1 Kroniku 23 - ICIGHAN BIBILO

¹ Davidi hingir tamenor, bee iyol, nahan a ver wan na Solomon tor sha Iserael.

² A kohol uityombaiorov mba Iserael cii a upristi kua Mbalevi.

³ I ôr iyenge i Mbalevi, hii sha mba ve kuma anyom ikundugber man mba ve hembe nahan kpaa, iyenge i i ôr ve sha asange asange yô, lu ior dubu ikundugber kar anigheni.

⁴ Ior vev dubu ikundu kar unyiin lu mbanengen sha tom u iyou i TER; ior dubu ataratar lu mbahemenev kua mbaajiriv;

⁵ ior dubu unyiin lu mbakuranihinda; ior dubu unyiin yô, lu mba wuese TER sha ityogholov mbi m er, mer, i̱ wa atsam i̱ wuese a mi.

⁶ Davidi pav ve iniongo iniongo, sha ati a ônov mba Levi, ka Gershon man Kohati kua Merari.

⁷ Ior mba ken Mbagershon yô, lu: Ladan man Shimei.

⁸ Ônov mba Ladan yô, lu: Yehiel orhemen man Setam kua Yoel, ve lu utar.

⁹ Ônov mba Shimei yô, lu: Shelomoti man Hashiel man Haran, ve lu utar. Mban ve lu uityombaiorov mba sha uya mba uter mba Ladan.

¹⁰ Ônov mba Shimei yô, lu: Yahati man Shina man Yeushi man Beria, mba unyiin mban ka ônov mba Shimei.

¹¹ Yahati lu orhemen, Shisa dondo; kpa Yeushi man Beria ve lu a ônov kpishi ga; nahan, i kohol ve, ve hingir tsombor môm, tom ve kpaa lu môm.

¹² Ônov mba Kohati yô, lu: Amram man Isehar man Heberon man Ushiel, ve lu unyiin.

¹³ Ônov mba Amram yô, lu Aron kua Mose; i tsegha Aron sha u a̱ tseghan uicighanmbaakaav mba hemban cii, un a ônov nav gbem sha won, sha u ve̱ nanden kwagh u humandoon sha ishigh ki TER, ve̱ eren Un tom man ve̱ naan iveren ken iti Na gbem sha won.

¹⁴ Kpa Mose or u Aôndo yô, i wa ônov nav ken kwe u Levi.

¹⁵ Ônov mba Mose yô, lu: Gershon man Elieser.

¹⁶ Ônov mba Gershon yô, lu Shebuel, orhemen.

¹⁷ Ônov mba Elieser yô, lu: Rehabia, orhemen, Elieser lu a ônov mbagenev ga; kpa ônov mba Rehabia lu kpishi.

¹⁸ Ônov mba Isehar yô, lu: Shelomiti, orhemen.

¹⁹ Ônov mba Heberon yô, lu: Yeria, orhemen, Amaria dondo, Yahashiel gbire man Yekameam mase.

²⁰ Ônov mba Ushiel yô, lu: Mika, orhemen, man Ishia dondo.

²¹ Ônov mba Merari yô, lu: Maheli man Mushi. Ônov mba Maheli yô, lu: Eleasar man Kishi.

²² Eleasar kpe, lu a ônov mba nomso ga, saa mba kasev tseegh; nahan ônov mba Kishi, anmgbianev vev mbala, gema er ve.

²³ Ônov mba Mushi yô, lu: Maheli man Eder man Yeremoti, ve lu utar.

²⁴ Mban ka ônov mba Levi sha uya mba uter vev, ka mbavesen mba sha uya mba uter, mba i ôr iyenge ve sha asange asange, mba ve eren tom u ken iyou i TER, hii sha or u nan kom anyom ikundu man u nan hembe nahan kpaa.

²⁵ Gadia Davidi kaa er: TER, Aôndo u Iserael, na ior Nav mmem, A tema ken Yerusalem gbem sha won.

²⁶ Mbalevi kpaa kera gba u shi vea tôôn tabernakel kua ikav nav cii mbi eren tom na a mi la ga—

²⁷ gadia sha akaaôron a Davidi a masetyô yô, i ôr iyenge i ônov mba Levi, hii sha u nan kom anyom ikundu man u nan hembe nahan kpaa—

²⁸ tom ve yô, lu u wasen ônov mba Aron tom u ken iyou i TER, ken ityembe kua ken ayou, man u wanger uicighanmbaakaav cii, ka tom u ken iyou i Aôndo je la;

²⁹ tom u ubredi mba sha ishi man mwem ma kengese sha ci u nagh ku sha samuyia man sha ci u ubredi mba par par mba i we kwa sha mi ga yô, man sha ci kwagh u i kaa a kaa sha icenge yô, shin sha kwagh u nungwan man hanma inja i ikaren i sha tasa kua ikaren i sha iniembe;

³⁰ man shi u tilen hanma sev naan TER ishughun kua iwuese, aikighe kpaa nahan;

³¹ man shi u nan TER iniav mbi nanden cii sha ayange a memen man sha mdugh u iwer i he, man sha ashighe a iniongo, sha iyenge i i ver mbi la, sha ishigh ki TER gbem;

³² man sha u ve̱ ver ishima sha tom u tenti u kohol ker, man tom u icighanjiir, man tom u wasen anmgbianev vev, ônov mba Aron, sha ci u tom u ken iyou i TER la.