1 Kroniku 22 - ICIGHAN BIBILO

¹ Tsô Davidi kaa er: Ingin ka iyou i TER Aôndo, man angan ka atse a nanden nagh sha mi, sha ci u Iserael.

² Tsô Davidi kaa er, i̱ kohol akuraior agen a a lu ken tar u Iserael cii; nahan a ver mbakuanawen er ve̱ kua awen, ve̱ sôr sha ci u maan iyou i Aôndo.

³ Davidi shi var iyôv mbi iliv kpishi, sha ci u ukusa mba ucivir mba ihindav, man sha ci u uiwever; man utogula ngee je gande u karen myohom;

⁴ ikon i sedar kpaa, gande u ôron iyenge; gadia Mbashidon man Mbatiru ve va na Davidi ikon i sedar kpishi je.

⁵ Gadia Davidi kaa er: Wan wam Solomon ngu wanye denge denge tsô, man iyou i á maa TER yô, ia gba ikôr tsung je, ia za iti, ia lu a icivir sha ityar ityar cii; yô, mo me kohol akaa sha ci u i. Kape Davidi kohol akaa kpishi er a lu a kpe ga la.

⁶ Tsô a yila wan na Solomon a kaa un er a̱ maa TER, Aôndo u Iserael, iyou.

⁷ Nahan Davidi kaa a wan na Solomon er: Mo yô, m wa ishima mer, me maa iyou sha ci u iti i TER, Aôndo wam.

⁸ Kpa imo i TER va her a mo er: U haa awambe inya kpishi, man u nôngo uzegembautyav, nahan ú maa iyou sha ci u iti Yam ga, gadia u haa awambe inya sha ishigh Yagh kpishi yum.

⁹ Nenge, ú va mar wan, un yô, una lu or u bem; yô, Me na un bem a mbaihomov nav mba vea kase un cii; gadia á yila un iti er Solomon, Me na Iserael bem kua mmem sha ayange a na.

¹⁰ Ka un una maa iyou sha ci u iti Yam ye, una lu wan Wam. Mo kpaa Me lu ter na; Me taver ikônough ki torough nagh sha Iserael gbem sha won.

¹¹ Hegen yô, wan wam, TER A̱ lu a we, lu a iveren, maa iyou i TER, Aôndo wou, er A ôr sha a we yô.

¹² Yô, TER A̱ na u kwaghfan man mkav, zum u Una ver u er u hemen Iserael yô, ú waan atindi a TER, Aôndo wou, iko.

¹³ Nahan ú lu a iveren aluer wea ver ishima u wan akaawan iko kua akaaôron a ijirigh a TER na Mose sha ci u Iserael yô; lu taveraa, taver ishima; de cie kwagh ga, de yen ishima ga.

¹⁴ Man nenge er m ye ican nahan kpaa, m kohol zenaria kuma utalenti dubu deri sha ci u iyou i TER kua azurfa utalenti dubu kwa dubu; togula man iyôgh ki iligh yô, gande u karen myohom, gadia ve ngee yum; ikon man awen kpaa m kohol m ver a ver; a lu u ka seer kpaa, seer.

¹⁵ Man shi mbaerentom kpaa mba a we imôngo kpishi, mbakuanawen man mbaerentom u awen kua ikon man shi mbafaneev sha hanma inja i tom cii.

¹⁶ Sha kwagh u zenaria man Azurfa togula kua iyôgh ki iligh yô, ka kwagh u ôron a ôr ga; yô, mough ase, er tom, TER kpaa A̱ lu a we.

¹⁷ Davidi shi kaa uityombaiorov mba Iserael cii er, ve̱ wase wan na Solomon; a kaa er:

¹⁸ TER, Aôndo wen, ngu a ven gaa? Man A na ne bem hanma ian kpaa gaa? Gadia A na mba ve tem hen tar ne sha ikev yam; tar hingir sha ikev i TER kua sha ikev i ior Nav.

¹⁹ Yô, ver nen ishima yen kua uma wen sha u keren TER, Aôndo wen; mough nen, maa nen icighanjiir u TER Aôndo, sha u né va a areki u ikuryan u TER man uicighanmbaakaav mba Aôndo ken iyou i á maa sha ci u iti i TER la.