishigh ki ior cii. Davidi kaa er: I̱ wuese We, TER, Aôndo u ter wase Iserael, gbem sha won.

¹¹ We TER, U kuma ivesen man agee man iengem man mhembe man icivir, akaa a Sha man a shin tar cii ka a Ou; We TER, U kuma u teman tor, U ngu ityough sha akaa cii.

¹² Inyaregh man icivir ka her a We ve dugh ye, U tema tor sha akaa cii; sha uwegh Ough yô, agee nga kua tahav kpaa; ka sha uwegh Ough á civir man á taver akaa cii ye.

¹³ Hegen yô, Aôndo wase, se mba sughun We, shi se mba wuese iti You i iengem kpaa.

¹⁴ Kpa mo m ngu an je, man ior av mba di nyi je, u se taver se na iwua sha ishima i gbar gbar nahana? Gadia akaa cii ka hen a We a dugh ye, ka kwagh Wou se hidi a mi, se ne U ye.

¹⁵ Gadia se mba mbavannya man ushirmbaiorov sha ishigh You er uter asev cii lu nahan; ayange ase a sha won kpaa nga er mure nahan, ishimaverenkeghen kpaa kera ngi ga.

¹⁶ TERE, Aôndo wase, ikav mbin mbi se kohol cii se ver sha u maan We iyou sha ci u icighanti Wou ne, ka ken uwegh Ough mbi dugh ye, ka mbi You cii.

¹⁷ Shi m fa kpaa, Aôndo wam, U kar ishima, perapera doo U. Mo iyol yam yô, ka sha ishima yam i wang je, m ne akaa ne cii gbar gbar ye; hegen yô, ka sha iember je, m nenge ior Ou, mba ve kohol heen, ve ne U akaa gbar gbar ye.

¹⁸ TERE, Aôndo u uter asev, Aberaham man Isaka man Iserael, kura kwagh ne ken mhen u asema a ior Ou, gbem, ver ve asema sha a We taveraa;

¹⁹ na wan wam Solomon ishima i jighilii kpaa, er una wa atindi a Ou man mbampase Ou man akaawan a Ou iko, a̱ er akaa ne cii man shi a̱ maa tempel u m kohol ikav mbi eren un a mi la.

²⁰ Tsô Davidi kaa a ior cii er: Yô, wuese nen TER, Aôndo wen. Tsô ior cii wuese TER, Aôndo u uter vev, ve wa ityough inya, ve gure ve civir Aôndo, ve civir tor kpaa.

²¹ Kper nan la yô, ve na TER nagh, ve na TER iniav mbi nanden sha abua dubu, man anomaiyôngo dubu, man agumaiyôngo dubu, a iniav vev mbi man imôngo, man iniav mbi sôngon wuee, sha ci u Iserael cii.

²² Ve ya kwagh ve ma kwagh sha ishigh ki TER, a iember kpishi sha iyange la; shi ve ver Solomon wan u Davidi tor, ka kwa har je la, ve shighe un mkurem a̱ lu ityoor sha ci u TER, Sadoki di lu pristi.

²³ Tsô Solomon tema sha ikônough ki torough ki TER, a ya tor sha ityough ki ter na Davidi, a tema kpe un iyol; Iserael cii ve ungwan imo na.

²⁴ Atiator cii man anomaior a ageegh kua ônov mba tor Davidi cii, ve ungwan imo i tor Solomon.

²⁵ TER kende a Solomon sha kpishi sha ishigh ki Iserael cii, A na un icivir i tor i ma tor ugen u nan vande a na ken Iserael nan lu a zua a mi nahan ga yô.

²⁶ Kape Davidi wan u Yese lu tor sha Iserael cii la.

²⁷ Anyom a a lu tor sha Iserael yô, lu akunduahar; anyom ataankarahar a lu tor ken Heberon, man anyom ikundugber kar atar a lu tor ken Yerusalem.

²⁸ A kpe, a tsa sha won dedoo, mgbough a inyaregh, a lu a icivir kpishi; tsô wan na Solomon tema tor sha ityough nagh.

²⁹ Aerenakaa a tor Davidi a hiihii man a masetyô cii, nenge i nger a ken abaver a Samuel, ornengenakaa, man ken abaver a profeti Natan, man ken abaver a Gadi ornengenakaa,

³⁰ i nger kwagh u tartor na kpaa, man tahav nav cii, man ayange a a kar sha a na man sha Iserael kua sha utor mba ityar igen cii.